تسەلينوگراد اۋدانىنىڭ تۇرعىنى باقشادا قاراسورا ءوسىرىپ, ەسىرتكى دايىنداعان, دەپ حابارلايدى Egemen.kz Polisia.kz-كە سىلتەمە جاساپ.
«14 قىركۇيەك «قاراسورا-2022» رەسپۋبليكالىق جەدەل الدىن الۋ ءىس-شاراسى اياسىندا تسەلينوگراد اۋدانىنىڭ جاڭاەسىل اۋىلىندا جەرگىلىكتى تۇرعىننىڭ باقشاسىنان 30-عا جۋىق سورا وسىمدىگىنىڭ بۇتالارى تابىلىپ, تاركىلەندى. سونىمەن قاتار, شارۋاشىلىق قۇرىلىستاردان سۇر-جاسىل ءتۇستى وسىمدىك تەكتەس زاتپەن تولتىرىلعان 20 ليترلىك ىدىس, سونداي-اق 2 بانكا جانە ۇقساس زاتپەن 1 پاكەت انىقتالىپ, تاركىلەندى», دەپ جازىلعان حابارلامادا.
تاركىلەنگەن زات ماريحۋانا ەسىرتكىسى بولىپ شىقتى. پوليتسەيلەر انىقتاعانداي, وسى جىلدىڭ كوكتەمىندە 49 جاستاعى اۋىل تۇرعىنى ءوز ۋچاسكەسىندە قاراسورا وتىرعىزعان. ەر ادام وسىرىلگەن بۇتالاردى ەسىرتكى جاساۋ ءۇشىن شيكىزات رەتىندە پايدالانعان, ال كەيىن ءوزى دە تۇتىنعان. قازىرگى ۋاقىتتا اتالعان فاكتى بويىنشا قر قك 296-بابى 2-بولىگى (ەسىرتكى زاتتارىمەن زاڭسىز اينالىسۋ) بويىنشا سوتقا دەيىنگى تەرگەۋ باستالدى. ساراپتاما تاعايىندالدى. /