قازاقستان رەسپۋبليكاسى پارلامەنتى سەناتىنىڭ دەپۋتاتتارى ءلاززات سۇلەيمەن مەن ءلاززات قالتاەۆا تاشكەنت قالاسىندا وتكەن «ايەلدەردىڭ قوعامدىق-ساياسي ومىردەگى ءرولىن جانداندىرۋ جانە ولاردىڭ شەشىم قابىلداۋعا قاتىسۋى» تاقىرىبىنداعى شانحاي ىنتىماقتاستىق ۇيىمىنىڭ ايەلدەر فورۋمىنا قاتىستى.
جوعارعى پالاتانىڭ ءباسپاسوز قىزمەتىنىڭ حابارلاۋىنشا, ءىس-شارا گەندەرلىك تەڭدىكتى قامتاماسىز ەتۋ, ايەلدەردىڭ قۇقىقتارى مەن مۇمكىندىكتەرىن كەڭەيتۋ, سونداي-اق تۇراقتى دامۋ باسىمدىقتارىنا قول جەتكىزۋ بويىنشا فورۋمعا مۇشە ەلدەردىڭ ءوزارا ءىس-قيمىلىن نىعايتۋ ماقساتىمەن ۇيىمداستىرىلدى. سول ارقىلى شىۇ مەملەكەتتەرىنىڭ ءوزارا ءىس-قيمىلىن دامىتۋ كوزدەلگەن.
سەناتور ءلاززات سۇلەيمەن فورۋمدا سويلەگەن سوزىندە قازاقستاننىڭ ارقاشان تەڭ قۇقىقتى جاقتاۋشى بولعانىن جانە سولاي بولا بەرەتىنىن اتاپ ءوتىپ, ەلدە قۇقىقتىق جانە ينستيتۋتسيونالدىق نەگىز قالىپتاسقانىن, گەندەرلىك تەڭدىك پەن ايەلدەردىڭ قۇقىقتارىن قورعاۋ سالاسىندا بەلگىلى ءبىر پروگرەسكە قول جەتكىزىلگەنىن ايتتى.
سونىمەن قاتار دەپۋتات ءبىزدىڭ ەلىمىز حالىقارالىق ستاندارتتاردى ەسكەرە وتىرىپ, ايەلدەر قۇقىعىن قورعاۋ جانە كەمسىتۋشىلىكتىڭ الدىن الۋ ماسەلەلەرى بويىنشا ۇلتتىق زاڭنامانى جانە قۇقىقتىق تاجىريبەنى ودان ءارى جەتىلدىرۋدى جالعاستىرا بەرەتىنىن جەتكىزدى.
ء«بىزدىڭ قوعامدا ايەلدەردىڭ ساياساتقا قاتىسۋى جىل سايىن ءومىر ساپاسىنىڭ جاقسارۋىنا جاعىمدى اسەر ەتىپ كەلەدى. بۇل جاعداي وتباسى مەن بالالاردى قورعاۋدىڭ الەۋمەتتىك ماسەلەلەرىن شەشۋ باعىتىنداعى ساياسي كۇن ءتارتىبىنىڭ ماڭىزىن ارتتىرۋعا دا ىقپالىن تيگىزۋدە. سونىڭ ناتيجەسىندە بۇل ماسەلەگە قاتىستى داۋلار ازايىپ, كەلىسىم كوبەيگەنىن اتاپ وتكەن ءجون», دەدى سەناتور ءلاززات سۇلەيمەن ءوز سوزىندە.
فورۋمعا قاتىسقان قازاقستاندىق دەلەگاتسيا قۇرامىندا قازاقستان پرەزيدەنتى اكىمشىلىگى باسشىسىنىڭ ورىنباسارى ايدا بالاەۆا, ءماجىلىس دەپۋتاتى ءاليا ساپاروۆا, COVID-19 قارسى قازاقستاندىق ۆاكتسينانىڭ اۆتورى كۇنسۇلۋ زاكاريا جانە قازاقستاننىڭ ىسكەر ايەلدەر قاۋىمداستىعىنىڭ باسشىسى راۋشان سارسەنباەۆا بولدى.