«قازاقستان بارىسى» ءتۋرنيرىنىڭ ءتورتىنشى ماۋسىمىنا ىرىكتەۋ جالعاسۋدا. جاقىندا قىزىلوردا وبلىسىنان فينالعا جولداما العان بالۋاندار انىقتالدى. بۇل تۋرالى egemen.kz ءتىلشىسى حابارلادى.
قىزىلوردا وبلىسىنان بيىلعى ءتۋرنيردىڭ فينالدىق كەزەڭىنە رۋسلان ابدىرازاقوۆ پەن ايبەك سەرىكباەۆ قاتىسادى. قازىر ەكەۋى دە دايىندىقتى باستاپ كەتتى. رۋسلان بيىلعى ىرىكتەۋ تۋرنيرىندە بابىندا ەكەنىن كورسەتتى. ەندى ول فينالدىق سىندا باپ پەن باق كەلىسسە دەيدى. ال ونىڭ باۋىرى 2011 جىلعى «قازاقستان بارىسى» ۇلان رىسقۇل جاراقاتىنىڭ كەسىرىنەن بيىلعى ىرىكتەۋدەن وتە المادى.
بيىلعى ىرىكتەۋ تۋرنيرىندە قىزىلوردا وبلىسى بالۋاندارعا بار جاعدايدى جاسادى. ال وبلىستىق جارىستىڭ سوڭىندا جەڭىمپاز بالۋاندارعا ءتىپتى, اقشالاي سىياقى دا تابىس ەتتى. وبلىس باسشىلىعى ءبىرىنشى ورىن العان رۋسلان ابدىرازاقوۆقا 1 550 000 تەڭگە, ايبەك سەرىكباەۆقا 850 000 تەڭگەنى ۇستاتتى. بۇل ەكەۋى دە «قازاقستان بارىسىنىڭ» فينالىنا ەكىنشى رەت قاتىسقالى وتىر.
-جەڭىسكە جەتكەنىم ءۇشىن قۋانىشتىمىن. بۇل جەڭىس ماعان وڭاي كەلگەن جوق. ءبىر جىل بۇرىنعى جاراقاتىم ءالى تولىقتاي جازىلا قويعا جوق. ءالى كۇنگە دەيىن سىر بەرىپ تۇرادى. بىراق, بيىل مەنى ەشتەڭە دە توقتاتپايدى. قۇداي قالاسا, بار كۇشىمدى سالىپ چەمپيون اتانعىم كەلەدى, - دەيدى رۋسلان.
رۋسلان ابدىرازاقوۆتىڭ لاقاپ اتى - «سىر بارىسى».
بويى: 197 سم.
سالماعى: 117 كگ.
تۋعان جىلى: 1988 جىل.
سپورتتىق اتاعى: قازاق كۇرەسىنەن سپورت شەبەرى.
جاتتىقتىرۋشىسى: سادىق مۇستافاەۆ.
ال سىر وڭىرىنەن فينالدىق سىنعا قاتىساتى ەكىنشى بالۋان – ايبەك سەرىكباەۆتىڭ لاقاپ اتى - «سىر ارلانى». ونىڭ بويى 190 سم, سالماعى 103 كگ. ايبەك 1993 جىلى تۋعان. قازاق كۇرەسىنەن سپورت شەبەرى, جاتتىقتىرۋشىسى - ادىلبەك سەرىكباەۆ.
داستان كەنجالين.
دەرەككوز: «قازاقستان بارىسى» قازاق كۇرەسىن دامىتۋ قورىنىڭ ءباسپاسوز قىزمەتى.
فوتو: قازاقستان بارىسى» قازاق كۇرەسىن دامىتۋ قورىنىڭ ءباسپاسوز قىزمەتى.