ۇكىمەت باسشىسىنىڭ ورىنباسارى گۇلشارا ءابدىحالىقوۆا باستاعان دەلەگاتسيا شىعىس قازاقستان وبلىسىنا جۇمىس ساپارىمەن كەلدى. ءبىلىم جانە عىلىم ءمينيسترى اسلان ءسارىنجىپوۆ, ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا جانە پارلامەنت دەپۋتاتتارى بار دەلەگاتسيا وڭىردەگى بىرقاتار كاسىپورىندار مەن كوللەدجدەردە, مەكتەپتەردە, بالالار شىعارماشىلىعى سارايىندا, ەتنواۋىلدا بولىپ, «التاي» تەحنوپاركىندە وتكەن «تەحنيكالىق جانە كاسىپتىك ءبىلىم بەرۋگە دۋالدى وقىتۋ جۇيەسىن ەنگىزۋ جۇمىسىنىڭ تاجىريبەسى» اتتى ءىىى رەسپۋبليكالىق فورۋمعا قاتىستى.
الدىمەن «ازيا-اۆتو» كاسىپورنىندا بولعان ۇكىمەت مۇشەلەرى دۋالدى وقىتۋ جۇيەسى بويىنشا كاسىپتىك ءبىلىم بەرەتىن وقۋ ورىندارىمەن بايلانىسقا نازار اۋداردى. وتكەن جىلى كاسىپتىك-تەحنيكالىق وقۋ ورنىنىڭ 200-دەن استام تۇلەگى زاۋىتقا جۇمىسقا ورنالاسقان. قازىر 42 جاس وندىرىستىك تاجىريبەدەن وتۋدە. ال جالپى ءبىلىم بەرەتىن №11 مەكتەپتە كاسىپتىك باعدار ءپانى 1-سىنىپتان باستاپ جۇرگىزىلەدى.
ۆيتسە-پرەمەر گ.ابدىحالىقوۆا ەلباسى ن.نازارباەۆتىڭ قازاقستان حالقىنا جولداۋىندا دۋالدى ءبىلىم بەرۋگە ايرىقشا نازار اۋدارىپ, ەل ەكونوميكاسىنا ساپالى ماماندار دايارلاۋ مىندەتتەگەنىن اتاپ ءوتتى. گ.ابدىحالىقوۆانىڭ ايتۋىنشا, الداعى ۋاقىتتا دۋالدى وقۋ 50 پايىزعا دەيىن ارتىپ, مامانداردى وندىرىستە كوبىرەك وقىتۋعا ءمان بەرىلەتىن بولادى.
جالپى, شىعىس قازاقستاندا دۋالدى وقىتۋ تاجىريبەسى ەكى جىل بۇرىن قولعا الىنعان. مۇنى وڭىردەگى كوللەدج شاكىرتتەرىنىڭ ءوندىرىس ورىندارىنا كوپتەپ جۇمىسقا الىنۋىنان بايقاۋعا بولادى. ماسەلەن, كوپ سالالى تەحنولوگيالار كوللەدجى «جول كارتاسى-2020» باعدارلاماسى بويىنشا سوڭعى بەس جىلدا 1079 مامان دايارلاعان. قۇرىلىس كوللەدجىنىڭ ستۋدەنتتەرى سوڭعى وقۋ كۋرسىن وندىرىستە وتكىزۋدە. بىلتىر بارلىق تۇلەكتىڭ 82 پايىزى جۇمىسقا ورنالاسقان. كاسىپتىك ءبىلىم العان جاستار «كەمونت», «پرومتەحمونتاج», «ازيا-اۆتو», «ۆوستوكپرومەلەكترومونتاج» كاسىپورىندارىندا جۇمىس ىستەپ ءجۇر. اتالعان وقۋ ورنىندا گەرمانيالىق اگەنتتىكپەن بىرلەسكەن باعدارلاما جۇزەگە اسىرىلۋدا.
ءبىلىم جانە عىلىم ءمينيسترى ا.ءسارىنجىپوۆ شىعىس قازاقستاننىڭ دۋالدى وقىتۋ جۇيەسىندە مول تاجىريبەسى بار ەكەنىن, ونى وزگە وڭىرلەرگە ەنگىزۋ جوسپارلانىپ وتىرعانىن جەتكىزدى. ال ەڭبەك جانە حالىقتى الەۋمەتتىك قورعاۋ ءمينيسترى ت.دۇيسەنوۆا وسكەمەندەگى تىرەك قيمىلىندا كەمىستىگى بار بالالارعا ارنالعان وڭالتۋ ورتالىعىندا بولىپ, ۇكىمەتتىك ەمەس ۇيىمداردىڭ وكىلدەرىمەن جۇزدەستى. كەزدەسۋ بارىسىندا مينيستر كەمباعال جانداردىڭ قۇقىعىن قورعاۋعا باعىتتالعان زاڭنامانى جەتىلدىرۋ, ولاردى وقىتۋ, جۇمىسقا ورنالاستىرۋ ماسەلەلەرى بويىنشا ساۋالدارعا جاۋاپ بەردى. مۇگەدەكتەردى وقىتۋ-وندىرىستىك كومبيناتى قاناتقاقتى جوباسىن قولدايتىنىن بىلدىرگەن مينيستر شىعىستىڭ مۇمكىندىگى شەكتەۋلى جاندارعا قامقورلىق جاساۋدا جەتەكشى وڭىرگە اينالعانىن اتاپ ءوتتى.
