سانامەن سارالاپ قاراساڭىز, كەز كەلگەن ماماندىقتىڭ كەمشىلىگى جوق. وزىڭە جانە قوعامعا پايدالى بولسا بولعانى. ەكاتەرينا گلۋشكوۆا – وبلىستاعى ايەلدەر اراسىنان شىققان جالعىز ەلەكتر مونتەرى.
كەيدە ءبىر بيىك باعانانىڭ باسىنا شىعىپ, ەلەكتر سىمدارىن جالعاپ جاتقان ەلەكتر مونتەرلەرىن كورەسىز. كوز كورگەنمەن, كوڭىل توقتاي بەرمەيدى. ۇيرەنشىكتى دۇنيە ەسەبىندەگى جايت. تۇپتەپ كەلگەندە, قيىندىعى دا از ەمەس. ارنايى رۇقسات كەرەك. ماماندىقتى يگەرۋ ءۇشىن كاسىبي شەبەرلىك قانا ەمەس, ەرىك-جىگەر دە قاجەت بولاتىن بولار. ءسىز بەن ءبىز كورگەن باعانا باسىنا شىعاتىن ەلەكتر مونتەرلەرى نەگىزىنەن ەر ادامدار. ال بويجەتكەندەر سيرەك. ءتىپتى جوق بولۋى دا ىقتيمال.
ەكاتەرينا ۆلاديميروۆنا قاراعاندى وبلىسىنىڭ تۋماسى ەكەن. سويلەسكەن كەزىمىزدە بيىكتىككە دەگەن قۇشتارلىقتىڭ بويىندا بالا جاسىنان بار ەكەنىن ايتادى. بالكىم, وسى ءبىر باتىلدىق اتا-اناسىنان جۇققان بولۋى كەرەك. اناسى ليليا لەونوۆنا – قۇرىلىس جانە كوپىر كراندارىنىڭ ءماشينيسى. بەينەلەپ ايتقاندا, قۇس قاناتى تالاتىن بيىككە شىعىپ, ءزاۋلىم ۇيلەردىڭ قۇرىلىسىن جۇرگىزىپ, ارقالىعى اسپان تىرەگەن كوپىرلەردى سالۋعا ۇلەس قوستى. 1987 جىلى «ەلەكتر مونتەرى» ماماندىعىن يگەرىپ, قاراعاندىداعى اقجال كەنتىندەگى پودستانساعا كەزەكشى ەلەكتر مونتەرى بولىپ ورنالاسادى. ال اكەسى ۆلاديمير پەتروۆيچ اۋە كۇشتەرى بولىمىندە قىزمەت اتقارعان. جورگەگىنەن دەمەسەك تە, ەس بىلگەلى اتا-اناسىنىڭ ماماندىقتارىنىڭ قىر-سىرىن جانىنا جاقىن تۇتىپ وسكەن قىز ششۋچينسك جوعارى تەحنيكالىق كوللەدجىنە وقۋعا ءتۇسىپ, 2014 جىلى ەلەكتر مەحانيگى ماماندىعىن الىپ شىققان. ءتىپتى ورتا ارناۋلى وقۋ ورنىندا وقىپ ءجۇرىپ, «ساناتورنايا» پودستانساسىندا كەزەكشى ەلەكتر مونتەرى بولىپ ەڭبەك ەتتى. ارادا ەكى جىل وتكەن سوڭ ششۋچينسك قالالىق ەلەكتر جەلىلەرى كاسىپورنىنا ورالىپ, ماماندىعى بويىنشا جۇمىس ىستەيدى. بيىكتىكتە جۇمىس ىستەۋ جونىندەگى سىناقتان مۇدىرمەي وتكەن.
– ارينە, جۇرەك قوبالجيتىن تۇستارى دا بولادى, – دەيدى ەكاتەرينا ۆلاديميروۆنا. – ەڭ باستىسى, ءوزىڭنىڭ قولىڭنان كەلەتىنىنە كامىل سەنۋىڭ كەرەك. قازىر مەن ءۇشىن ۇيرەنشىكتى جاعداي ءتارىزدى. توسىننان كورگەن تالايلاردىڭ تاڭىرقاي قاراعانى قىزىق بولىپ كورىنەدى. ەگەر مەنەن «وسى ماماندىقتى قالاي قالادىڭ؟» دەپ سۇراسا, «مەنىڭ انام – ەنەرگەتيك» دەپ ماقتانىشپەن جاۋاپ بەرەمىن.
بيىك باعانانىڭ باسىندا باتىل بويجەتكەن جۇمىس ىستەپ جاتقاندا, جەردەگى ارىپتەستەرى قۇرمەتى مەن قوشەمەتىن ايامايدى. ءوزىنىڭ ايتۋىنا قاراعاندا, جۇمىستان قولى قالت ەتسە, تابيعات اياسىندا بولعاندى جاقسى كورەدى. ال الپينيزممەن اينالىسۋ – ارمانى. تاۋ-تاستى ارالاپ, بيىككە شىققان قانداي جاقسى!
– بۋرابايدىڭ بيىگىنەن قاراعاندا, كوز جەتەر جەر تۇپ-تۋرا الاقانىڭداعىداي كورىنەرى بار, – دەيدى ەكاتەرينا گلۋشكوۆا. اتتەڭ ۋاقىت تاپشى. سوندا دا وقجەتپەستىڭ وڭ يىعىنان كوركەم دالاعا كوز سالامىن. وسى كوگىلدىر مۇنارعا مالىنىپ, كوز ۇشىندا كوك ساعىم وينايتىن كوكپەڭبەك دالا كوسىلىپ جاتقاندا كوكىرەگىڭە تۋعان جەرگە دەگەن سۇيىسپەنشىلىك سەزىمى قۇيىلادى. ءبىز ەلەكتر جەلىلەرىنىڭ مۇلتىكسىز جۇمىس ىستەۋىن قامتاماسىز ەتىپ, عاجايىپ ولكەنىڭ شامىن جاعىپ ءجۇرمىز. ودان ارتىق قۋانىش بولار ما؟!
ششۋچينسك قالالىق ەلەكتر جەلىلەرى كاسىپورنىندا كەيىپكەرىمىزدى «بيىكتىكتەن قورىقپايتىن بويجەتكەن» دەپ اتايدى. ءبىر اۋىز ءسوزدىڭ استارىندا قۇرمەت پەن قوشەمەت بوگىپ جاتقانداي. ايتسا ايتقانداي-اق قوي!
اقمولا وبلىسى,
بۋراباي اۋدانى