مادەنيەت جانە سپورت مينيسترلىگى بيىل تۇڭعىش رەت «ايبوز» ۇلتتىق ادەبي سىيلىعىن جاريالاعان ەدى. جالپى جۇلدە قورى 35 ملن تەڭگەنى قۇرايتىن اۋقىمدى بايقاۋدان ۇمىتتىلەر كوپ. اتاپ ايتساق, بۇگىندە ادەبي بايگەگە قاتىسۋشى 150-دەن استام شىعارما كەلىپ تۇسكەن. بۇل تۋرالى اتالعان سىيلىق جونىندە ورتالىق كوممۋنيكاتسيالار قىزمەتىندە وتكەن بريفينگتە ايتىلدى.
«بيىل 15 ماۋسىمدا مادەنيەت جانە سپورت ءمينيسترى داۋرەن اباەۆ زيالى قاۋىم وكىلدەرىمەن, اقىن-جازۋشىلار, جۋرناليستەرمەن كەزدەسىپ, ەلىمىزدە تۇڭعىش رەت وسى «ايبوز» ۇلتتىق ادەبي سىيلىعى تاعايىندالاتىنىن حابارلاعان ەدى. سودان بەرى ەكى اي ءوتتى, بايقاۋدىڭ اياقتالۋىنا ءبىر اي ۋاقىت قالدى. ۇلتتىق ادەبي سىيلىقتا «ۇزدىك پروزا», «ۇزدىك پوەزيا», «ۇزدىك دراما», «ۇزدىك اۋدارما», «ۇزدىك بالالار ادەبيەتى», «ۇزدىك كوميكس» جانە «ۇزدىك كىتاپ» نوميناتسيالارى بار. ءار اتالىمنىڭ جەڭىمپازىنا 5 ملن تەڭگەدەن جۇلدە تاعايىندالعان. سونىمەن بىرگە «ۇزدىك كوميكس» جانە «ۇزدىك كىتاپ» نوميناتسيالارى العاش رەت وتكىزىلىپ وتىر», دەدى مادەنيەت جانە سپورت مينيسترلىگى ارحيۆ جانە قۇجاتتامانى باسقارۋ كوميتەتىنىڭ توراعاسى قۋات بوراش.
ايتا كەتەيىك, بايقاۋعا وتىنىمدەر aiboz@kitap-palatasy.kz ەلەكتروندى مەكەنجايىنا 1 قازانعا دەيىن قابىلدانادى.
«مۇنداعى باستى تالاپ – جاڭا دۇنيەلەر عانا قابىلدانادى, شىعارما بۇرىن-سوڭدى ەش جەردە, الەۋمەتتىك جەلىلەر مەن گازەت-جۋرنالداردا جاريالانباعان بولۋعا ءتيىس. ەكى ايدا بايقاۋعا 150-دەن استام شىعارما كەلىپ ءتۇستى. كوپتەگەن تۋىندىنىڭ قۇجاتتارى دۇرىس بولماعاندىقتان, ولاردى قايتارىپ, تۇزەتىپ قايتا جىبەرۋگە مۇمكىندىك بەرىپ جاتىرمىز. سۇرانىس وتە كوپ, ءبىر اۆتوردان 4-5 ەڭبەك كەلەتىن ساتتەر دە بار. قىزىعۋشىلىق تانىتقاندار كۇن سايىن ارنايى تەلەفونىمىزعا حابارلاسىپ جاتىر. شىعارمالاردىڭ دەنى قىركۇيەك ايىندا كەلەدى دەپ ويلايمىز», دەدى ۇلتتىق مەملەكەتتىك كىتاپ پالاتاسىنىڭ ديرەكتورى ءادىل قويتانوۆ.
سپيكەردىڭ ايتۋىنشا, بايقاۋعا قاتىسۋشىلاردىڭ جاسىنا شەكتەۋ جوق. ەركىن تاقىرىپتاعى بارلىق كوركەم شىعارما قابىلدانادى.
«مىسالى, جاقىندا 13 جاستاعى بالا حابارلاسىپ, ءوز شىعارمالارىن جىبەردى. ارينە, ءبىز وعان رۇقسات ەتتىك. ءبىزدىڭ بايقاۋعا 13 جاسار بالادان مەملەكەتتىك سىيلىقتىڭ لاۋرەاتى اتانعان كىسىلەر دە قاتىسىپ جاتىر. نەگىزىنەن پروزا, پوەزيا, بالالار ادەبيەتى جانرلارىنا ءوتىنىم كوپتەپ تۇسۋدە, كىتاپ ديزاينى بويىنشا دا قاتىسۋشىلار كوپ, كوميكستەر ازىرگە از», دەيدى ءادىل قويتانوۆ.
ايتا كەتەيىك, ادەبي سىيلىق جەڭىمپازدارعا جىل سوڭىندا تاپسىرىلادى. كونكۋرس ناتيجەسىنەن سوڭ جەڭىمپازداردىڭ شىعارما- لارى 500 دانامەن جارىق كورەدى.
سونداي-اق بريفينگ بارىسىندا جازۋشىلار وداعىنىڭ مۇشەسى, جازۋشى, اۋدارماشى ليۋبوۆ شاشكوۆا, جاس جازۋشى سادىق شەرىمبەك ءسوز الىپ, شىعارماشىلىق بايقاۋدىڭ ءمان-ماڭىزىنا توقتالدى. ادەبيەت سالاسىنداعى تاعى ءبىر جاڭالىق, 2023 جىلدان باستاپ جاس جازۋشىلار مەن اقىندار ءۇشىن ارنايى پرەزيدەنتتىك ادەبي سىيلىق تاعايىندالادى. 18 بەن 29 جاس ارالىعىنداعى اۆتورلارعا ارنالعان بايقاۋ دا جاس تالانتتاردى قولداۋ ماقساتىندا جاسالىپ وتىر.