زاماناۋي قوندىرعى كلينيكالىق اۋرۋحانا مۇمكىندىگىن ارتتىرا ءتۇستى

ايتا كەتۋ كەرەك, اتالعان زاماناۋي دياگنوستيكالىق كابينەتتىڭ اشىلۋ سالتاناتىنا ۇلتتىق نەيروحيرۋرگيا ورتالىعىنىڭ پرەزيدەنتى سەرىك اقشولاقوۆتىڭ ءوزى كەلىپ قاتىستى.

رەسمي دەرەكتەرگە سۇيەنسەك, شىمكەنت قالاسىندا سوڭعى 3 جىلدا مەديتسينالىق ۇيىمداردىڭ ماتەريالدىق تەحنيكالىق بازاسىن نىعايتۋعا 13,9 ملرد تەڭگە قاراجات بولىنگەن. ال قاجەتتى قۇرال-جابدىقتارمەن قامتۋ كورسەتكىشى 79,2 پايىزعا جەتكەن. بۇعان دەيىن اتالعان انگيوگرافيالىق اپپارات قالالىق №2 اۋرۋحاناعا, قالالىق كلينيكالىق بالالار اۋرۋحاناسىنا جانە ونكولوگيالىق ورتالىققا ورناتىلعان ەدى. وسىلايشا, مەگاپوليستە حالىققا جوعارى مامانداندىرىلعان مەديتسينالىق كومەكتىڭ قولجەتىمدىلىگى ءبىرشاما ارتا ءتۇستى. وسىنداي زاماناۋي اپپاراتتاردىڭ كومەگىمەن مەديتسينا قىزمەتكەرلەرى وزدەرىنە جۇكتەلگەن مىندەتتى ابىرويمەن اتقارىپ كەلەدى.

ەندى جاڭا اپپارات ارقىلى قالالىق №1كلينيكالىق اۋرۋحانادا باس مي تامىرىنا, باستاعى ىسىككە جانە ينسۋلت العان ناۋقاستارعا جوعارى تەحنولوگيالىق وپەراتسيالار جاسالادى. ءوز كەزەگىندە جاڭا انگيوگرافيالىق قوندىرعى وسى اپپاراتتىڭ سوڭعى ۇلگىسى بولىپ سانالادى, ال باعاسىنا كەلسەك, ونىڭ قۇنى 1 ملرد تەڭگەگە جۋىقتايدى. بۇل مەديتسينالىق قۇرالدىڭ ءبىر ەرەكشەلىگى, ەكى دەتەكتوردى ءبىر ۋاقىتتا قولدانۋ ارقىلى نەيروحيرۋرگيالىق جانە ينتەرۆەنتسيالىق وپەراتسيالاردى جاساۋعا, تامىرلاردى 3D كەسكىنىندە تەكسەرۋگە, وپەراتسيانىڭ بارىسىندا كومپيۋتەرلىك توموگرافيا جاساۋعا مۇمكىندىك بەرەدى, دەيدى ماماندار. سونىمەن قاتار اتالعان كلينيكادا ەلىمىزدىڭ رەسپۋبليكالىق مەديتسينالىق ورتالىقتارى مەن شەتەل ماماندارىن تارتا وتىرىپ, ونلاين شەبەرلىك ساعاتتارىن وتكىزۋ جوسپاردا بار. تەك قالانىڭ عانا ەمەس, مەگاپوليسكە جاقىن اۋىل-ايماقتىڭ ناۋقاستارىنا دا مەديتسينالىق كومەك كورسەتۋدىڭ مۇمكىندىگى تۋىپ وتىر.

بۇدان بولەك, مەگاپوليس مەديتسيناسىنا قاتىستى تاعى ءبىر ايرىقشا اتاپ وتەرلىك وقيعانىڭ ءبىرى – شىمكەنتتەن اشىلعان ەرەكشە بالالارعا ارنالعان مامانداندىرىلعان ستوماتولوگيالىق كابينەتى.

بۇل كابينەتتە دارىگەرلەر تسەرەبرالدى سال اۋرۋىنا شالدىققان جانە باسقا دا مۇمكىندىگى شەكتەۋلى بالالاردىڭ اۋىز قۋىسى مەن ءتىسىن ارنايى ادىسپەن نەمەسە ناركوز بەرۋ ارقىلى جەڭىل تۇردە ەمدەيدى.

ءوز كەزەگىندە اسار شاعىن اۋدانىنداعى بالالار اۋرۋحاناسىنان اشىلعان ستوماتولو­گيالىق كابينەتتە دە اق جەلەڭدى ماماندار كىشكەنتاي ناۋقاستاردى تەگىن قابىلدايدى. ول ءۇشىن پاتسيەنت جەرگىلىكتى ەمحانادان جولداما الىپ كەلۋى قاجەت. ستوماتولوگيالىق كابينەتتە ءتىستى ەمدەۋمەن قاتار اۋىز قۋىسىنا دياگنوستيكالىق تەكسەرۋ جۇرگىزىلىپ, ءتيىستى ەم-دوم تاعايىندالادى. كابينەت رەنتگەن, ناركوز اپپاراتى سىندى قاجەتتى جابدىقتارمەن قامتاماسىز ەتىلگەن.

وسى تاقىرىپقا قاتىستى تاعى ءبىر تىڭ جاڭالىق – شىمكەنت قالالىق ستوماتو­لوگيالىق ەمحاناسىندا تۇنگى ۋاقىتتا دا قىزمەت كورسەتەتىن كابينەتتەر سانى ءوسىپ كەلەدى. وندا ءتىس دارىگەرلەرى كۇندىز جانە كەشكى 20:00-دەن تاڭعى 08.00-گە دەيىن تۇنگى اۋىسىممەن جۇمىس ىستەيدى.

كۇندىز بالالارعا 17 تەراپەۆتىك جانە 4 حيرۋرگيالىق كابينەتتە قىزمەت كورسەتىلسە, تۇنگى اۋىسىمدا 3 دارىگەر مەن 2 مەدبيكە ءتىسى اۋىرعان ناۋقاستاردى قابىلدايدى.

ەمحانا دارىگەرلەرىنىڭ ايتۋىنشا, تۇنگى اۋىسىمدا ءبىر كۇندە ورتا ەسەپپەن 17-25 بالا ەم الۋعا كەلەدى ەكەن. ال كۇندىز بالا سانى 500-600-گە دەيىن بارادى. بۇعان دەيىن تەك ءبىر كابينەت جۇمىس ىستەپ كەلگەن. سودان ەمدەلۋشىلەر ۇزاق ۋاقىت كەزەككە تۇرۋعا ءماجبۇر بولعان. اتالعان كەمشىلىكتى جويۋ ماقساتىندا شىمكەنت قالالىق دەنساۋلىق ساقتاۋ باسقارماسى تاراپىنان ناقتى شارا قولعا الىنىپ, سونىڭ ناتيجەسىندە تۇنگى اۋىسىمدا جۇمىس ىستەيتىن قوسىمشا ەكى كابينەت ىسكە قوسىلدى.

شىمكەنت