ۇكىمەت ءتيىستى قاۋلىنى قابىلدادى. بۇل جايىندا وقۋ-اعارتۋ ءمينيسترى اسحات ايماعامبەتوۆ Facەbook-تەگى پاراقشاسىنا جازدى, دەپ حابارلايدى Egemen.kz.
«مەملەكەت باسشىسىنىڭ مينيسترلىكتى ءبولۋ تۋرالى شەشىمى - وتاندىق عىلىمنىڭ دا, جوعارى ءبىلىم بەرۋ جۇيەسىنىڭ دە, جالپى ءبىلىم بەرۋ سالاسىنىڭ دامۋى ءۇشىن دە وتە ماڭىزدى. بۇل قۇرىلعان ەكى مينيسترلىككە العا قويىلعان مىندەتتەرگە جانە پروبلەمالاردى شەشۋگە ەگجەي-تەگجەيلى نازار اۋدارۋىنا مۇمكىندىك بەرەدى.
ەندى وقۋ-اعارتۋ مينيسترلىگىنىڭ قۇزىرىنا مەكتەپكە دەيىنگى, ورتا, تەحنيكالىق جانە كاسىپتىك, ورتا بىلىمنەن كەيىنگى ءبىلىم بەرۋ, قوسىمشا ءبىلىم بەرۋ, بالالاردىڭ قۇقىقتارىن قورعاۋ ماسەلەلەرى كىرەدى. مينيسترلىكتىڭ قاراماعىندا مەكتەپكە دەيىنگى, ورتا, تەحنيكالىق جانە كاسىپتىك, ورتا بىلىمنەن كەيىنگى ءبىلىم بەرۋ سالاسىنداعى ساپانى قامتاماسىز ەتۋ ماسەلەلەرى دە بار», دەپ جازدى مينيستر.
ايتا كەتەيىك, ەندى ەلىمىزدەگى جوعارى ءبىلىم جانە عىلىم ماسەلەلەرىمەن عىلىم جانە جوعارى ءبىلىم مينيسترلىگى اينالىسادى. كوزىقاراقتى وقىرمان جاڭا مينيسترلىكتىڭ باسشىسى بولىپ ساياسات نۇربەك تاعايىندالعانىن جاقسى بىلەدى. ءسوز بارىسىندا اسحات ايماعامبەتوۆ ارىپتەسىنە ساتتىلىك تىلەدى.
«ساياسات نۇربەك ۇلىنىڭ مول تاجىريبەسى, ءبىلىمى مەن جوعارى كاسىبيلىگى مينيسترلىك جۇمىسىن جاڭا دەڭگەيگە كوتەرۋگە مۇمكىندىك بەرەتىنىنە سەنىمدىمىن. بۇعان دەيىن ارىپتەسىم ءبىلىم جانە عىلىم مينيسترلىگى جانىنداعى جۇمىس توپتارىنىڭ قۇرامىندا بولىپ, وسى سالالاردىڭ كوركەيىپ, دامۋىنا سەپتىگىن تيگىزگەن ماڭىزدى جوبالاردى جۇزەگە اسىرۋعا ۇلەس قوستى.
ارىپتەستەرىمە قازاقستاندىق عىلىم مەن جوعارى ءبىلىمدى ەلىمىزدە جانە شەت ەلدەردە دامىتۋ ءۇشىن العا قويعان بارلىق جوسپار مەن جوبانى جۇزەگە اسىرۋعا تىلەكتەسپىن!», دەدى ول.