6 قازاندا قازاقستان مەن گرەتسيا اراسىنداعى ديپلوماتيالىق قاتىناستاردىڭ ورناعانىنا 30 جىل تولادى, دەپ حابارلايدى Egemen.kz.
«30 جىل ىشىندە ەلدەر تەڭدىك پەن سىيلاستىق قاعيداتتارىنا نەگىزدەلگەن سەنىمدى جانە ءوزارا ءتيىمدى ىنتىماقتاستىق ورناتا الدى. استانا مەن افينا الەمدىك ساياساتتىڭ نەگىزگى ماسەلەلەرى بويىنشا ۇقساس ۇستانىمداردى ۇستانادى جانە ءارتۇرلى حالىقارالىق ۇيىمدار شەڭبەرىندە ءبىر-ءبىرىن بەلسەندى قولدايدى», دەدى قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ.
سپيكەردىڭ ايتۋىنشا, قازاقستان مەن گرەتسيا ەكونوميكالىق سالاداعى قاتىناستاردى دامىتۋعا ەرەكشە ءمان بەرەدى..
«سوڭعى جىلدارى ەلدەر اراسىنداعى تاۋار اينالىمى قارقىندى وسۋدە. بيىلعى جىلدىڭ العاشقى جەتى ايىندا ول 1 ملرد اقش دوللارىنان ءسال اسىپ, 40%-عا وسكەن», دەدى ايبەك سمادياروۆ.