پالاتالاردىڭ بىرلەسكەن وتىرىسىندا ءسوز سويلەگەن دەپۋتاتتار زاڭ جوباسىنىڭ قابىلدانۋ لوگيكاسىن, ىشكى بولمىسىن جاقسى بايانداپ بەردى. بۇل – تاريحي ماڭىزى زور قادام. پرەزيدەنتتىڭ ۇلكەن قايراتكەرلىگى وسى كەزگە دەيىن قالىپتاسقان ساياسي كيكىلجىڭدەردى اسقىندىرماي, شەشىپ كەلەدى.
الەۋمەتتىك كودەكس, سالىق كودەكسى قابىلدانادى. ەكونوميكاداعى ويىن ەرەجەلەرى وزگەرەدى. كەن وندىرۋشىلەرمەن جانە باسقالارمەن قارىم-قاتىناس باسقا باعىتتا ءوربيدى. كەز كەلگەن قالىپتاسقان جاڭا ينستيتۋت جاڭا مۇمكىندىكتەر جانە جاڭا دەموكراتيالىق ۇردىستەرمەن قاتار, جاڭا قاقتىعىستار تۋعىزادى. وسىنىڭ ءبارىن ەسكەرە وتىرىپ, پارلامەنت پرەزيدەنتتىڭ وكىلەتتىك مەرزىمىن سوزىپ, ءبىر عانا مارتە سايلانۋىن قولدادى. ياعني بولاشاقتا ەشقانداي پرەزيدەنتتىڭ بيلىكتى باسىپ الىپ, مونوپوليزاتسيالاۋىنا, ۋزۋرپاتسيالاۋىنا جول بەرمەيتىن شەشىم قابىلدادى.
ەكىنشى جاعىنان, قوعامنىڭ پىكىرىن, وسى كەزگە دەيىن قالىپتاسقان ماسەلەلەردى ەسكەرە كەلە, حالىقتىڭ ىشىندە جىك سالعان, ءبولىپ-جارعان ەلوردانىڭ ەسكى اتاۋىن قايتارۋ تۋرالى تاريحي شەشىم قابىلداندى دەپ ايتۋعا بولاتىن شىعار. سول سەبەپتى ءماجىلىس پەن سەنات بىرلەسكەن وتىرىستا وسىنداي شەشىمگە كەلدى.
قاسىم-جومارت توقاەۆ – ۇلكەن ساياسي تۇلعا, قايراتكەر. ارينە, ەلوردا اتاۋىن ءوزى ۇسىنعاندىقتان, بۇل شەشىمگە بارۋ وڭايعا سوققان جوق. بايقاساڭىز, جولداۋدىڭ ەرتەڭىنە «ادىلەتتى قازاقستان» دەپۋتاتتىق توبى ءوز ۇسىنىسىن جاريالادى. پرەزيدەنت ءبىر اپتاداي ويلاندى, ساياسي كونسۋلتاتسيا جۇرگىزدى. مەنىڭشە, بۇل ۇلكەن جاۋاپكەرشىلىكتەن تۋىنداعان شەشىم. ويتكەنى قوعامدىق پىكىردى دە ەسكەرۋ كەرەك. بۇل – ءومىردىڭ لوگيكاسى اكەلگەن تاريحي شەشىم. تاريح ءدال قازىر كوز الدىمىزدا جازىلىپ جاتىر, وزگەرىپ جاتىر. ءبىز وسى تاريحي كەزەڭنىڭ ءبىر بولشەگى بولىپ وتىرمىز.
ايدوس سارىم,
ءماجىلىس دەپۋتاتى