التىن بەلبەۋ ءالىمحان ۇلىنا بەرىلەدى

ەندى جانىبەك ءالىمحان ۇلىنا الەم چەمپيونى اتانۋ ءۇشىن ەش كە­دەرگى جوق. بىرەر جىل بويى وسى سال­ماقتىڭ تەڭدەسسىزى بولىپ كەلگەن ان­درادە قازاقتىڭ قايسار ۇلىمەن جۇدىرىقتاسۋدان باس تارتتى. راسىندا دا, ونىڭ وتە مىقتى بوكسشى ەكەنىنە ەش كۇمان جوق. 34 جاستاعى رود-ايلەند شتا­تىنىڭ تۋماسى اۋەسقويلار اراسىندا دا تولاعاي تابىستارعا قول جەتكىزگەنىن ءدۇيىم جۇرت جاقسى بىلەدى. ول 2007 جىلى چيكاگودا وتكەن الەم چەمپيوناتىندا قارسىلاس شاق كەلتىرمەي, باس جۇلدەنى ولجالاسا, ريو-دە-جانەيروداعى پانا­مەريكا ويىندارىندا كۇمىس مەدال­دى موينىندا جارقىراتتى. باسقا دا كوپتەگەن حالىقارالىق جارىستا ولجاعا كەنەلدى.

2008 جىلى ريو وليمپياداسىنىڭ شيرەك فينالىندا سۇرىنگەننەن كەيىن دەمەتريۋس كاسىپقوي رينگتە كۇش سىناسۋدى قۇپ كوردى. سول ارالىقتا 31 كەزدەسۋ وتكىزىپ, بارلىعىندا جەڭىسكە جەتتى. 19 قارسىلاسىن نوكاۋتقا جىبەردى. ءتۇرلى سالماق دارەجەسى بويىنشا چەمپيوندىق بەلبەۋدى يەلەنگەن اقش-تىڭ ارلانى كەزىندە فرەددي ەرناندەس (مەكسيكا), ۆانەس مارتيروسيان, برايان روۋز (اقش), دجەك كۋلكاي (گەرمانيا), ۋولتەر كاۋتوندوكۆا (ناميبيا) جانە تاعى باسقا اتاقتى بوكسشىلاردى ويسىراتا ۇتتى. سوڭعى رەت ول بىلتىرعى جىلدىڭ قاراشا ايىندا يرلانديالىق دجەيسون كۋيگليدى ەكىنشى راۋندتا ۇرىپ جىقتى. بىراق جانىبەكتەن قايمىقتى ما, الدە باسقا جوسپارلارى بولدى ما, ايتەۋىر التىن بەلبەۋدەن باس تارتىپ, شۇعىل تۇردە باسقا سالماققا اۋىستى.

بۇل كۇندەرى «ۋاقىتشا» چەمپيون اتاعىن يەلەنىپ وتىرعان جانىبەك ءالىمحان ۇلىنىڭ ءجۇرىپ وتكەن جولى قازاق جانكۇيەرلەرىنىڭ كوز الدىندا. مۇرات سيقىمباەۆتىڭ قول استىندا جاتتىققان ول اۋەسقويلار اراسىندا الەم جانە قۇرلىق چەمپيونى, ازيا ويىندارىنىڭ جەڭىمپازى اتاندى. 29 جاستاعى الماتى وبلىسى, الاكول اۋدانى جىلاندى اۋىلىنىڭ تۋماسى 2016 جىلدان بەرى كاسىپقوي رينگتە باق سىناۋدا. سول ارالىقتا 12 رەت شارشى الاڭعا شىعىپ, بارلىق قارسىلاسىن سىپىرا ۇتتى. سەگىز جەكپە-جەكتى مەرزىمىنەن بۇرىن اياقتادى. ءبىر سوزبەن ايتساق, Qazaq Style دەگەن بۇركەنشىك ەسىمدى تاڭداعان قانداسىمىزدىڭ تولىققاندى الەم چەمپيونى اتانۋىنا ەش كەدەرگى جوق. قازىرگى كەزدە بارشا الاش جۇرتى WBO-نىڭ رەسمي شەشىمىن كۇتىپ وتىر. ەگەر اتالعان ۇيىم باسشىلىعى الداعى ۋاقىتتا وڭدى شەشىم قابىلداپ, التىن بەلبەۋدى جانىبەككە تابىس ەتسە, وندا ول قازاقستاننان شىققان بەسىنشى الەم چەمپيونى اتانادى.