بۇگىن ەلورداداعى تاۋەلسىزدىك سارايىندا الەمدىك جانە ءداستۇرلى دىندەر ليدەرلەرى VII سەزىنىڭ سەكتسيالىق وتىرىسى ءوتتى, دەپ حابارلايدى Egemen.kz.
«ايەلدەردىڭ قازىرگى قوعامنىڭ ءال-اۋقاتى مەن تۇراقتى دامۋىنا قوسقان ۇلەسى جانە ايەلدەردىڭ الەۋمەتتىك مارتەبەسىن قولداۋداعى ءدىني قاۋىمداستىقتاردىڭ ءرولى» تاقىرىبىنداعى ءتورتىنشى سەكتسيا جۇمىسىن قمدب توراعاسى, باس ءمۇفتي ناۋرىزباي قاجى تاعان ۇلى جۇرگىزدى.
قمدب توراعاسى يسلام دىنىندە ايەلگە ايرىقشا مارتەبە بەرىلگەنىن ايتا كەلىپ: «يماندىلىق جولىن ۇستانعان حالقىمىز قىز-كەلىنشەكتى قۇرمەتتەۋدىڭ ەرەكشە ۇلگىسىن كورسەتكەن. نازىك جاندى قۇرمەتتەۋگە كەلگەندە ونى ءتىپتى تورگە شىعارعان, ال تاربيەسىنە كەلگەندە قىزدى قىرىق ۇيدەن تىيعان. وسى تىيىمنىڭ ءبارى ايەلدىڭ يمانى مەن قۇرمەتىن, ارى مەن ۇياتىن قورعايدى.
جاراتۋشى يەمىز «نيسا» سۇرەسىنىڭ 19-اياتىندا: «ايەلدەرىڭمەن جاقسى تۇرىپ, جاقسى قارىم-قاتىناستا بولىڭدار», – دەپ بۇيىرعان. ال ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «يمان تۇرعىسىنان مۇمىندەردىڭ ەڭ كامىلى – مىنەز-قۇلقى ەڭ جاقسى بولعاندار. سەندەردىڭ ەڭ ارداقتىلارىڭ − جارلارى مەن بالالارىنا جاقسى قاراعاندارىڭ. ارالارىڭدا جانۇياسىنا ەڭ جاقسى قارايتىن مەنمىن» دەپ سوزىمەن دە, ىسىمەن دە ۇلگى-ونەگە كورسەتكەن», دەدى باس ءمۇفتي.
سەكتسيا وتىرىسىندا كونفەسسيالىق كەڭىستىكتەگى قازىرگى زامانعى ايەلدىڭ بەينەسى, قازىرگى ايەلدىڭ ومىرىندەگى ءدىننىڭ ءرولى, ءدىننىڭ وتباسىنداعى جانە قوعامداعى ايەلدەردىڭ رولىنە كوزقاراسى, ايەلدىڭ الەۋمەتتىك مارتەبەسىن قولداۋداعى جانە گەندەرلىك تەڭدىكتى قامتاماسىز ەتۋدەگى ءدىننىڭ ءرولى, ءداستۇرلى وتباسىلىق قۇندىلىقتاردى نىعايتۋعا ءدىننىڭ قوسقان ۇلەسى, ايەلدەر جانە ادامي باۋىرلاستىق مۇراتتارىن تاربيەلەۋ ت.ب تاقىرىپتار ءسوز بولدى.
باسقوسۋ بارىسىندا يىۇ جانىنداعى يسلام تاريحىن, ونەرى مەن مادەنيەتىن زەرتتەۋ ورتالىعىنىڭ باسشىسى ماحمۋد ەرول كيليچ, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى, سەنات دەپۋتاتى ءلاززات سۇلەيمەن, ءباا-ءنىڭ تولەرانتتىلىق جانە بىرگە ءومىر ءسۇرۋ مينيسترلىگى كەڭسەسىنىڭ باس ديرەكتورى افرا مۇحاممەد ءال-ساابري, «اقنيەت» اقپاراتتىق-ناسيحاتتاۋ جانە وڭالتۋ ورتالىعىنىڭ تەولوگى نۇرجان ستامباكيەۆ, «UniãoPlanetária» پرەزيدەنتى يسيس ماريا بورگەس دە رەسەندە, UNICEF ىزگى نيەت ەلشىسى دينارا سادۋاقاسوۆا, سەنات جانىنداعى «جاس ساراپشىلار كلۋبىنىڭ» مۇشەسى جۇلدىزاي ىسقاقوۆا بايانداما جاساپ, ايەلدەردىڭ قوعامداعى رولىنە توقتالدى.