بيىلعى بالالار جىلىنا وراي ۇلتتىق مۋزەيدە «مۋزەيدەگى مەكتەپ كۇنى» مادەني-ءبىلىم بەرۋ جوباسى تانىستىرىلدى. اتالعان جوبا مۋزەي جادىگەرلەرى مەن كوللەكتسيالارىن پايدالانا وتىرىپ, 5-9 سىنىپ وقۋشىلارىنىڭ قوعامدىق-گۋمانيتارلىق پاندەر (قازاقستان تاريحى, دۇنيەجۇزى تاريحى, ولكەتانۋ جانە ت.ب.) بويىنشا تەوريالىق ءبىلىمىن پراكتيكا جۇزىندە بەكىتۋگە باعىتتالعان. يگى باستامانىڭ تانىستىرىلىمىنا مادەنيەت جانە سپورت ءمينيسترى داۋرەن اباەۆ قاتىستى.
«بۇگىندە وسكەلەڭ ۇرپاقتىڭ كەلەشەگىن قامتاماسىز ەتۋ, ۇلت ساپاسىن جاقسارتۋ – ايرىقشا ماڭىزعا يە. 2022 جىل پرەزيدەنت قاسىم-جومارت توقاەۆتىڭ جارلىعىمەن بالالار جىلى دەپ جاريالاندى. وسى رەتتە ۆەدومستۆو ايتۋلى مەرەكەگە وراي ورتا ءبىلىم بەرەتىن مەكتەپتەردىڭ وقۋشىلارى مەن تاريح ءپانى مۇعالىمدەرى ءۇشىن «مۋزەيدەگى مەكتەپ كۇنى» جاڭا جوباسىن ۇسىنىپ وتىر. جوبانىڭ اتى ايتىپ تۇرعانداي, جاس جەتكىنشەكتەرىمىز مەكتەپتەگى جوسپارلى ساباقتارىنان بولەك, سان تاراۋ تاريحقا مۇراجاي ارقىلى دا دەن قويادى. ۇلتتىق مۋزەي ەكسپوزيتسياسىنداعى جادىگەرلەر وقۋشىلارىمىز ءۇشىن تاپتىرماس قۇندى ماتەريالدار دەۋگە بولادى. تاس داۋىرىنەن باستاپ تاۋەلسىز قازاقستان تاريحىنا دەيىن سىر شەرتەتىن ۇلتتىق مۋزەيگە جاستارىمىز باسقا ۋاقىتتا دا ءجيى كەلگەنى ءجون», دەدى مينيستر.
ونىڭ ايتۋىنشا, الداعى ۋاقىتتا ينتەراكتيۆتى دارىستەردى ەلىمىزدىڭ باسقا دا وڭىرلەرىنە تاراتۋ جوسپارلانىپ وتىر.
ۆەدومستۆو مالىمەتىنە قاراعاندا, ساباقتار offline جانە online فورماتتا وتەدى. جوبانىڭ offline فورماتى ۇلتتىق مۋزەيدىڭ ەكسپوزيتسيالىق زالدارىندا جۇرەدى. ينتەراكتيۆتى ساباقتاردى مۋزەيدىڭ زەرتتەۋشى عالىمدارى, ەكسكۋرسيا جەتەكشىلەرى نۇر-سۇلتان قالاسى اكىمدىگىنىڭ ءبىلىم باسقارماسىنا قاراستى ورتا مەكتەپتەردىڭ تاريح ءپانى مۇعالىمدەرىمەن بىرىگىپ وتكىزەدى. ءار ساباقتىڭ ۇزاقتىعى 35-45 مينۋت ارالىعىندا بولادى. ساباق كەزىندە وقۋشىلار مۋزەي ەكسپوزيتسيالارىنداعى ەكسپوناتتاردى ورتاعا الىپ تانىسادى. ەكسپوناتتاردى (كوشىرمەلەرىن) ۇستاپ كورىپ, جاقىن تانىسۋىنا مۇمكىندىك جاسالادى. ءار بەيسەنبى سايىن تۇسكە دەيىن 2 ساباق جانە تۇستەن كەيىن 2 ساباق وتىلەدى.
جوبانىڭ online فورماتى الدىن الا تۇسىرىلگەن بەينەساباقتار ارقىلى جۇزەگە اسىرىلادى. بەينەساباقتاردىڭ باعدارلاماسىن مۋزەي ماماندارى دايىنداعان. ءار ساباقتىڭ ۇزاقتىعى 5-7 مينۋت ارالىعىندا بولادى. دايىن ساباقتار مەكتەپتەردەگى وقۋ باعدارلاماسىنىڭ كۇنتىزبەسىنە سايكەس ۇلتتىق مۋزەيدىڭ رەسمي سايتىنا سالىنادى. بەينەساباقتاردىڭ قۇرىلىمى جۇرگىزۋشىنىڭ تانىستىرۋ سوزىنەن, گرافيكادان جانە ەكسپوزيتسيالارعا شولۋدان تۇرادى. Online فورمات بارشا قازاقستان وقۋشىلارىن قامتۋعا مۇمكىندىك بەرەدى. ال ساباقتاردىڭ تاقىرىبى مەن مازمۇنى وقۋ-اعارتۋ مينيسترلىگى بەكىتكەن وقۋ باعدارلاماسىنا سايكەس كەلەدى.