مەملەكەت باسشىسى جاستارعا ۇندەۋ جولدادى

ء«بىر سوزبەن ايتقاندا, ەڭبەكقورلىق – قازىرگى زاماندا بىزگە اسا قاجەت قۇندىلىق. وسى قاعيدانى كەڭىنەن دارىپتەۋىمىز كەرەك. مەنىڭ مۇنى سەمەي تورىندە تۇرىپ ايتۋىمنىڭ وزىندىك سەبەبى بار. ويتكەنى, بۇل – ءاردايىم جاس ۇرپاقتى جاقسىلىققا, جاڭاشىلدىققا جەتەلەگەن جەر.مەنىڭ ۇندەۋىم ەلىمىزدەگى ءاربىر جاستىڭ جۇرەگىنە جەتەدى دەپ سەنەمىن. شىن مانىندە, قازىر – ءبىلىم مەن عىلىم سالتانات قۇرعان زامان. مۇنى دالەلدەۋدىڭ ەش قاجەتى جوق. الەمدىك ەكونوميكادا جوعارى تەحنولوگيالىق ونىمدەردى جاساپ شىعاراتىن كومپانيالار العا شىقتى. بۇل – عىلىم كەلەشەكتىڭ بەت-بەينەسىن انىقتايدى دەگەن ءسوز», دەدى مەملەكەت باسشىسى.

وسى ورايدا ول تىڭ يدەيا مەن وزىق وي كەز-كەلگەن سالانى وركەندەتەتىنىن ايتتى.

«وسكەلەڭ ۇرپاق بىلىمگە, عىلىمعا قۇشتار بولۋى كەرەك. وسىنى جان-جاقتى دارىپتەۋگە مەملەكەت قانا ەمەس, بۇكىل قوعام جانە ءاربىر ازامات اتسالىسۋعا ءتيىس. وركەنيەتتى مەملەكەتتى تەك ءبىلىمدى ازاماتتار عانا قالىپتاستىرا الادى», دەدى پرەزيدەنت.

بۇدان سوڭ, ول جۋىردا نيۋ-يورككە ساپارىندا اقش-تا جۇمىس ىستەپ جۇرگەن جاستارمەن كەزدەسكەنىن ەسكە سالدى.

«ولار ءبىلىم الۋعا دەگەن ىنتا-جىگەرى مەن ەڭبەكقورلىعىنىڭ ارقاسىندا الەمنىڭ ءار تۇكپىرىندە تابىسقا جەتىپ ءجۇر. مىنە, وسىنداي جاستاردى ۇلگى تۇتۋ قاجەت», دەدى ق.توقاەۆ.