وسى جىلدىڭ 2 قىركۇيەگىندە تۇركىستان قالالىق سوتى قالا اكىمدىگىنىڭ ينفراقۇرىلىم جانە كوممۋنيكاتسيالار ءبولىمى باسشىسىنىڭ ورىنباسارى نۇرلان جامانكوز بەن سول ءبولىمنىڭ باس مامان-بۋحگالتەرى سالتانات ماتيباەۆاعا قاتىستى ايىپتاۋ ۇكىمىن شىعاردى, دەپ حابارلايدى Egemen.kz.
سوت ۇكىمى بويىنشا ن.جامانكوزگە 73,8 ميلليون تەڭگە كولەمىندە ايىپپۇل سالىندى, ال س.ماتيباەۆا 7 جىلعا باس بوستاندىعىنان ايىرىلدى. سوتتالعاندار مەملەكەتتىك قىزمەتتە قىزمەت اتقارۋ قۇقىعىنان ايىرىلدى.
«ايىپتالۋشىلار تۇركىستان قالاسىنىڭ وتىرار شاعىناۋدانىندا سىرتقى جەلىلەردى توسەۋ بويىنشا ورىندالعان جۇمىستاردىڭ اكتىلەرىنە قول قويعانى ءۇشىن ادامدار توبىنىڭ الدىن-الا ءسوز بايلاسۋىمەن جشس وكىلىنەن 1,1 ميلليون تەڭگە سوماسىندا پارا العانى ءۇشىن كىنالى دەپ تانىلدى», دەلىنگەن سىبايلاس جەمقورلىققا قارسى ءىس-قيمىل اگەنتتىگىنىڭ وبلىستىق دەپارتامەنتى تاراتقان حابارلامادا.
س.ماتيباەۆاعا قاتىستى سوت ۇكىمنىڭ ورىندالۋى قر قك 74 - بابىنا سايكەس, كامەلەت جاسىنا تولماعان بالالارىنىڭ بولۋىنا بايلانىستى 5 جىلعا دەيىن كەيىنگە قالدىرىلدى.
ۇكىم زاڭدى كۇشىنە ەنگەن جوق.