بۇل كۇندەرى ۆەلوسپورتتان يسپانيادا ءوتىپ جاتقان «ۆۋەلتا» كوپكۇندىگىنىڭ التىنشى كەزەڭىندە ميگەل انحەل لوپەس مارە سىزىعىن 16-شى بولىپ قيىپ ءوتتى.
«استانانىڭ» نامىسىن قورعاپ جۇرگەن كولۋمبيالىق لەگيونەر جوعارىداعى كورسەتكىشىنىڭ ارقاسىندا بىردەن 15 ساتىعا جوعارىلاپ, قازىرگى كەزدە 17-ورىندى يەلەنۋدە. يسپانيانىڭ سولتۇستىگىندەگى يرۋن قالاسى مەن پيكو يانو تاۋلى ايماعىن جالعاستىرىپ جاتقان 181,2 شاقىرىمدىق قاشىقتىقتا بەلگيالىق Alpecin-Deceuninck كلۋبى ساپىندا ونەر كورسەتەتىن 26 جاستاعى اۋستراليانىڭ ۆەلوشاباندوزى دجەي ۆاينا شاشاسىنا شاڭ جۇقتىرمادى. ونىڭ كورسەتكىشى – 4 ساعات 38 مينۋت. جەڭىمپازدان نەبارى 15 سەكۋند قالىپ قويعان بەلگيانىڭ بەتكەۇستارى رەمكو ەۆەنەپۋل (Quick-Step) ەكىنشى ورىندى يەلەنسە, يسپانيالىق ەنريك ماس (Movistar) ءۇشىنشى ساتىعا تابان تىرەدى.
ال جالپى ەسەپتە رەمكو ەۆەنەپۋل ءبىرىنشى ورىنعا كوتەرىلدى. ونىڭ ۋاقىتى – 20 ساعات 50 مينۋت 07 سەكۋند. وتكەن كەزەڭدە كوش باستاعان فرانتسيالىق رۋدي مولار (Groupama – FDJ) ەكىنشى ساتىعا سىرعىپ ءتۇستى. ۇزدىك ۇشتىكتى ەنريك ماس تۇيىندەۋدە.