ءبىز پرەزيدەنتتىڭ ءار جولداۋىنان جاقسىلىق كۇتەمىز. حالىق ءۇشىن, مەملەكەت ءۇشىن قانداي جاڭالىق بولار ەكەن دەپ تاپجىلماي وتىرىپ تىڭدايمىز. بۇل جولعى جولداۋى دا ەلدى ەلەڭ ەتكىزدى دەپ ويلايمىن.
بىرقاتار باعدار بويىنشا ءوز ويىمدى ايتا كەتەيىن. اۋىلدىق جەردە مال سانى ارتقان سايىن جەر داۋى جيىلەي باستادى. جايىلىمنىڭ تارلىعى, شابىندىقتىڭ جوقتىعى كۇن تارتىبىنەن تۇسپەيتىن ماسەلە. مىنە, بۇگىنگى جولداۋدا پرەزيدەنت جەر ماسەلەسىنە نازار اۋداردى. البەتتە, يگەرىلمەي بوس جاتقان جەرلەردى مەملەكەت مەنشىگىنە قايتارىپ, شارۋاشىلىقپەن شىنداپ اينالىسىپ وتىرعان ازاماتتارعا ۇلەستىرىپ بەرۋ قاجەت. ايتپەسە, ون سيىرى بار ازامات جەر تاپپاي جۇرەدى دە, ءبىر تۇياق مالى جوق ازامات جۇزدەگەن گەكتاردى يەلەنىپ وتىرادى. ادىلدىك قايدا؟ جىل سوڭىنا دەيىن 5 ملن گەكتار جەر قايتارىلۋ كەرەكتىگىن ايتتى. ول ءۇشىن جەرگىلىكتى جەرلەردەگى كوميسسيا جۇمىس ىستەۋى ءتيىس.
سونداي-اق پرەزيدەنت جول قۇرىلىسىنداعى ساپاسىزدىقتى تىلگە تيەك ەتتى. باسقانى بىلمەيمىن, شىعىس قازاقستاننىڭ جولدارى ابدەن توزدى. سالىنىپ جاتقان ومبى – مايقاپشاعاي كۇرە جولى ساعىزداي سوزىلىپ كەتتى. جولداۋدان كەيىن جول جوندەلەر دەپ ءبىر ءتۇيىپ قويدىق. ايتقانداي, بيتۋمنىڭ تاپشىلىعىن دا ءسوز ەتتى پرەزيدەنت. كادىمگى بيتۋم ماسەلەسىن مەملەكەت باسشىسى جولداۋىنا قوسىپ وتىرعان سوڭ جەرگىلىكتى جەردەگى اكىمدەردەن نە سۇرايمىز؟!
جولداۋدا اۋىل شارۋاشىلىعىنا دا نازار اۋدارىلدى. سۋبسيديا العاندارعا باقىلاۋ كۇشەيتىلۋ كەرەك دەپ قوستى. راس, سۋبسيديانى الۋىن الىپ, ەڭبەگىنەن ناتيجە كورسەتپەي وتىرعان شارۋالار جوق ەمەس.
ءيا, ايەلدەردىڭ زەينەت جاسىنىڭ 2028 جىلى 61 جاسقا دەيىن تۇسەتىنىن ايتىپ قۋانتتى, بالالارعا قور اشىلاتىنىن ايتىپ تاعى قۋانتتى. ءبىلىم سالاسىندا دا جاقسى جاڭالىقتار بولاتىن كورىنەدى. بارىنە توقتالماي-اق قويايىن, بىراق تاربيەشىلەردىڭ جالاقىسى كوتەرىلىپ, اتتەستاتسيادان وتەتىندىگى تۋرالى ءدوپ باسىپ ايتتى. ءيا, جالاقىنى كوتەرۋ كەرەك. بىراق بالا تاربيەسىنە, ءبىلىمدى, بىلىكتى تاربيەشى قاجەت. ول ءۇشىن مىندەتتى تۇردە سىننان ءوتۋى ءتيىس. ايتپەسە, بالاباقشالاردا بەينەكامەراعا ءتۇسىپ قالعان تاربيەشىلەردىڭ تاربيەسىزدىگىن كورىپ جاعامىزدى ۇستاعان ەدىك.
جولداۋدا جاڭالىق كوپ. ەندى ونىڭ ءبارى جۇزەگە اسۋى ءۇشىن ءبىز جۇمىس ىستەۋىمىز كەرەك. جولداۋدى ۇيىپ تىڭداپ الىپ, پرەزيدەنتكە قاراپ وتىرۋدى قويۋ كەرەك. جۇزەگە اسىراتىن ءوزىمىز. راس, سوزدەن ىسكە كوشۋ كەرەك.
ءادىل سايلاۋبەك,
قوعام بەلسەندىسى, ساياساتتانۋشى