تاشكەنت اۋەجايىندا جولاۋشى 57 قولتىراۋىندى الىپ وتپەك بولعان, دەپ حابارلايدى Egemen.kz وزبەكستاننىڭ ەكولوگيا جانە قورشاعان ورتانى قورعاۋ كوميتەتىنىڭ ءباسپاسوز قىزمەتىنە سىلتەمە جاساپ.
30 تامىزدا م. ەسىمدى ازامات كايردەن (مىسىر) تاشكەنتكە ۇشىپ, يسلام كاريموۆ اتىنداعى تاشكەنت حالىقارالىق اۋەجايىنا قونعان. ول 57 كىشى قولتىراۋىندى الىپ كەلگەن. بولجام بويىنشا, ولار - ءنىل قولتىراۋىنى Crocodylus niloticus. الايدا ەر ادامنىڭ ءتيىستى رۇقساتتارى بولماعان.
كونترابانديست كىشكەنتاي قولتىراۋىنداردى كوكونىستەر مەن جەمىستەرمەن جاۋىپ, كونتەينەرلەرگە ورنالاستىرعان. ونى سكانەردەن جاسىرۋ ءۇشىن فولگاعا وراپ قويعان.
ەكولوگيا جونىندەگى مەملەكەتتىك كوميتەت پەن «تاشكەنت-اەرو» شەكارالىق ۆەتەرينارلىق بەكەتىنىڭ قىزمەتكەرلەرى قولتىراۋىننىڭ تولدەرىن ۋاقىتشا ساقتاۋ ءۇشىن تاشكەنت زووباعىنا تاپسىردى.