ەلوردا اكىمدىگى ينفراقۇرىلىمدى دامىتۋ جانە ەلوردا تۇرعىندارىنىڭ ءومىرىن جاقسارتۋ ماقساتىندا ءتيىمدى پراكتيكالىق IT-شەشىمدەردى قاراستىرىپ جاتىر, دەپ حابارلايدى Egemen.kz.
Astana Hub حالىقارالىق IT-ستارتاپتار تەحنوپاركىمەن بىرلەسىپ 100 IT-جوبا ءوتىنىمىن جينادى. جۋىردا ولاردىڭ 11-ءى ءۇشىن العاشقى Pitch كۇنى ءوتتى.
ء«بىز قالانى دامىتۋ ءۇشىن الەۋمەتتىك-ەكونوميكالىق تيىمدىلىگى بار پراكتيكالىق جوبالارعا قولداۋ كورسەتىپ كەلەمىز. بۇگىن ءبىز مۇنداي جوبالار بار ەكەنىن جانە ولاردىڭ كوپ ەكەنىن كوردىك. اكىمدىك ازاماتتاردىڭ ءومىرىن جاقسارتۋعا باعىتتالعان يننوۆاتسيالىق شەشىمدەر ءۇشىن ءاردايىم اشىق, ءبىز ءوتىنىم جىبەرگەن بارلىق ستارتاپتاردى تىڭداۋعا دايىنبىز, نەعۇرلىم پەرسپەكتيۆالى بولعان ستارتاپتارمەن پيلوتتىق جوبالاردى ىسكە قوسامىز. ول ءۇشىن Pitch Day-دى اي سايىن وتكىزەمىز دەگەن جوسپار بار», دەدى نۇر-سۇلتان قالاسىنىڭ تسيفرلاندىرۋ جانە مەملەكەتتىك قىزمەتتەر باسقارماسىنىڭ باسشىسى مەيرامبەك اشىربەكوۆ. العاشقى Pitch Day-دە قالالىق ينفراقۇرىلىمداعى سۋ دەڭگەيىن مونيتورينگىلەۋ بويىنشا جوبا, ەلوردانىڭ بىرىڭعاي اقپاراتتىق كولىك جۇيەسى, سارقىندى سۋ تاسۋىنىڭ الدىن الاتىن اۆتوماتتى جۇيە قۇرۋ بويىنشا جوبالار ۇسىنىلدى. ءوتىنىم بەرگەن بارلىق جوبالاردىڭ باعىتى ءارتۇرلى, اتاپ ايتقاندا: ءبىلىم بەرۋ, دەنساۋلىق ساقتاۋ, تكش, ەكولوگيا, قاۋىپسىزدىك جانە كولىك سالالارى. جوبالاردى نەتۆوركينگ, پيتچينگتەر جانە قالالىق قۇرىلىمدارمەن ءوزارا ءىس-قيمىل كۇتەدى.
«IT-نارىعى ءۇشىن بۇل ءوزىن اكىمدىككە تانىستىرۋدىڭ جانە قولداۋ تابۋدىڭ بىرەگەي مۇمكىندىگى. Astana Hub وسىنداي باستامالاردىڭ الاڭى بولۋعا, ولار ءۇشىن قوسىمشا مۇمكىندىكتەر جاساي وتىرىپ, IT-جوبالاردى ىلگەرىلەتۋگە دايىن», دەدى Astana Hub كورپوراتيۆتىك يننوۆاتسيالار جانە تسيفرلىق قۇزىرەتتەر كەڭسەسىنىڭ ديرەكتورى تانات وسكەمباەۆ.