پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونiندەگi ۇلتتىق كوميسسيا الاڭىندا IT تەحنولوگيالار جانە بيزنەس سالاسىنداعى كاسىپكەرلەرمەن كەزدەسۋ-تۇساۋكەسەر ءوتتى.
ۇلتتىق كوميسسيانىڭ سەرىكتەسى Technowomen قوعامدىق بىرلەستىگى مەن اقپارات جانە قوعامدىق دامۋ مينيسترلىگىنىڭ ۇيىتقى بولۋىمەن وتكەن ءىس-شاراعا كاسىپكەر ايەلدەر, ءىت جوبالاردىڭ باسشىلارى, قوعامدىق ۇيىمداردىڭ كوشباسشىلارى, مەملەكەتتىك ورگاندار مەن ۇلتتىق كومپانيالاردىڭ وكىلدەرى قاتىستى.
ۇلتتىق كوميسسيانىڭ توراعاسى, پرەزيدەنت اكىمشىلىگى باسشىسىنىڭ ورىنباسارى ايدا بالاەۆا مودەراتورلىق ەتكەن كەزدەسۋ بارىسىندا ايەلدەردىڭ تسيفرلىق ەكونوميكاداعى مۇمكىندىكتەرىن دامىتۋ جانە ايەلدەر مەن بالالار ءۇشىن الەۋمەتتىك ماڭىزى بار IT جوبالاردى پراكتيكاعا ەنگىزۋ ماسەلەلەرى پىسىقتالدى.
تۇساۋكەسەرگە قاتىسۋشىلار الدىندا سويلەگەن سوزىندە ا.بالاەۆا ۇلتتىق كوميسسيا تسيفرلىق سالاسىندا ىنتىماقتاستىق تۋعىزۋ جانە تالانتتاردى قولداۋعا مۇمكىندىكتەردى ىلگەرىلەتۋدەگى ءوز مىندەتىن كورىپ وتىرعانىن اتاپ ءوتتى. «بۇل جۇمىستىڭ باستى باسىمدىقتارى – سەرىكتەستىك ءۇشىن جاعدايلاردى كەڭەيتۋ, قۇندى تالانتتاردى انىقتاۋ جانە ايەلدەر باستامالارىنىڭ ەكونوميكالىق جانە الەۋمەتتىك الەۋەتىن ىسكە اسىرۋعا جاردەمدەسۋ. بۇل كەزدەسۋ – وسى ماسەلەلەردى شەشۋدەگى كەزەكتى قادام», دەدى ۇلتتىق كوميسسيا توراعاسى.
كەزدەسۋ ەكى جۇمىس سەسسياسىنىڭ اياسىندا ءوتتى. ءبىرىنشى سەسسيا بارىسىندا زاڭنامالىق پراكتيكانى جەتىلدىرۋ جانە سەكتورارالىق ىنتىماقتاستىقتى ينستيتۋتسيونالدىق نىعايتۋ جونىندەگى بىرقاتار باستاما كوتەرىلدى.
سەسسيانىڭ ارنايى قوناعى قازاقستانداعى Google Women Techmakers باعدارلاماسىنىڭ امباسسادورى جارقىن ششەگلوۆا بولدى. سونداي-اق الاڭدا سپيكەرلەر رەتىندە «تسيفرلىق ترانسفورماتسيا» قق باسشىسى, TechnoWomen پرەزيدەنتى ازيزا شۋجەەۆا, «تسيفرلىق ەكونوميكانى دامىتۋ ورتالىعى» جشس باس ديرەكتورى بيكەش قۇرمانعاليەۆا, ءبىرىنشى كرەديتتىك بيۋرونىڭ اتقارۋشى ديرەكتورى اسەم نۇرعاليەۆا, «دوگوۆور24» كومپانياسىنىڭ باس ديرەكتورى ەلەنا سەدىح, «قازپوشتا» اق ترانسفورماتسيالاۋ جانە جوبالىق باسقارۋ دەپارتامەنتىنىڭ ديرەكتورى ەلەنا چەكاەۆا ءسوز سويلەدى.
ەكىنشى سەسسيا اياسىندا قوعامدىق ماڭىزى بار ءتۇرلى ماسەلەلەردى شەشۋگە جانە الەۋمەتتىك كاسىپكەرلىكتى دامىتۋعا باعىتتالعان بىرقاتار جوبا تانىستىرىلدى. سونىڭ ىشىندە, ونلاين ءبىلىم بەرۋدى كەڭەيتۋ, پەداگوگتاردىڭ بىلىكتىلىگىن ارتتىرۋ جانە مەكتەپتەردى تسيفرلاندىرۋ, جاستاردى جىنىستىق تاربيەلەۋ, تۇرمىستىق زورلىق-زومبىلىقتىڭ الدىن الۋ, سونداي-اق ونكولوگيالىق اۋرۋلاردى انىقتاۋ جانە جۇكتىلىك پەن بوسانۋ كەزىندە ايەلدەردى ونلاين قولداۋ بويىنشا يدەيالار ۇسىنىلدى.
كەزدەسۋدىڭ نەگىزگى قورىتىندىسى الەۋمەتتىك ارىپتەستىك مۇمكىندىكتەرىن نىعايتۋ جانە مەملەكەتتىك قۇرىلىمدار, ۇلتتىق كومپانيالار مەن IT كاسىپكەرلىك سالاسىنىڭ وكىلدەرى اراسىندا تۇراقتى بايلانىس جۇيەسىن قالىپتاستىرۋ بولدى.