ەل پرەزيدەنتى قاسىم-جومارت توقاەۆ جولداۋدا ەڭ الدىمەن حالىقتىڭ الەۋمەتتىك-ەكونوميكالىق جاعدايىن جاقسارتۋ تۋرالى ايتىپ, ساياسي ماسەلەلەرگە كەڭىنەن توقتالدى. سونىڭ ىشىندە, مەملەكەت باسشىسى ەل ەكونوميكاسىن كوتەرۋ ماقساتىندا شاعىن جانە ورتا بيزنەس وكىلدەرىن قولداۋ جالعاساتىنىن اتاپ ءوتتى.
كاسىپكەرلەرگە ارنالعان كرەديتتىك رەسۋرستاردى ۇلعايتۋ قولعا الىنىپ, جاڭا سالىق, بيۋدجەت كودەكستەرى ازىرلەنبەك. الداعى ۋاقىتتا 6 جاسقا دەيىنگى بالالاردى تولىق بالا-باقشامەن قامتاماسىز ەتۋ ماسەلەسى شەشىمىن تابادى. پرەزيدەنت تاربيەشىلەردىڭ ستاتۋسىنا كوڭىل ءبولىپ, ولاردىڭ ايلىق جالاقىسىن كوبەيتۋ قاجەتتىگىن كوتەردى. مەن بۇل باستامالاردى تولىق قولدايمىن.
سونىمەن قاتار ەرەكشە اتاپ وتەتىن جاعداي پرەزيدەنت دەنساۋلىق ساقتاۋ سالاسىنداعى وزەكتى ماسەلەلەردى جەدەل شەشۋ كەرەكتىگىن ايتتى. سول ءۇشىن دارىگەر جانە وسى سالا ماسەلەلەرىن بىلەتىن مامان رەتىندە زور العىسىمدى بىلدىرەمىن. قازىرگى كۇنى مەديتسينا سالاسىن قارجىلاندىرۋ وتە وزەكتى ماسەلە بولىپ وتىر. قارجىلاندىرۋدىڭ ماردىمسىزدىعىنان كەيبىر مەديتسينا مەكەمەلەرى كادرلىق قىسقارتۋ جۇرگىزۋگە ءماجبۇر.
مەديتسينالىق قىزمەتكەرلەردىڭ جالاقىسى كەشىكتىرىلىپ جاتقان جاعدايلار دا بار. كوممۋنالدىق قىزمەتتەرگە, ءدارى-دارمەكتەرگە تولەم جاساۋعا سونداي-اق, مەديتسينالىق ۇيىمنىڭ جەكە دامۋىنا قاراجات قالماۋدا. پرەزيدەنت مەديتسينالىق ساقتاندىرۋ مودەلىن قايتا قاراۋ ماسەلەسىنە توقتالدى. بۇل – وتە ورىندى ماسەلە. مەديتسينالىق ساقتاندىرۋ ارقىلى ازاماتتار تولىققاندى دارىگەرلىك كومەك الا الماي وتىرعاندىعى بۇگىندە ەشكىمگە جاسىرىن ەمەس.
جولداۋ كەزىندە ەل بويىنشا 650 اۋىلعا جاڭا مەديتسينالىق پۋنكتتەر اشىلىپ, 32 اۋداندىق اۋرۋحانا جانىنان جانساقتاۋ بولىمدەرى جانە ينسۋلت ورتالىقتارى ۇيىمداستىرىلاتىنى ايتىلدى. بۇل مەكەمەلەر 4 ملن جۋىق حالىقتى قامتيدى. سونداي-اق مەديتسينالىق جوو جانىنان كوپسالالى كلينيكالار جۇمىسىن باستايدى.
پرەزيدەنت قاڭتار وقيعاسىندا جاپپاي تارتىپسىزدىكتى ۇيىمداستىرۋعا قاتىسپاعان, بيلىكتى كۇشپەن باسىپ الۋعا جانە مەملەكەتكە وپاسىزدىق جاساۋعا قاتىسى جوق ازاماتتارعا ءبىر رەتتىك راقىمشىلىق جاساۋ تۋرالى شەشىم قابىلدادى. «قاسىرەتتى قاڭتار» وقيعالارىنا قاتىسقان ازاماتتار مەن ولاردىڭ جاقىندارىمەن كەزدەسىپ, پىكىرلەسكەن كەزدە ءبىز دە تالاي جايتقا قانىققان ەدىك. وسىعان وراي پرەزيدەنتتىڭ گۋمانيزم ءپرينتسيپىن ۇستانىپ, جاۋاپكەرشىلىگى مول شەشىم قابىلداعانىنا ەرەكشە قۋاندىم.
جولداۋدا ايتىلعان ماڭىزدى ماسەلەلەردىڭ ءبىرى – قازاقستان رەسپۋبليكاسى پرەزيدەنتى جانە ءماجىلىس پەن ءماسليحات دەپۋتاتتارىنىڭ سايلاۋى مەرزىمىنىڭ جاريالانۋى. جاڭا ەرەجەگە سايكەس ازاماتتار جەكە جانە پارتيا اتىنان كانديداتۋراسىن ۇسىنا الادى.
مەملەكەت باسشىسىنىڭ جولداۋداعى ايتقان باستامالاردىڭ بارلىعى تاعدىرشەشتى ماسەلەلەر. سول سەبەپتى دە پرەزيدەنتپەن بىرگە بارشا قازاقستاندىقتاردى ادىلەتتى قازاقستاننىڭ دامۋىنا ۇلەس قوسۋعا شاقىرامىن.
گۇلدارا نۇرىموۆا,
ءماجىلىس دەپۋتاتى