سكەيتبوردينگ اقش-تىڭ كاليفورنياسىندا وتكەن عاسىردىڭ 40-50-ءشى جىلدارىندا پايدا بولعان ەكەن. سپورتتىڭ بۇل ءتۇرىن حالىقارالىق وليمپيادا كوميتەتى رەسمي سپورت رەتىندە تانىپ, 2020 جىلعى توكيو وليمپياداسىنىڭ باعدارلاماسىنا ەنگىزگەن.
تاياۋدا قاراعاندى وبلىسىنداعى اباي قالاسىندا وسى سپورتقا ارنالعان جاڭا سكەيت-الاڭ اشىلدى. ول «جىگەر» ستاديونى ماڭىنداعى ساياباقتا ورنالاسقان. ەندى مۇندا سكەيتبورد, سكۋتەر جانە BMX ۆەلوسيپەدتەرىن تەبەتىن ەكسترەمالدى سپورت اۋەسقويلارى ءوز شەبەرلىكتەرىن جەتىلدىرە الاتىن بولادى.
«اباي اۋدانىنىڭ سپورت كلۋبى» كمقك ديرەكتورىنىڭ ورىنباسارى ساۋلە قوجاحمەتوۆا قۇرىلىس جۇمىستارىنىڭ بيىلعى ماۋسىم ايىندا باستالىپ, تامىزدا اياقتالعانىن ءمالىم ەتتى.
– بالالار مەن جاسوسپىرىمدەردىڭ قۋانىشىندا شەك جوق. كۇندە الاڭدا جۇرەتىن ولاردىڭ قاراسى دا مول. ايتا كەتەتىن جايت, سكەيت-الاڭدا بارلىق مىندەتتى قاۋىپسىزدىك ەرەجەلەرى قاتاڭ ساقتالادى, – دەپ اتاپ ءوتتى ول.
جاڭادان سالىنعان سكەيت-الاڭدا كاسىبي ۆەلوشاباندوزدارمەن قاتار سپورتتىڭ وسى ءتۇرىن مەڭگەرۋدى جاڭادان باستاعاندار دا ءوز شەبەرلىكتەرىن ۇشتاي الادى.
جالپى, قاراعاندى وبلىسىنىڭ قالالارى مەن اۋىلدارىندا بۇقارالىق سپورتتى دامىتۋ جولىندا قىرۋار شارالاردىڭ اتقارىلىپ جاتقانىن ايتا كەتكەن ءلازىم. ابايداعى سكەيت-الاڭ سياقتى باسقا دا سپورت تۇرلەرى نىساندارىنىڭ كوپتەپ سالىنا باستاعانى وسىنىڭ ايقىن دالەلى.
قاراعاندى وبلىسى,
اباي اۋدانى