جاڭا وقۋ جىلى باستالدى. كۇنى كەشە قازاقستانداعى 7,6 مىڭ مەكتەپتە 3,7 ملن وقۋشىعا قوڭىراۋ سوعىلدى. سونىڭ ىشىندە ءبىلىم الەمىنە قادام باسقان 400 مىڭ 1-سىنىپ وقۋشىسى مەن مەكتەپ ءبىتىرۋشى 170 مىڭ تۇلەك ءۇشىن دە ايرىقشا كۇن بولعانداي. جاڭا وقۋ جىلىندا مەكتەپكە العاش قادام باسقاندار مەن بيىل التىن ۇيامەن قوشتاساتىن وقۋشىلاردى, سونداي-اق وقۋ وشاقتارىن جاڭا وزگەرىستەر كۇتىپ تۇر.
ەلىمىزدەگى وقۋ وشاقتارىندا سالتاناتتى جيىندار ۇيىمداستىرىلىپ, العاشقى ساباقتار وتكىزىلدى. سونداي جيىننىڭ بىرىنە وقۋ-اعارتۋ ءمينيسترى اسحات ايماعامبەتوۆ قاتىستى. ەلورداداعى №86 مەكتەپ-گيمنازياسىنا بارعان ۆەدومستۆو باسشىسى قازاقستاندىق پەداگوگتەر, ءبىلىم الۋشىلار مەن اتا-انالاردى ءبىلىم كۇنىمەن قۇتتىقتاپ, جاڭا وقۋ جىلىندا ەنگىزىلگەن ءبىلىم بەرۋ سالاسىنداعى بىرقاتار وزگەرىس پەن جاڭالىققا توقتالدى.
– مەملەكەت باسشىسى قاسىم-جومارت توقاەۆ پەداگوگتەر مەن وقۋشىلاردى قولداۋعا ەرەكشە كوڭىل ءبولىپ وتىر. 2023 جىلعى قاڭتاردان باستاپ پەداگوگتەردىڭ, بالاباقشا تاربيەشىلەرىنىڭ جانە باسقا دا ءبىلىم سالاسى قىزمەتكەرلەرىنىڭ جالاقىسى تاعى دا 25%-عا وسەدى. حالىقارالىق پاندىك وليمپيادالاردا جۇلدەلى ورىندارعا يە بولعان دارىندى بالالارعا 4,7 ملن تەڭگەگە دەيىن سىياقى تولەنەدى. مۇنداي وليمپيادالار ءتىزىمى تاعى 7 زياتكەرلىك سايىسپەن تولىعادى. ولارعا جوو-دا وقۋعا گرانتتار دا بەرىلەدى. ۇستازدار دا بىرجولعى تولەم الادى. بۇل – اتا-انالاردىڭ قولداۋى, مۇعالىمدەردىڭ قاجىرلى ەڭبەگى, وقۋشىلاردىڭ تالابى مەن تاباندىلىعىنىڭ ناتيجەسى. ۇلگەرىمى تومەن بالالارعا ەرەكشە قولداۋ جانە ولاردىڭ جەتىستىككە جەتەتىنىنە سەنىم قاجەت ەكەنىن ءتۇسىنۋ ماڭىزدى. سول سەبەپتى بيىل پرەزيدەنتتىڭ قولداۋىمەن وقۋشىلاردىڭ «بيل», «دارىن» سياقتى مەكتەپتەردە ءبىلىم الۋى ءۇشىن 15% كۆوتا ەنگىزدىك. ونىمەن قوسا بىرقاتار ارنايى باعدارلامانى قولعا الدىق. ءبىز دارىندى نەمەسە ۇلگەرىمى تومەن وقۋشىلاردى عانا ەمەس, ەرەكشە قاجەتتىلىكتەرى بار بالالارعا دا قولداۋدى كۇشەيتىپ كەلەمىز. وسىعان وراي ەرەكشە ءبىلىم بەرۋدى قاجەت ەتەتىن وقۋشىلار وزدەرىن بارىنشا جايلى سەزىنىپ, مەكتەپتەردە وقي الۋى ءۇشىن پەداگوگ-اسسيستەنتتەر سانىن كوبەيتىپ جاتىرمىز, – دەدى ا.ايماعامبەتوۆ.
