قۇلپىناي ءوسىرۋدى قولعا العان نۇرجىگىت راقىمجانوۆتىڭ ماماندىعى – مۇنايشى. جىلىوي اۋدانىندا ورنالاسقان «تەڭىز» كەن ورنىندا ۆاحتالىق ادىسپەن جۇمىس ىستەيدى.
بيىل ماحامبەت اۋدانىنداعى جالعانساي اۋىلىندا 1 گەكتارعا 17 مىڭ ءتۇپ قۇلپىنايدىڭ يتاليالىق, كاليفورنيالىق تۇرىلەرىن ەگىپتى. قۇلپىنايدىڭ بۇل سۇرىپتارى ىستىققا دا, سۋىققا دا ءتوزىمدى ەكەن. ونى تامشىلاتۋ ادىسىمەن سۋارادى.
– بۇرىن جەكە كاسىپپەن دە, ەگىن شارۋاشىلىعىمەن دە اينالىسپاعان ەدىم. كوروناۆيرۋس ينفەكتسياسى باستالعاندا, تۇرعىندار تاراپىنان قويدىڭ قۇيرىق مايىنا, ليمون مەن يمبيرگە, وعان قوسا قۇلپىناي مەن تاڭقۋراي سىندى جەمىس-جيدەكتەن قايناتىلعان توساپتارعا سۇرانىس ارتا ءتۇستى. سول كەزدە اتىراۋعا تۇركيا مەن قىرعىزستاننان ءبىر قورابى 2 500 تەڭگە تۇراتىن قۇلپىناي اكەلىنەتىنىن ەستىدىم. بازاردان ساتىپ العان سول قۇلپىنايدىڭ ءدامى دە, ءتۇرى دە كوڭىلىمنەن شىققان جوق. سەبەبى بىرنەشە كۇن كولىكپەن تاسىمالدانعان جۇمساق جەمىس ەزىلىپ قالعان, – دەيدى نۇرجىگىت راقىمجانوۆ. وسىلايشا, ەكى جىل بۇرىن قۇلپىنايدى ءوزى وسىرۋگە بەل بۋدى. بىراق الدىمەن ونىڭ ءوسىرۋ ءادىسىن زەرتتەدى. نيدەرلاند مەن يتاليانىڭ باعباندارىمەن پىكىرلەسىپ, تۇقىم ەرەكشەلىكتەرىن سالىستىردى. ءسويتىپ, بىلتىر تاجىريبە رەتىندە ءۇيىنىڭ اۋلاسىنا 2 مىڭ ءتۇپ قۇلپىناي ەگىپ كوردى.
– قازىر يتاليالىق «كلەير» جانە كاليفورنيالىق «البيون» دەپ اتالاتىن قۇلپىنايدىڭ 17 مىڭ ءتۇبىن ءوسىرىپ وتىرمىن. بۇل قۇلپىنايلار ءارى ءىرى, ءارى ءدامدى, ءبىزدىڭ ءوڭىردىڭ اۋا رايىنا توزىمدىلىگىمەن ەرەكشەلەنەدى. «كلەير» جەمىستى كوكتەمدە بەرەدى. ال «البيوننان» ەرتە كوكتەمنەن قاراشاعا دەيىن ءونىم الۋعا بولادى. قۇلپىناي ءوسىرۋ ءۇشىن تۇقىمى مەن سۇرپى ساپالى بولۋى كەرەك. سۋارۋ, تىڭايتقىشپەن وڭدەۋ, ءتۇرلى اۋرۋلاردان قورعاۋ تەحنولوگياسىن مەڭگەرۋ قاجەت, – دەيدى نۇرجىگىت راقىمجانوۆ.
اتىراۋ وبلىسى