«التاي» تەحنوپاركىندە وتكەن رەسپۋبليكالىق فورۋمدا تەحنيكالىق جانە كاسىپتىك ءبىلىم بەرۋدىڭ شىعىسقازاقستاندىق ۇلگىسى تۋرالى بىرقاتار جوبالار نازارعا ۇسىنىلدى.
– يندۋستريالاندىرۋدىڭ جۇزەگە اسىرىلۋى الدىمەن ونەركاسىپ ورىندارىنا بايلانىستى دەسەك, كاسىپورىنداردىڭ دامۋى تەحنيكالىق جانە كاسىپتىك ءبىلىمى بار بىلىكتى ماماندارعا تاۋەلدى. ايتالىق, اۆستريا, بەلگيا, نيدەرلاندىدا وقۋشىلاردىڭ 70 پايىزى جۇمىسشى ماماندىعىن مەڭگەرەتىن بولسا, گەرمانيا, شۆەيتساريا, نورۆەگيا, شۆەتسيا ەلدەرىندە بۇل كورسەتكىش 60 پايىزدى قۇرايدى. ياعني, دامىعان ەۋروپالىق مەملەكەتتەردە جۇمىسشى ماماندىقتارىنا كوڭىل بولىنەدى. ال ەلىمىزدە كاسىپتىك-تەحنيكالىق ماماندىقتاردى تاڭداۋشىلار قاتارى 10 پايىزدان ارەڭ اسادى. سوندىقتان دۋالدى وقىتۋ جۇيەسىن ەنگىزۋ بويىنشا قاناتقاقتى جوبانى ساتىمەن جۇرگىزگەن شىعىس قازاقستان وبلىسىنىڭ ءتاجىريبەسىن نەگىزگە الا وتىرىپ, پروبلەمانى شەشۋگە كىرىسۋىمىز قاجەت, – دەدى پرەمەر-ءمينيستردىڭ ورىنباسارى.
پرەزيدەنت تاپسىرماسىنا سايكەس, وقىتۋدىڭ دۋالدى جۇيەسىن ەنگىزۋدىڭ ۇلتتىق مودەلىن قالىپتاستىرۋ مەن مەملەكەت ەكونوميكاسىنىڭ يننوۆاتسياسىنا بىلىكتى كادرلار دايارلاۋدىڭ ماڭىزدىلىعىنا توقتالعان ايماق باسشىسى ب. ساپارباەۆ بۇل فورۋم كەيىنگى ەكى جىلدا وبلىستا قولعا الىنعان وقىتۋدىڭ دۋالدى جۇيەسىن ەنگىزۋ بويىنشا قاناتقاقتى جوبانىڭ ناتيجەلى جۇزەگە اسىرىلۋىنا ىقپال ەتىپ, ونەركاسىپ پەن وقۋ ورىندارىنىڭ اراسىنداعى بايلانىستى نىعايتا تۇسۋگە قوسىمشا سەرپىن بەرەدى دەگەن سەنىمدەمىز, دەدى.
فورۋم بارىسىندا ەڭبەك جانە حالىقتى الەۋمەتتىك قورعاۋ ءمينيسترى ت.دۇيسەنوۆا, ءبىلىم جانە عىلىم ءمينيسترى ا.ءسارىنجىپوۆ بايانداما جاساپ, تاقىرىپتى تارقاتا ءتۇستى. ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى ن.التاەۆ كادر دايارلاۋداعى مەملەكەت پەن بيزنەستىڭ ءوزارا قارىس-قاتىناسىن دامىتۋدىڭ بولاشاعى, سەرەبريانكا تەحنولوگيالىق كوللەدجى ديرەكتورىنىڭ مىندەتىن اتقارۋشى و.انتونەنكو «بۇقتىرما تسەمەنت كومپانياسى» قازاقستان-گەرمانيا بىرلەسكەن كاسىپورنىمەن دۋالدى وقىتۋ جۇيەسىن جۇزەگە اسىرۋ تۋرالى جۇمىستارىن جەتكىزدى. شەتەلدىك ساراپشىلار دا دۋالدى وقىتۋ جۇيەسىنىڭ زاماناۋي ەرەكشەلىكتەرىن اتاپ ءوتتى. ولاردىڭ قاتارىندا TVET UK اتقارۋشى ديرەكتورى مەتيۋ اندەرسون, GIZ قازاقستانداعى وكىلدىگىنىڭ جەتەكشىسى راينەر گەرتتس, رەسەيدىڭ پەتروزاۆودسك قالاسىنداعى بيۋدجەتتىك مونيتورينگ ورتالىعى ديرەكتورىنىڭ ورىنباسارى سۆەتلانا سيگوۆا بار.
دۋمان اناش,
«ەگەمەن قازاقستان».
شىعىس قازاقستان وبلىسى.