سۋردليمپيادا ويىندارىنىڭ جۇلدەگەرلەرىنە قانشا قاراجات تولەنەدى؟

«مادەنيەت جانە سپورت مينيسترلىگىنە 2022 جىلعا ارنالعان رەسپۋبليكالىق بيۋدجەتتە شۇعىل شىعىندارعا كوزدەلگەن ۇكىمەت رەزەرۆىنەن برازيليانىڭ كاشياس-دۋ-سۋل قالاسىندا 2022 جىلعى XXIV جازعى سۋردليمپيادا ويىندارىندا جوعارى ناتيجەلەرگە قول جەتكىزگەن سپورتشىلارعا جانە ولاردىڭ جاتتىقتىرۋشىلارىنا بىرجولعى تولەمدەردى جۇزەگە اسىرۋ ءۇشىن 3 610 586 265 تەڭگە مولشەرىندە اقشالاي قاراجات ءبولىنسىن», دەلىنگەن قۇجاتتا.

تىزىمگە بارلىعى 80 سپورتشى, سونداي-اق ولاردىڭ جاتتىقتىرۋشىلارى دا كىردى.

دزيۋدوشىلار الدىبەك نۇرمۇحاممەد پەن اننا كراموروۆا 66 957 000 تەڭگەدەن تولەم الادى. ولاردىڭ جەكە جاتتىقتىرۋشىلارى 53 565 600 تەڭگەدەن جانە العاشقى جاتتىقتىرۋشىلارى 6 695 700 تەڭگەدەن الادى.

60 كەلىگە دەيىنگى سالماق دارەجەسىندە كۇمىس مەدالعا يە بولعان الدىبەك نۇرمۇحاممەد كوماندالىق جارىسقا قاتىسقانى ءۇشىن 33 123 000 تەڭگە الادى.

اننا كراموروۆا 78 كەلى سالماق دارەجەسىندە كۇمىس مەدال جەڭىپ العان ەدى.

100 كەلى سالماق دارەجەسىندە قولا مەدال العان سابىرجان حاپيزوۆ 33 478 500 تەڭگە, ال ونىڭ جاتتىقتىرۋشىلارى تيىسىنشە 26 782 800 جانە 3 347 850 تەڭگە سىياقى الادى. سپورتشى ەكىنشى ماراپات ءۇشىن قوسىمشا 33 123 000 تەڭگە الادى.

جەڭىل اتلەت ولگا حيجنياكوۆا بىردەن بىرنەشە تولەم الادى, سەبەبى ول بىرنەشە ماراپاتقا يە بولدى. وعان كۇمىس جانە قولا مەدالدار ءۇشىن 65 170 500, 32 585 250 جانە 12 835 200 تەڭگە تولەنەدى.

التىن مەدالدارعا قول جەتكىزگەن شونكۋ حايراتحاان (گرەك-ريم كۇرەسى) مەن فارحاد قىستاۋباەۆ (جەڭىل اتلەتيكا) 108 617 500 جانە 110 652 500 تەڭگەدەن ەڭ ۇلكەن تولەمدەر الادى. سونىمەن قاتار, سپورتشىلار جارىستاعى باسقا جەتىستىكتەرى ءۇشىن قوسىمشا سىيلىقتارمەن دە ماراپاتتالدى.

سپورتشىلار مەن تيەسىلى تولەمدەردىڭ بارلىق ءتىزىمى 20-شى قىركۇيەككە دەيىن «اشىق نقا» سايتىندا ورنالاستىرىلعان.