اتىراۋ وبلىسىندا جىل باسىنان بەرگى سەگىز ايدا 11 333 ءسابي دۇنيەگە كەلگەن. ونىڭ ىشىندە 114 ەگىز بار. بىلتىرعى وسى كەزەڭدە 109 ەگىز جارىق دۇنيە ەسىگىن اشقان. ال ۇشەمنىڭ ومىرگە كەلۋى بيىل العاش رەت تىركەلىپ وتىر.
ۇشەمنىڭ اناسى – ايانگۇل ءسابيتوۆا. ونىڭ وتباسىنداعى ءبىر بالانىڭ قاتارى ۇشەممەن تولىقتى. ءبىر قۇرساقتا جەتىلگەن ءۇش ۇلدىڭ ەكەۋىنىڭ سالماعى – 1 كيلو 800 گرامم, ءۇشىنشىسى – 2 كيلو 200 گرامم.
– قازىر جاس انانىڭ دا, نارەستەلەردىڭ دە جاعدايى جاقسارا باستادى. ۇشەم اناسىنىڭ قاسىنا جەتكىزىلدى. جاس اناعا نارەستەلەردى كۇتىپ-باعۋعا, ەم-دوم جاساۋعا ارنايى مەدبيكەلەر كومەكتەسەدى. سابيلەر پەرزەنتحانا دارىگەرلەرىنىڭ باقىلاۋىنا الىنىپ وتىر. ازىرگە ۇيگە قاشان شىعاتىنى بەلگىسىز, – دەيدى پەريناتالدى ورتالىق بولىمشەسىنىڭ مەڭگەرۋشىسى تۇرلەن بەگەەۆا.
جاس اناعا جۇكتىلىكتىڭ 34-اپتاسىندا كەسار تىلىگى ارقىلى وپەراتسيا جاسالعان. شۇعىل وپەراتسياعا ورتالىق ديرەكتورىنىڭ ورىنباسارى, اكۋشەر-گينەكولوگ اسقار كەنجەعاليەۆ جەتەكشىلىك ەتكەن.
اتىراۋ وبلىسى