اۋليەكول اۋدانىنداعى ءىرى ورمان ءورتى اۋىزدىقتالدى

«2022 جىلعى 10 قىركۇيەكتە ساعات 10:00-دە قوستاناي وبلىسى اۋليەكول اۋدانىنداعى ورمان ءورتى ءسوندىرىلدى. بۇعان دەيىن 7 قىركۇيەك كۇنى ساعات 15:00-دە لوكاليزاتسيا جاريالانعان بولاتىن», دەلىنگەن ءباسپاسوز قىزمەتىندە.

ءورت 2 قىركۇيەك كۇنى ساعات 15:10-دا اۋليەكول اۋدانىنا قاراستى باسامان جانە سەميوزەرنىي ورمان شارۋاشىلىعى بولىمدەرىنىڭ اۋماقتارىندا باستالعان.

ء«ورت باستالعاننان بەرى جالپى اۋماق 43 مىڭ گەكتاردى قۇرايدى. ءورت ەكى ەلدى مەكەندەگى 91 ءۇيدى شارپىدى.

ءورت كەزىندە 12 ادام دەنە جاراقاتىن العان, كۇيىك شالعان, جەڭىل جانە ورتاشا دارەجەدە ۋلانعان. زارداپ شەككەن 3 ادام اۋليەكول اۋداندىق اۋرۋحاناسىندا جاتىر», دەپ حابارلادى تجد.

جەدەل شتاب جۇمىسى باستاعالى توتەنشە جاعدايلار مينيسترلىگىنىڭ سەنىم تەلەفونىنا 38 قوڭىراۋ تۇسكەن. 87 ازاماتقا كەڭەستىك-پسيحولوگيالىق كومەك كورسەتىلدى, 45 بالاعا توپتىق پسيحولوگيالىق جۇمىستار جۇرگىزىلدى. اۋە كەمەلەرىمەن ءورت سوندىرۋگە بارلىعى 327 سۋ توگۋ جۇمىستارى جۇرگىزىلدى.

ءورتتى سوندىرۋگە قاتىسقان كۇشتەر مەن قۇرالداردىڭ جالپى توپتاماسى 207 بىرلىك تەحنيكا مەن 1785 ادامدى قۇرادى. باسامان جانە سەميوزەرنىي ورمان شارۋاشىلىعى بولىمشەلەرىنىڭ ورمان شارۋاشىلىعىنىڭ 73 ادامنان جانە 21 تەحنيكادان تۇراتىن كۇشتەرى مەن قۇرالدارى ورنىندا قالدى. جەدەل شتاب ءوز جۇمىسىن اياقتادى.