ءمينيستردىڭ مالىمدەۋىنشە, ۋنيۆەرسيتەتتەرگە تۇسۋگە جانە ومىردەگى جاڭا كەزەڭنىڭ باستالۋىنا دايىندالاتىن سوڭعى سىنىپ وقۋشىلارى ءۇشىن ىڭعايلى جاعداي بيىل دا جاسالادى. بىلتىردان بەرى ۇبت-عا قاتىستى بىرنەشە ارتىقشىلىق ەنگىزىلدى. ياعني بۇل – تەستىلەۋدى 4 رەت تاپسىرۋعا جانە گرانتقا تۇسۋگە 2 مۇمكىندىك.
– مىنە, قازىر الدىمىزدا تۇرعان 1-سىنىپ وقۋشىلارىنا دا ارنالعان بىرقاتار وزگەرىس بار. بيىلدان باستاپ قازاق تىلىندە ءبىلىم الاتىن بالاپاندارىمىز 1-سىنىپتا بۇرىنعىداي ءۇش ءتىلدى قاتار وقىمايدى. ولار الدىمەن قازاق تىلىندە الىپپەسىن وقىپ, جازىپ ۇيرەنەدى. سودان كەيىن بارىپ 2-سىنىپتا ورىس ءتىلىن, 3-سىنىپتا اعىلشىن ءتىلىن قوسىپ وقىتۋ بالالارعا وڭاي بولادى دەپ سەنەمىز. مۇنداي وزگەرىس ديداكتيكالىق, ادىستەمەلىك جاعىنان العاندا وتە ماڭىزدى, ويتكەنى بۇل بالالاردىڭ وقۋ ۇلگەرىمىنە اسەر ەتەدى. تاعى ءبىر ماڭىزدى ماسەلە, پرەزيدەنت بىرنەشە قۇندىلىقتى ايتتى, سونىڭ ءبىرى – ەڭبەكقورلىق. جاس ۇرپاقتى ەڭبەكقورلىققا مەكتەپ قابىرعاسىنان باستاپ باۋلۋىمىز كەرەك. سول سەبەپتى وسى وقۋ جىلىنان باستاپ ەڭبەككە باۋلۋ ءپانىن ءبىرىنشى سىنىپتان باستاپ ەنگىزدىك. الدىڭعى جىلى مەملەكەت باسشىسى ءوزىنىڭ جولداۋىندا مەكتەپتەردى سالۋ جونىندە ۇكىمەتكە تاپسىرما بەرىپ, 2021 جىلدىڭ قورىتىندىسى بويىنشا 277 مەكتەپ سالىندى. بۇل – ەڭ جوعارى كورسەتكىش. بىراق مۇنىڭ ءوزى از. سوندىقتان بيىل دا 260-قا جۋىق مەكتەپتى پايدالانۋعا بەرۋدى جوسپارلاپ وتىرمىز. جالپى, 2025 جىلعا دەيىن كەم دەگەندە 1 مىڭ مەكتەپ سالىنادى. وسى شەشىم وقۋ وشاقتارىنداعى ورىن تاپشىلىعى ماسەلەسىن شەشۋگە بىردەن-ءبىر قادام بولاتىنى انىق, – دەدى مينيستر.
ا.ايماعامبەتوۆتىڭ ايتۋىنشا, 3 ملن-نان اسا بالا مەن 2, 1 اۋىسىمدى مەكتەپتەر 5 كۇندىك جۇمىس فورماتىنا كوشەدى. الايدا 3 اۋىسىمدى مەكتەپتەر مۇنداي فورماتقا كوشە المايدى. ويتكەنى بۇل ءبىلىم بەرۋ ساپاسىنا اسەر ەتەدى. 3 اۋىسىمدى وقۋ وشاقتارىنداعى بالالار سانى بيىلعى جەلتوقسانعا دەيىن اشىلاتىن جاڭا مەكتەپتەردىڭ ەسەبىنەن ازايىپ, سودان كەيىن عانا كەزەڭ-كەزەڭىمەن 2 اۋىسىمدا ءبىلىم بەرە باستايدى. وسىدان سوڭ 3 اۋىسىمنان 2 اۋىسىمعا اۋىسقان مەكتەپتەردىڭ كەيبىرى قاڭتار ايىنان, ەندى ءبىرى جىل سوڭىنان باستاپ 5 كۇن جۇمىس ىستەيدى.