سيرياداعى سوعىس تاياۋدا بىتەر دەگەن ءۇمىت بار ەدى. الايدا كۇنى كەشە سوعىس وتى قايتا تۇتاندى. سەيسەنبى كۇنى اقش-تىڭ شابۋىلىمەن باستالعان قاقتىعىسقا قارسى جاۋاپ رەتىندە جەرگىلىكتى جاساقتار دا ناقتى ارەكەتكە كوشتى.
اقش سيرياداعى يران قولدايتىن قارۋلى كۇشتەرگە شابۋىل جاساعانىن جاريالاعاننان كەيىن ونىڭ ەلدەگى بازالارىنا زىمىراندىق شابۋىلدار جاسالعانىن حابارلادى. اقش اسكەرى زىمىراندىق شابۋىلدارعا يران قولدايتىن جاساقتار جاۋاپتى بولۋى مۇمكىن ەكەنىن تىلگە تيەك ەتتى. شابۋىل بارىسىندا ەكى اقش ساربازى جەڭىل جاراقات الىپ, بازادان ەۆاكۋاتسيالاندى دەگەن اقپارات تارادى.
ەلدىڭ تاياۋ شىعىستاعى وپەراتسيالارىنا جاۋاپتى اقش ورتالىق قولباسشىلىعىنىڭ مالىمدەمەسىندە بىلاي دەپ جازىلعان: «سودىرلار سيرياداعى ەكى اسكەري بازاعا زىمىراندىق شابۋىل جاسادى. بۇعان جاۋاپ رەتىندە ءبىز دە تىكۇشاقتارمەن ارەكەت ەتتىك». قولباسشىنىڭ مالىمدەمەسىندە يراننان قولداۋ كورەتىن «ەكى-ءۇش سودىردىڭ قازا بولعانى» تۋرالى اقپارات تا بار.
ءبىر كۇن بۇرىن اقش اسكەرى سيريانىڭ شىعىسىنداعى دەير-ەز-زور قالاسىنا اۋەدەن سوققى جاساعانىن حابارلادى. ولار شابۋىلدىڭ نەگىزگى نىسانى يرانمەن بايلانىسى بار كەيبىر قارۋلى توپتار دەپ تۇسىندىرگەن ەدى. سونداي-اق اقش اسكەرى سوققىعا ۇشىراعان ينفراقۇرىلىم نىساندارىنىڭ بارلىعى دەرلىك يران قولدايتىن جاساقتارعا تيەسىلى ەكەنىن العا تارتىپ وتىر.
ء«بىزدىڭ اۋە شابۋىلىن ۇيىمداستىرۋىمىزدىڭ باستى سەبەبى اقش اسكەرلەرىن يران قولدايتىن جاساقشىلاردان قورعاۋ جانە بۇل ءبىزدىڭ اسكەر ءۇشىن وتە ماڭىزدى», دەدى اقش اسكەرى ورتالىق قولباسشىلىعىنىڭ بايلانىس ديرەكتورى, پولكوۆنيك دجو بۋچينو.
سونىمەن قاتار دجو بۋچينو اتالمىش شابۋىلدى پرەزيدەنت دجو بايدەننىڭ بۇيرىعىمەن ۇيىمداستىرعاندارىن, ايماقتاعى شيەلەنىس قاۋپىن شەكتەۋدى جانە قارۋلى توپتار كەسىرىنەن قۇربان بولاتىندار سانىن بارىنشا ازايتۋ ماقساتىمەن جۇزەگە اسىرىلعانىن اتاپ ءوتتى.
دجو بۋچينو بۇل شابۋىلدىڭ 15 تامىزدا يران قولدايتىن توپتاردىڭ اقش قىزمەتكەرلەرىنە جاساعان شابۋىلدارىنا جاۋاپ ەكەنىن العا تارتتى. ەستەرىڭىزگە سالا كەتەيىك, يران قولدايتىن توپتار 15 تامىزدا ۇشقىشسىز ۇشاقتارمەن امەريكالىق اسكەريلەر پايدالاناتىن ءال-تانف گارنيزونىنا شابۋىل جاسادى. شابۋىل كەزىندە اقش اسكەرى قازا تاپقانداردىڭ جوق ەكەنىن جانە ماتەريالدىق شىعىن بولماعانىن حابارلادى. يران سىرتقى ىستەر مينيسترلىگى شابۋىلعا قاتىستى مالىمدەمە جاساپ, اقش-تىڭ ارەكەتىن «سيريا ەگەمەندىگىن بۇزاتىن لاڭكەستىك ارەكەت» دەپ سىنادى. ال سيريا شابۋىلعا قاتىستى ەشقانداي رەسمي مالىمدەمە جاريالاعان جوق.
ەستەرىڭىزگە سالا كەتەيىك, شابۋىل ۇيىمداستىرىلعان دەير-ەز-زور – سيريا-يراك شەكاراسىنداعى ستراتەگيالىق ماڭىزدى مۇناي قورى بار پروۆينتسيا. بۇل ايماق سيريا اسكەرلەرى مەن يران قولدايتىن جاساقتاردىڭ باقىلاۋىندا. سونداي-اق يزرايل ايماققا سوعىس ۇشاقتارىمەن ءجيى شابۋىل جاسايدى.
اقش سوڭعى رەت وتكەن جىلدىڭ ماۋسىم ايىندا سيريانىڭ ەكى ايماعىندا اسكەري جانە قارۋ-جاراق ساقتاۋ ءۇشىن پايدالانىلاتىن نىساندارعا شابۋىل جاساعان ەدى. ال اقش-تىڭ كەشەگى شابۋىلى ەكس-پرەزيدەنت دونالد ترامپ شىعىپ كەتكەن يران يادرولىق كەلىسىمىن قايتا جاڭعىرتۋ ءۇشىن ەۋروپالىق وداق ۇسىنعان كەلىسىم جوباسى قولعا الىنعان كەزەڭمەن ساي كەلۋى ويلاندىرادى.
قازىرگى ۋاقىتتا بايدەن اكىمشىلىگى 2015 جىلى اقش, قىتاي, رەسەي, ۇلىبريتانيا, فرانتسيا, گەرمانيا جانە يران اراسىندا قول قويىلعان, بىراق 2018 جىلى اقش ەكس-پرەزيدەنتى دونالد ترامپتىڭ شەشىمىمەن جاسالعان ەۋروپالىق وداق دايىنداعان يادرولىق كەلىسىمنىڭ جاڭا جوباسىن قاراستىرىپ جاتىر.
الداعى كۇندەرى اتالمىش كەلىسىمگە قاتىستى اقش يراننىڭ ۇسىنىستارى مەن تالاپتارىن ەسكەرە وتىرىپ, شەشىم قابىلدايدى دەپ كۇتىلىپ وتىر.