بۇل تۋرالى قاسىم-جومارت توقاەۆ پارلامەنت پالاتالارىنىڭ بىرلەسكەن وتىرىسىندا ايتتى, دەپ حابارلايدى Egemen.kz.
«كەلەسى ماڭىزدى ماسەلە – ءبىلىم بەرۋ جۇيەسى تۋرالى. بۇل سالا ۇلت ساپاسىن جاقسارتۋ ىسىندە ۇلكەن ءرول اتقارادى. قازاقتا «ەل بولامىن دەسەڭ بەسىگىڭدى تۇزە» دەگەن ءسوز بار. سوندىقتان مەكتەپكە دەيىنگى تاربيە جۇمىسى باستى نازاردا بولۋى كەرەك. الايدا بىزدە 2-دەن 6 جاسقا دەيىنگى بالالاردىڭ جارتىسىنان استامى عانا بالاباقشاعا بارادى. مۇنداي ولقىلىققا جول بەرۋگە بولمايدى», دەدى پرەزيدەنت.
قاسىم-جومارت توقاەۆ بالالاردى بالاباقشامەن قامتاماسىز ەتۋ ماسەلەسىن تۇپكىلىكتى شەشۋ قاجەتتىگىن باسا ايتتى.
«وعان قوسا تاربيەشىلەردىڭ الەۋمەتتىك مارتەبەسىن ارتتىرىپ, جالاقىسىن كوبەيتۋ كەرەك. وسى سالاداعى ماماندارعا قويىلاتىن ناقتى تالاپتار بەكىتىلۋگە ءتيىس. ولاردىڭ جۇمىس جۇكتەمەسىن دە بىرتىندەپ ازايتقان ءجون. ءوز ىسىنە ادال ۇستازدار ءبىلىم بەرۋ سالاسىنىڭ دامۋىنا زور ۇلەس قوسادى», دەدى مەملەكەت باسشىسى
پرەزيدەنت سوندىقتان بالاباقشانى ەمەس تاربيەشىنى اتتەستاتسيالاۋ قاجەت ەكەنىن ەسكەرتتى.
«ورتا ءبىلىمنىڭ ساپاسى تابىستى ۇلت بولۋدىڭ تاعى ءبىر ماڭىزدى شارتى. ءاربىر وقۋشىنىڭ ءبىلىم الىپ جان جاقتى دامۋى ءۇشىن قولايلى جاعداي جاسالۋى ءتيىس. سول ءۇشىن «جايلى مەكتەپ» ۇلتتىق جوباسى قولعا الىندى. ءبىز 2025 جىلعا دەيىن 800 مىڭ بالانىڭ زاماناۋي مەكتەپتە وقۋىنا جاعداي جاسايمىز. وسىلايشا, اپاتتى جاعدايداعى جانە ءۇش اۋىسىممەن وقيتىن مەكتەپ ماسەلەسىن تولىق شەشەمىز. بۇل اۋىل جانە قالا مەكتەپتەرىنىڭ ايىرماشىلىعىن ەداۋىر ازايتادى. جالپى, مەكتەپ سالۋ ۇكىمەت جانە اكىمدىكتەر ءۇشىن باستى مىندەتتىڭ ءبىرى بولۋى كەرەك», دەدى قاسىم-جومارت كەمەل ۇلى.