ەۇۋ-عا زەرتتەۋ ۋنيۆەرسيتەتى مارتەبەسى بەرىلدى

جوعارى وقۋ ورنىن ترانسفورماتسيالاۋ الدىندا ۋنيۆەرسيتەتتىڭ عىلىمي الەۋەتىن ارتتىرۋ بويىنشا كەشەندى جۇمىستار جۇرگىزىلدى. قولدانبالى عىلىمي زەرتتەۋلەردى كۇشەيتۋگە ەرەكشە نازار اۋدارىلدى. جالپى ەۇۋ الەمدەگى زەرتتەۋ ۋنيۆەرسيتەتتەرىنىڭ وزىق تاجىريبەسى نەگىزىندە زاماناۋي عىلىمي-وندىرىستىك ەكوجۇيەنى دامىتۋدى, ونى بيزنەسپەن جانە وندىرىسپەن بايلانىستى نىعايتۋعا باسىمدىق بەرىپ وتىر.

ۋنيۆەرسيتەت تاراپىنان جۇزەگە اسىرىلىپ جاتقان دامۋ باعدارلاماسىنىڭ نەگىزگى باعىتتارى – عىلىمي جانە ءبىلىم بەرۋ قىزمەتىنىڭ ينتەگراتسياسى, كادرلاردى دايارلاۋ ساپاسىن ارتتىرۋ, عىلىمنىڭ, ونەركاسىپتىڭ جانە بيزنەستىڭ بايلانىسىن نىعايتۋ, ەلدىڭ الەۋمەتتىك دامۋىنا ۇلەستى ارتتىرۋ.

ۋنيۆەرسيتەتتىڭ عىلىمي ينفراقۇرىلىمىن كەڭەيتۋ اياسىندا اباي وبلىسىنىڭ كۋرچاتوۆ قالاسىندا ورنالاسقان «يادرولىق تەحنولوگيالار پاركى» اق ەۇۋ-عا بەرىلدى. بۇل پارك مامانداردى دايارلاۋ, عالىمداردىڭ زەرتتەۋلەرىن جۇرگىزۋ, عىلىمي ازىرلەمەلەردى كوممەرتسيالاندىرۋ الاڭىنا اينالادى. كاسىپورىندا ستۋدەنتتەردىڭ پراكتيكالىق داعدىلارىن جەتىلدىرۋگە جانە عىلىمي جۇمىسپەن اينالىسۋعا مۇمكىندىك بەرىلەدى.

ۋنيۆەرسيتەت بەلسەندى تۇردە جەكە بيۋدجەتى ەسەبىنەن جاس عالىمداردىڭ ۇلەسىن ارتتىرىپ, زەرتتەۋلەر مەن ستارتاپ-جوبالارعا ۋنيۆەرسيتەتتىك گرانتتار بولۋگە باسا نازار اۋدارىپ وتىر. عىلىم بويىنشا حالىقارالىق كوللابوراتسيانى دامىتۋ ماقساتىندا شەتەلدىك پوستدوكتورانتتار ءۇشىن شاكىرتاقىلار قاراستىرىلعان.

2020 جىلدان باستاپ ۋنيۆەرسيتەتتە جالاقىسى كوتەرىلگەن جانە اكادەميالىق جۇكتەمەسى تومەندەتىلگەن «وقىتۋشى-زەرتتەۋشى» پوزيتسياسى ەنگىزىلدى. بيىلعى وقۋ جىلىندا مۇنداي مارتەبەنى ەۇۋ-ءنىڭ 20 جەتەكشى عالىم-وقىتۋشىلارى يەلەندى.

سونىمەن بىرگە بيىل قولدانبالى زەرتتەۋلەرمەن, ناتيجەلەردى كوممەرتسيالاندىرۋمەن اينالىساتىن «زەرتتەۋشى-يننوۆاتور» دەگەن جاڭا پوزيتسيا  ەنگىزىلدى.

جالپى ۋنيۆەرسيتەتتە عىلىمنىڭ قارجىلاندىرۋ كولەمى بىرتىندەپ ارتىپ كەلەدى. بۇل كورسەتكىش مەملەكەت تاراپىنان عىلىمي-زەرتتەۋ جۇمىستارىن قارجىلاندىرۋ كولەمىنىڭ ۇلعايۋىنىڭ ارقاسىندا 2 ەسە ءوستى.

بيىل ەۇۋ-ءنىڭ جەتەكشى عالىمدارى 100-دەن استام عىلىمي زەرتتەۋلەردى جۇزەگە اسىرۋدا. ولار بيولوگيا جانە بيوتەحنولوگيا, يادرولىق فيزيكا, ماتەماتيكا جانە اقپاراتتىق تەحنولوگيالار, حيميا جانە جەر تۋرالى عىلىمدار, ينجينيرينگ جانە قوعامدىق-گۋمانيتارلىق عىلىمدار سالالارىنداعى 31 عىلىمي بولىمشەنىڭ جانە جەتەكشى عىلىمي مەكتەپتەردىڭ بازاسىندا جۇرگىزىلەدى. اكادەميالىق جانە ۋنيۆەرسيتەتتىك عىلىمدى بىرىكتىرەتىن 6 عىلىمي-ءبىلىم بەرۋ كلاستەرى قۇرىلعان.

بۇگىنگى تاڭدا ەۇۋ-دا عىلىمي دارەجەسى بار پروفەسسورلىق - وقىتۋشىلىق قۇرامنىڭ ۇلەسى 67% - دى قۇرايدى, ال قر-دا عىلىمي كادرلاردىڭ دارەجەلىلىك ورتاشا كورسەتكىشى 35% تەڭ. بۇل رەتتە پروفەسسورلىق – وقىتۋشىلىق قۇرامنىڭ 40% - عا جۋىعى – 39 جاسقا دەيىنگى جاس عالىمدار. 2021 جىلدىڭ قورىتىندىسى بويىنشا ەلىمىزدىڭ 50 عالىمى اراسىندا ۋنيۆەرسيتەتتىڭ 9 عالىمى «ۇزدىك عىلىمي كىزمەتكەر» سىيلىعىن يەلەندى.

سوڭعى بەس جىلدا ەۇۋ عالىمدارىنىڭ جاريالانىمدىق بەلسەندىلىگى ەكى ەسەگە ارتتى. ماقالالاردىڭ جارتىسىنان كوبى Web of Science بازاسىنىڭ Q1, Q2 جۋرنالدارىندا جاريالانادى. ۋنيۆەرسيتەتتىڭ جەتەكشى عالىمدارىنىڭ جاريالانىمدارى سالا بويىنشا جىل سايىن الەمدەگى ەڭ كوپ سىلتەمە جاسالاتىن 0,1% - عا كىرەدى.

ۋنيۆەرسيتەتتە Scopus, Web of Science جانە باسقا دا حالىقارالىق مالىمەتتەر بازاسىنا ەنگىزىلگەن 17 عىلىمي جۋرنال شىعارىلادى.

ايتا كەتەيىك, بيىل ەۇۋ QS World University Rankings 2023 حالىقارالىق رەيتينگىندە الەمنىڭ ۇزدىك 300 ۋنيۆەرسيتەتتەرىنىڭ قاتارىنا ەنىپ, 277-ءشى ورىنعا يە بولدى. سوڭعى ءۇش جىلدا ۋنيۆەرسيتەت بۇل رەيتينگتە 141 ساتى العا جىلجىدى.