قىزىلوردا جارمەڭكەنى قىزدىردى

قىزىلوردا ءوڭىرىنىڭ اق مارجانى, ارالدىڭ بالىعى ساۋدانى قىزدىردى. مۇنداعى سارى ماي, ىرىمشىك, قۇرت, ەت پەن شۇجىق جانە كوكونىستەر نارىقتىق باعادان 15-20 پايىز تومەن ساۋدالانۋدا. جالپى, ەلورداداعى اۋىل شارۋاشىلىعى ونىمدەرىنىڭ جارمەڭكەسىنە قىزىلوردا وبلىسىنان 500 توننادان استام ءونىم جەتكىزىلدى.

«قىزىلوردا وبلىسىنان جارمەڭكەگە 70-تەن اسا كاسىپكەر قاتىسىپ, 500-دەن اسا تاۋار, اۋىل شارۋاشىلىعى ونىم­دەرىن اكەلدى. جارمەڭكە نەگىزى قالا­داعى ازىق-ت ۇلىكتى قامتاماسىز ەتۋگە, با­عانى تۇراقتاندىرۋعا باعىتتالعان. قازاق­ستاننىڭ بارلىق وبلىسىنىڭ قاتىسۋىمەن بولادى. قاراشا ايىنا دەيىن جالعاسادى. وسى اپتادا الماتى وبلىسى مەن جەتىسۋ وبلىستارىنىڭ اۋىل شارۋا­شىلىعى ونىمدەرىن كۇتىپ وتىرمىز. ءار سەنبى-جەكسەنبى سايىن كەزەكپەن وبلىستار كەلىپ وتىرادى», دەدى قالالىق ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى قۋانىش ساپاروۆ.

جارمەڭكەدە وڭىرلەردە وندىرىلەتىن وتاندىق ونىمدەردى قولداۋ ماقساتىندا ارنايى اۋىل شارۋاشىلىعى ونىمدەرىنىڭ كورمەسى ۇيىمداستىرىلعان. سىردىڭ ديقاندارى مەن كاسىپورىندارى 50 جۇك اۆتوكولىگىمەن جالپى قۇنى 200 ملن تەڭگەنى قۇرايتىن 500 توننادان استام ءونىم تۇرلەرىن ەلورداعا جەتكىزدى. ونىڭ ىشىندە 100 توننا كۇرىش, 15 توننا ەت جانە 30 توننا بالىق ونىمدەرى, 80 توننا كوكونىس پەن جەمىس-جيدەكتەر, 210 توننا باقشا ونىمدەرى, 50 توننا اسقاباق, 3 توننا اس تۇزى, 10 توننا ءسۇت ونىمدەرى, 5 تونناعا جۋىق كونديتەر ونىمدەرى قويىلعان.

«جارمەڭكەگە ءۇش ءتۇرلى بۇقتىرىلعان ەت, ەكى ءتۇرلى كۇرىش, قاراقۇمىق جانە اسقاباق, ءسابىز شىرىنىن, بالالار تاعا­مىن اكەلدىك. ونىڭ بارلىعى – ەش قوس­پاسىز, ەكولوگيالىق تازا, ساپاسى جوعارى ونىمدەر. قولجەتىمدى ارزان باعا­مەن ساتىپ جاتىرمىز. حالىققا تازا تابيعي ءونىم ۇسىنۋ – تەحنولوگ رەتىن­دەگى باستى قاعيدام. مۇندا ادامدار كوپتەپ كەلۋدە. ۇسىنىپ وتىرعان باعا­مىز ولاردىڭ كوڭىلىنەن شىعۋدا», دەدى قىزىلوردا وبلىسىنداعى باس تەحنولوگ قۋات شاكيزباەۆ.

«ەلوردادا اپتا سايىن وتەتىن وڭىر­لەردىڭ اۋىل شارۋاشىلىعى جارمەڭ­كەسىن جىبەرمەي كەلىپ تۇرامىن. قالا تۇر­عىندارى ءۇشىن قىزىلوردانىڭ برەن­دىنە اينالعان كۇرىش كەلىپ جاتىر. ماي مەن شۇبات تا الدىم. شۇباتتىڭ ءليترى 1000 تەڭگەدەن ەكەن. باعاسى وتە قول­جەتىمدى دەپ ويلايمىن. مۇندا قازا­لىنىڭ كامپيتتەرى, تاتتىلەرى جانە بالىق ونىمدەرى دە بار ەكەن. ارزان باعامەن قاۋىن-قاربىز دا الدىم. سونداي-اق كورمە ۇيىمداستىرىلىپ جاتىر. كورمەدە ۇسىنىلعان تاماقتىڭ ءدامىن تاتىپ كورىپ, ۇناسا الۋعا بولادى. بارلىعى حالىقتىڭ قامى ءۇشىن جاسالىپ جاتىر. نۇر-سۇلتان قالاسى اكىمدىگىنە تۇرعىنداردىڭ جاع­دايىن ويلاپ, وسىنداي جارمەڭكەلەر ۇيىمداستىرىپ جاتقاندارىنا العىسى­مىزدى بىلدىرەمىز», دەدى قالا تۇرعىنى اينۇر جۇماتاەۆا.

سونىمەن قاتار جارمەڭكەدە قىزىل­وردالىق ونەرپازدار اننەن شاشۋ شاشىپ, ەلوردالىقتارعا كوتەرىڭكى كوڭىل كۇي سىيلادى. جارمەڭكە اياسىندا قى­زىل­وردا وبلىسى اكىمدىگىنىڭ باستاما­سى­مەن قايىرىمدىلىق ءىس-شاراسى ۇيىم­داستىرىلىپ, كومەككە مۇقتاج وتبا­سىلارعا ازىق-ت ۇلىك سەبەتتەرىن تاراتتى.

«بۇگىنگى اكتسيا بويىنشا قىزىلوردا وبلىسىنان ازىق-ت ۇلىك تولتىرىلعان 80 سەبەت بەرىلدى. ونىڭ ىشىنە 10 كيلو كۇرىش, 2 كيلو ماكارون, 5 كيلو كارتوپ, 5 كيلو پياز, اسقاباق جانە قاۋىن 1 دانادان سالىندى. بۇل اكتسياعا سارىارقا اۋدانى اكىمدىگىنەن ۆولونتەرلەر قاتىستى. بارلىق ازىق-ت ۇلىك سەبەتى تۇرمىسى تومەن, الەۋمەتتىك وسال توپتاعى ءتيىستى ادام­­دارعا جەتكىزىلدى. بۇل اكتسيا نۇر-سۇلتان قالاسى اكىمدىگىنىڭ قولداۋىمەن ءوتىپ جاتىر. مەيلىنشە كوپ وتباسىنى قامتۋعا تىرىسۋدامىز. جارمەڭكە جوعارى دەڭگەيدە وتۋدە», دەدى قالالىق اكىم­دىكتىڭ وكىلى ەراسىل قايراتوۆ.