قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ 8 وقىتۋشىسى وتكەن وقۋ جىلىندا ەلىمىزدەگى «ۇزدىك وقىتۋشى» اتاعىن يەلەنسە, 11 وقىتۋشى «بولاشاق» حالىقارالىق ستيپەندياسىنىڭ يەگەرى اتانعان. بيىل ۋنيۆەرسيتەتتى تاڭداپ, مەملەكەتتىك گرانت يەگەرى اتانعان ستۋدەنتتەردىڭ سانى ارتقان, ياعني 2021-2022 وقۋ جىلىمەن سالىستىرعاندا گرانت سانى 18% وسكەن, دەپ حابارلايدى Egemen.kz.
بۇل دەرەكتەردى ۋنيۆەرسيتەت رەكتورى جانار تەمىربەكوۆا 2021-2022 وقۋ جىلىندا اتقارىلعان ءىس-شارالار تۋرالى ۇجىمنىڭ جانە قوعام الدىندا بەرگەن ەسەبىندە كەلتىردى. تۇركىستان وبلىسىنىڭ قۇرمەتتى ازاماتتارى, قوعام بەلسەندىلەرى, وبلىستىق ءماسليحات دەپۋتاتتارى, باق وكىلدەرى, ۋنيۆەرسيتەت ۇجىمى مەن ستۋدەنتتەر قاتىسقان ەسەپتىك جيىندا جانار تەمىربەكوۆا اكادەميالىق, عىلىم, مەديتسينا, الەۋمەتتىك, شارۋاشىلىق جانە وزگە دە باعىتتاردا اتقارىلعان اۋقىمدى شارالار تۋرالى اقپارات بەردى. اتاپ ايتقاندا, 2021-2022 وقۋ جىلىندا باكالاۆريات, ماگيستراتۋرا, دوكتورانتۋرا, رەزيدەنتۋرا دەڭگەيىن قوسا العاندا, 21 ءبىلىم بەرۋ باعدارلاماسى جاڭارتىلعان. ءبىلىمنىڭ قاينار كوزى – ۋنيۆەرسيتەت كىتاپحاناسىنىڭ قورىن تولىقتىرۋ ءۇشىن بيۋدجەتتەن 61 ملن تەڭگەدەن استام قارجى ءبولىنىپ, جاڭا وقۋلىقتار ساتىپ الىندى. سونداي-اق ەلەكتروندى كىتاپحانا جۇيەسىنىڭ جۇمىسى جاندانا تۇسكەن. جەكە كلينيكاسى بار بىردەن-ءبىر وقۋ ورنىنداعى كلينيكا-دياگنوستيكالىق ورتالىقتىڭ ماتەريالدىق-تەحنيكالىق بازاسى جاڭارتىلىپ, شەتەلدىك ماماندارمەن تاجىريبە الماسۋ, دارىگەرلەردىڭ ءبىلىمىن ارتتىرۋ ءۇشىن شەتەلگە جىبەرۋ جۇمىستارى جىل بويى جۇرگەن.
اتقارىلىپ جاتقان اۋقىمدى جۇمىستاردىڭ ناتيجەسىندە ءبىلىم ورداسى Quacquarelli Symonds (QS) Emerging Europe and Central Asia (EECA) University Rankings رەيتينگىندە بىردەن 45 پوزيتسياعا العا جىلجىپ, 2020 جىلعى 175-ءشى ورىننان 2021 جىلى 130-شى ورىنعا كوتەرىلدى. سونداي-اق العاش رەت Qs World University Rankings 2023-كە العاش رەت ەنىپ, 714-ءشى ورىنعا جايعاستى. وسىلايشا, ۋنيۆەرسيتەت 2026 جىلعا قويعان مەجەگە ۋاقىتىنان بۇرىن قولجەتكىزدى. وتكەن وقۋ جىلىندا شارۋاشىلىق قىزمەتتىن رەتتەۋگە دە كوپ ءمان بەرىلگەن. ۋنيۆەرسيتەت عيماراتتارى مەن جاتاقحانالاردىڭ شاتىرلارى توزىعى جەتىپ, ىشكە سۋ وتەتىن بولعاندىقتان, 40 جىلعا جارامدى جاڭا ماتەريالدارمەن قايتا جابىلدى. ستۋدەنتتەر ءۇيىنىڭ بىرەۋى تولىق جوندەۋدەن ءوتىپ, جيھازدارى جاڭارتىلسا, تاعى بىرەۋى جارتىلاي جوندەۋدەن وتكەن. بۇدان وزگە دە جوندەۋ, توزعان ماتەريالداردى قايتا جاڭعىرتۋ جۇمىستارى كوپ.
جالپى, ۋنيۆەرسيتەتتە ءبىر جىلدا اتقارىلعان جۇمىستار اۋىز تولتىرىپ ايتارلىق. مۇنى رەكتور ەسەبىن تىڭداۋعا كەلگەن قۇرمەتتى قوناقتار مەن وقىتۋشىلار دا اتاپ ءوتتى. وبلىستىڭ تىنىس-تىرشىلىگىمەن تانىس, قوعامدا ورىن الىپ جۇرگەن جاعدايلارعا ۇنەمى ءۇن قوسىپ جۇرەتىن ارداگەرلەر وقۋ ورنىنىڭ جۇمىسىنا جوعارى باعاسىن بەرىپ, اقجارما تىلەكتەرىن ارنادى.