ەلوردالىق 5573 اسكەري بولىمدە ەسىل وزەنىنە باتىپ بارا جاتقان ەلوردا تۇرعىنىن قۇتقارعان ۇلتتىق ۇلاننىڭ اسكەري قىزمەتشىلەرىنە قۇرمەت كورسەتىلدى.
ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسىنىڭ بۇيرىعىمەن كىشى سەرجانت ايبات ەسىركەپ پەن قاتارداعى جاۋىنگەر ورالبەك جيەنباي «قازاقستان رەسپۋبليكاسىنىڭ قۇقىقتىق ءتارتىپ اسكەرىنە – 30 جىل» مەدالىمەن ماراپاتتالدى. سونداي-اق قاتارداعى جاۋىنگەرلەر نۇربول تىلەۋبەك پەن ەربولات قاناتبەككە استانالىق جەدەل قۇراما كومانديرىنىڭ گراموتاسى تابىس ەتىلدى.
جاۋىنگەرلەرگە ماراپاتتى سالتاناتتى تۇردە ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, حالىق قاھارمانى, پولكوۆنيك قايرات ۇمبەتوۆ تابىس ەتتى. باس تاربيەشى ساربازدارعا باتىل ءىس-ارەكەتتەرى ءۇشىن العىس ءبىلدىرىپ, اعالىق اق تىلەگىن جەتكىزدى.
– بۇگىندە ۇلتتىق ۇلاننىڭ جەكە قۇرامى وزدەرىنە جۇكتەلگەن جاۋىنگەرلىك مىندەتتەردى ابىرويمەن اتقارىپ كەلەدى. ءبىزدىڭ ساربازدارىمىزدىڭ بۇل ارەكەتى ۇلاندىقتاردىڭ انتقا ادال ەكەنىن جانە ازاماتتاردىڭ قۇقىقتارى مەن قاۋىپسىزدىگىن قورعاۋعا ايتارلىقتاي ۇلەس قوساتىنىن تاعى دا دالەلدەدى. سول كۇنى ولار جانقيارلىق تانىتىپ, ءوز ومىرلەرىن قاتەرگە تىگىپ, باتىلدىقتىڭ جارقىن ۇلگىسىن كورسەتتى. ولاردىڭ ۇيلەسىمدى ارەكەتتەرىنىڭ ارقاسىندا ادام ءومىرى امان قالدى. بارلىق جاس جاۋىنگەرگە قىزمەتتە تابىس, بارلىق باستامالارىنا ساتتىلىك, لايىقتى قىزمەت جانە ۇيلەرىنە امان-ەسەن ورالۋىن تىلەيمىن, – دەدى پولكوۆنيك ق.ۇمبەتوۆ.
ەستەرىڭىزگە سالا كەتەيىك, وقيعا 9 تامىزدا بولعان ەدى. 5573 اسكەري ءبولىمىنىڭ اسكەري جاساعى پاترۋلدەۋ بارىسىندا ەر ادامنىڭ ەسىل وزەنىنىڭ جاعالاۋى جاعىنان كومەك سۇراپ ايقايلاعانىن ەستىپ قالادى. ۇلاندىقتار جەدەل ءارى باتىل ارەكەتتەرىمەن سۋعا باتىپ بارا جاتقان ازاماتتى سۋدان شىعارىپ, العاشقى مەديتسينالىق كومەك كورسەتكەن.