ەلوردادا «جاستار» سارايىندا جۇمىسسىز ازاماتتار, پروباتسيا قىزمەتىنىڭ ەسەبىندە تۇرعان, باس بوستاندىعىنان ايىرۋ ورىندارىنان بوساتىلعان ادامدار جانە اليمەنت بويىنشا بورىشكەرلەر ءۇشىن جالپى قالالىق بوس ورىندار جارمەڭكەسى ءوتتى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
تۇرعىنداردىڭ جۇمىسقا ورنالاسۋىنا كومەكتەسۋ ءۇشىن ۇيىمداستىرىلعان جارمەڭكەگە 60-تان استام جۇمىس بەرۋشى قاتىستى.
جارمەڭكەگە ەلوردانىڭ 65 جۇمىس بەرۋشىسى قاتىسىپ, 1700-دەن اسا بوس جۇمىس ورنى ۇسىنىلدى. ونىڭ ىشىندە پروباتسيا قىزمەتى ەسەبىندەگىلەرگە جانە جازاسىن وتەپ كەلگەن جۇمىسسىز ازاماتتارعا دا جۇمىس ورىندارى ۇسىنىلدى. وندىرىستىك كومپانيالار, ساۋدا, قارجى, قۇرىلىس سالاسىنداعى مەكەمەلەر جۇمىس ىزدەپ جۇرگەن ازاماتتارعا اقپاراتتىق-ءتۇسىندىرۋ جۇمىستارىن جۇرگىزىپ, تۇيىندەمەلەرىن قابىلدادى.
«بۇگىنگى جارمەڭكەدە 1500-گە جۋىق جۇمىس ورنى ۇسىنىلدى. سونداي-اق مۇندا باس بوستاندىعىنان ايىرۋ ورىندارىنان بوساتىلعان جانە پروباتسيا قىزمەتىندە ەسەپتە تۇرعان ادامدارعا ارنالعان ۇسىنىستار بار ەكەنىن اتاپ وتكەن ءجون. بۇل جارمەڭكەدەگى جالاقى شامامەن 150 000 تەڭگەدەن 300 000 تەڭگەگە دەيىن», دەدى نۇر-سۇلتان قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ەرلان ءجۇسىپوۆ.
ءىس-شارادا وقۋ ورىندارىنىڭ تۇلەكتەرىنە, جاستارعا جانە جالپى ەلوردا تۇرعىندارىنا «العاشقى جۇمىس ورنى», «جاستار تاجىريبەسى», «قوعامدىق جۇمىستار», «ۇرپاقتار كەلىسىمشارتى» باعدارلامالارى جانە زەينەت جاسىنا دەيىنگى جۇمىسسىز ازاماتتار ءۇشىن «كۇمىس جاس» جوباسى بويىنشا كەڭىنەن اقپارات بەرىلىپ, ازاماتتارعا الەۋمەتتىك جۇمىس ورىندارى ۇسىنىلادى. جۇمىسپەن قامتۋ ورتالىعىنىڭ ماماندارى قىسقا مەرزىمدى كاسىبي وقۋعا قىزىعۋشىلىق تانىتقاندارعا دا تولىق اقپارات بەرەدى.
«جارمەڭكەگە ءۇشىنشى رەت قاتىسىپ وتىرمىز. بۇل ءار جۇمىس بەرۋشىگە قاجەتتى قىزمەتكەردى تابۋعا كومەكتەسەدى. ماسەلەن قازىرگى ۋاقىتتا بىزگە كەڭەسشىلەر قاجەت. ولار كليەنتتەردى ىزدەۋ, دەپوزيتتەر اشۋمەن اينالىسادى», دەدى «وتباسى بانكىنىڭ» وكىلى اسقار راحىمباەۆ.
جارمەڭكە ارقىلى جۇمىس تابۋعا نيەتتى ازاماتتاردىڭ بىرقاتارى ەڭبەككە ەندى ارالاساتىن جاس ماماندار بولسا, ەندى ءبىرى وزدەرىنە ىڭعايلى جۇمىس ورنىن تابۋدى كوزدەيدى. سولاردىڭ ءبىرى – ەلورداداعى وقۋ ورىندارىنىڭ بىرىندە ماگيستراتۋرادا ءبىلىم الىپ جاتقان سۇلتان تۇراپباي دا جارمەڭكەدەن جۇمىس تابۋعا ءۇمىتتى.
«قازىرگى كەزدە ماگيستراتۋرادا ءبىلىم الىپ ءجۇرمىن. بىراق وقۋمەن قاتار جۇمىس ىستەگىم كەلەدى. مۇندا جۇمىس بەرۋشىلەر وتە كوپ. سولاردىڭ ىشىندە وزىمە قاجەتتى جۇمىستى تابامىن دەگەن ويدامىن», دەدى سۇلتان تۇراپباي.
ايتا كەتەيىك, نۇر-سۇلتان قالاسىندا جىلدىڭ سوڭىنا دەيىن 28 مىڭ جاڭا جۇمىس ورنى قۇرىلادى. بوس جۇمىس ورىندارى جارمەڭكەسىنىڭ ماقساتى – جۇمىس بەرۋشىلەر مالىمدەگەن ازاماتتاردى بوس جۇمىس ورىندارىنا ورنالاستىرۋ. قالالىق حالىقتى جۇمىسپەن قامتۋ ورتالىعىنىڭ مالىمەتىنشە جىل سوڭىنا دەيىن ءالى وسىنداي 6 بوس جۇمىس ورىندار جارمەڭكەسى وتەدى.