كەشە اقمولا وبلىسىندا جول اپاتىنان موتوتسيكل جۇرگىزۋشىسى قازا تاپتى, دەپ حابارلايدى Egemen.kz.
22 قىركۇيەك كۇنى كەشكى ساعات 18:45 شاماسىندا جول اپاتى بولدى. بۋراباي اۋدانىنىڭ پوليتسيا بولىمىنە «استانا – پەتروپاۆل» اينالما جولىندا BMW S1000RR سپورتتىق موتوتسيكلىنىڭ جۇرگىزۋشىسى رولگە يە بولا الماي, قيسىق ارقالىققا سوقتىعىسۋعا جول بەرگەنى تۋرالى حابارلاما كەلىپ ءتۇستى. اپات سالدارىنان 41 جاستاعى موتوتسيكل جۇرگىزۋشىسى وقيعا ورنىندا كوز جۇمدى.
مارقۇمنىڭ قاراعاندى قالاسىنىڭ تۇرعىنى ەكەنى جانە ۇيىنە قايتىپ كەلە جاتقانى انىقتالدى.
اتالعان فاكتى قر قىلمىستىق كودەكسىنىڭ 345-بابىنىڭ ءۇشىنشى بولىگى بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە تىركەلىپ, ءتيىستى ساراپتامالار تاعايىندالدى.