دەنساۋلىق ساقتاۋ ءمينيسترى اجار عينيات تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسينمەن سالانى تسيفرلاندىرۋدىڭ بىرقاتار باعىتى بويىنشا بىرلەسكەن جوبالاردى ىسكە اسىرۋ ماسەلەلەرىن تالقىلادى, دەپ حابارلايدى Egemen.kz.
جيىندا پيلوتتىق ۇيىمداردا دەرەكتەردى جيناۋ مەن تالداۋدىڭ جانە پروتسەستەردى باسقارۋدىڭ جاڭا تەحنولوگيالارىن ەنگىزۋ, مەديتسينالىق بەينەلەردىڭ ورتالىقتاندىرىلعان قويماسىن قۇرۋ, سونداي-اق مەديتسينالىق ۇيىمداردا تولىق قاعازسىز قۇجات اينالىمىنا تولىققاندى كوشۋ ماسەلەلەرى سارالاندى. بىرلەسكەن جوبالار كلينيكالىق حاتتامالاردى تسيفرلاۋدى, قاجەتسىز نىساندار مەن تالاپتاردان ارىلۋدى كوزدەيدى.
مينيسترلەر مەديتسيناداعى كوممۋنيكاتسيا ارنالارىن كەڭەيتۋ تاقىرىبىن زەردەلەپ,ء دارى-دارمەك اينالىمى, مەديتسينالىق قىزمەت جانە سانيتارلىق-ەپيدەميولوگيالىق باقىلاۋ سالالارىندا اۆتوماتتاندىرىلعان مەملەكەتتىك باقىلاۋ قۇرالدارىن ەنگىزۋ اسپەكتىلەرىن ەگجەي-تەگجەيلى تالقىلادى. قازاقستانداعى تەلەمەديتسينانى دامىتۋ جانە دەنساۋلىقتى قاشىقتىقتان مونيتورينگىلەۋدى كەڭىنەن ەنگىزۋ ماڭىزى ەرەكشە اتاپ ءوتىلدى.
«قوس تاراپ رەسپۋبليكالىق ەلەكتروندىق دەنساۋلىق ساقتاۋ ورتالىعىن ءتسدياوم-گە بەرۋ جانە تسيفرلىق دەنساۋلىق ساقتاۋ سالاسىندا زاڭدى تۇلعا مارتەبەسىن بەرۋ تۋرالى شەشىم بويىنشا ورتاق پىكىرگە كەلدى. بۇل شەشىمنىڭ ارتىقشىلىعى - دەنساۋلىق ساقتاۋ سالاسىندا ورتالىق اقپاراتتىق حاب قۇرۋ جانە مەملەكەتتىك دەنساۋلىق ساقتاۋ قىزمەتتەرىن كورسەتۋدىڭ ساپاسىن, تيىمدىلىگىن, قولجەتىمدىلىگى مەن ىڭعايلىلىعىن ارتتىرۋ», دەلىنگەن دەنساۋلىق ساقتاۋ مينيسترلىگى تاراتقان حابارلامادا.