ەلىمىز بيىل اسا ءبىر كۇردەلى دە, سالماقتى ساياسي جاڭارۋعا بەت بۇردى. مەملەكەت باسشىسى قاسىم-جومارت توقاەۆتىڭ 1 قىركۇيەكتەگى قازاقستان حالقىنا «ادىلەتتى ۇلت. ءبىرتۇتاس مەملەكەت. بەرەكەلى قوعام» اتتى جولداۋىندا كۇردەلى گەوساياسي جاعدايدا مەملەكەتتىڭ تەرريتوريالىق بىرتۇتاستىعىن ساقتاي وتىرا, ەلىمىزدەگى قوردالانعان ساياسي-ەكونوميكالىق ماسەلەلەردى شەشۋدىڭ تىڭ تەتىگىن ىسكە قوسۋ ۋاقىت كۇتتىرمەيتىن ماسەلە ەكەنىن ايقىنداپ بەردى.
رەفورمالاردى تولىققاندى جۇزەگە اسىرۋ ماقساتىندا مەيلىنشە مۇقيات ارەكەت ەتىپ, ۇزاقمەرزىمدى مۇددەگە جۇمىلۋ قاجەتتىلىگى باسا ايتىلدى. الدىمىزدا تۇرعان ستراتەگيالىق رەفورمالاۋدى تولىققاندى جۇزەگە اسىرۋ, مەملەكەتتىك ينستيتۋتتاردى جاڭعىرتۋ اياسىندا پرەزيدەنت وكىلەتتىگىنىڭ مەرزىمىن 7 جىلعا سوزۋ ۇسىنىلدى. اتاپ وتەتىن تۇسى, پرەزيدەنتتىڭ وكىلەتتىگى 7 جىل جانە سايلانۋ مەرزىمى ءبىر رەت قانا, ياعني ەكىنشى رەت سايلانۋىنا تىيىم سالىنباق. بۇل وزگەرىس قوعامعا نە ءۇشىن قاجەت دەگەن سۇراقتىڭ تۋىنداۋى تابيعي زاڭدىلىق. بۇل – مەملەكەتتىك بيلىكتى مونوپوليزاتسيالاۋدىڭ الدىن الۋدىڭ ءبىر تەتىگى.
بۇل رەتتە مەملەكەت باسشىسى كەزەكتەن تىس پرەزيدەنت سايلاۋى 20 قاراشادا وتەتىنى تۋرالى جارلىققا قول قويدى جانە وسى باستاماعا بايلانىستى قازاقستان حالقىنا ۇندەۋ جاسادى. كەزەكتەن تىس پرەزيدەنت سايلاۋى – ەلىمىزدىڭ تۇراقتى دامۋىنا ۇلەس قوساتىن شەشىم. پرەزيدەنت قاسىم-جومارت توقاەۆتىڭ 2019 جىلى قولعا العان باستامالارى مەن كونستيتۋتسيالىق رەفورمالاردىڭ ناتيجەسىندە قازاقستاندا مەملەكەتتىك-ساياسي قۇرىلىمنىڭ جاڭا مودەلى قالىپتاستى. ەندى كەلەسى قادام – وسى مودەلدى ىسكە قوسۋ بولماق. بۇل كۇردەلى, جاۋاپتى قادام كونستيتۋتسياعا سايكەس حالىق پەن مەملەكەت اتىنان ارەكەت ەتەتىن پرەزيدەنت پەن پارلامەنت دەپۋتاتتارىنىڭ تىكەلەي سايلاۋىمەن بايلانىستى. ەڭ الدىمەن, حالىق مەملەكەت باسشىسىن جاڭارعان كونستيتۋتسيالىق مارتەبەدە جانە جاڭارتىلعان سايلاۋ زاڭىمەن سايلاۋى كەرەك. سونىڭ بىردەن-ءبىر دالەلى – 2022 جىلعى ماۋسىمدا وتكەن جالپىحالىقتىق رەفەرەندۋمعا ەل ازاماتتارىنىڭ كوپشىلىگىنىڭ قاتىسۋى. الداعى سايلاۋدى قازاقستان تاريحىنداعى جاڭا ساپالى كەزەڭنىڭ باستاۋى رەتىندە قابىلدايمىن. بۇل – ادىلەتتى قوعام قۇرۋ جولىنداعى ماڭىزدى قادام. ءوز كەزەگىندە, قاسىم-جومارت توقاەۆ سايلاۋ ناۋقانىنىڭ قاتاڭ زاڭ شەڭبەرىندە وتەتىنىنە, وتاندىق جانە حالىقارالىق بايقاۋشىلاردىڭ قاتىساتىنىنا كەپىلدىك بەردى.
تاۋەلسىزدىك بارىنەن دە قىمبات! دەمەك بۇگىنگى بۋىن مەملەكەتىمىزدە جۇزەگە اسىپ جاتقان ساياسي وزگەرىستەردىڭ كۋاسى بولا وتىرا, ءوز تاراپىنان سول تاۋەلسىزدىكتىڭ نىعايۋىنا, كەمەلدەنۋىنە وزىندىك ۇلەس قوسۋعا مەيلىنشە مۇددەلى بولۋعا ءتيىس.
باعىش عابدۋللينا,
ل.ن.گۋميلەۆ اتىنداعى ەۇۋ ساياساتتانۋ كافەدراسىنىڭ مەڭگەرۋشىسى,
پروفەسسور