اقتاۋ. 14 مامىر ماڭعىستاۋ وبلىسىنىڭ ورتالىعىنداعى 22-شاعىن اۋداندا 12 مامىر كۇنى كەشكى ساعات 20.00 شاماسىندا 8 جاسار ۇلدى بەلگىسىز بىرەۋ پنەۆماتيكالىق قارۋمەن اتىپ كەتتى. بۇل تۋرالى egemen.kz ءتىلشىسى حابارلادى.
كەۋدە تۇسىنان اۋىر جاراقات العان بالا وبلىستىق اۋرۋحانانىڭ جانساقتاۋ بولىمىنە جەتكىزىلىپ, ءبىر جارىم ساعاتقا سوزىلعان كۇردەلى وتادان سوڭ امان-ساۋ قالدى. قازىر اۋرۋحانانىڭ حيرۋرگيا بولىمىنە اۋىستىرىلدى.
ال پوليتسەيلەردىڭ قىلمىسكەردى شۇعىل ىزدەستىرۋ شارالارى ازىرگە ناتيجە بەرەر ەمەس. وبلىستىق ىشكى ىستەر دەپارتامەتىنىڭ ءباسپاسوز حاتشىسى ءا.شەرماعانبەتوۆانىڭ حابارلاۋىنشا, وقيعاعا قاتىستى قىلمىستىق كودەكستىڭ 257-بابى 3-بولىگىنە ساي قىلمىستىق ءىس قوزعالىپ, بالليستيكالىق ساراپتاما تاعايىندالعان.
وق كورشى ءۇيدىڭ بالكونىنان اتىلعان بولۋى مۇمكىن دەپ جورامال جاساپ وتىرعان پوليتسەيلەر بالليستيكالىق ساراپتاما قورىتىندىسىنان ناتيجە كۇتەدى. ال زارەزاپ بولعان تۇرعىندار 8 جاسار ۇلدىڭ العاشقى جاپا شەگۋشى ەمەس ەكەنىن, سوڭعى ءۇش اپتادا ءۇش ادامنىڭ وق ءتيىپ, جاراقات العانىن, بىراق ولاردىڭ قۇقىق قورعاۋ ورىندارىنا حابارلاسپاعاندىعىن ايتۋدا.
گۇلايىم شىنتەمىرقىزى.
دەرەككوز: egemen.kz.
فوتو: lada.kz.