پرەزيدەنت قاسىم-جومارت توقاەۆتىڭ قىزمەتىنە رەسمي كىرىسكەنىنە ءۇش جارىم جىلعا جۋىقتاپ قالدى. وسى مەرزىم قازاقستان حالقىنىڭ كوپتەگەن تالاپ-تىلەگى ەسكەرىلگەن, ەلىمىزدىڭ كەلەشەكتەگى دامۋ باعدارى جاڭاشا ايقىندالعان كەزەڭ بولدى.
پەرسپەكتيۆاداعى دامۋىمىزدىڭ ناقتى باعىتتارىن 2021 جىلدىڭ 1 قىركۇيەگىندەگى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا ارناعان جولداۋىندا جانە 2022 جىلدىڭ 11 قاڭتارىنداعى پارلامەنتتە, سونداي-اق ۇلتتىق قۇرىلتايدا سويلەگەن سوزدەرىندە تاعى دا ناقتىلاپ كورسەتىپ, جاڭا قازاقستاننىڭ ەكونوميكالىق-الەۋمەتتىك دامۋ باعىتتارىن انىقتاپ بەردى.
پرەزيدەنت قىزمەتىندە الەۋمەتتىك-ەكونوميكالىق دامۋمەن بىرگە, ەلىمىزدە اشىق قوعام قۇرۋ ماسەلەسىنە دە باسا نازار اۋدارىلعان. ماسەلەن, بيلىك پەن قوعام اراسىنداعى ديالوگتى ءتيىمدى ىسكە اسىرۋعا باستايتىن ماڭىزدى جانە وزەكتى شەشىمدەر قابىلداندى. بەيبىت جيىن جانە ميتينگ وتكىزۋ, پارتيالار قۇرۋ, وپپوزيتسيانىڭ پارلامەنتتەگى ءرولىن كۇشەيتۋ تۋرالى زاڭدارعا وزگەرىستەر مەن تولىقتىرۋلار ەنگىزىلدى.
قاسىم-جومارت كەمەل ۇلى ءوزىنىڭ پرەزيدەنت رەتىندەگى ەڭ باستى ماقساتى – حالقىمىزدىڭ بىرلىگىن ساقتاۋ, ءار ازاماتتىڭ قۇقىعىن قورعاۋ, ءال-اۋقاتىن جاقسارتۋ جانە ءاردايىم قازاقستاننىڭ ۇلتتىق مۇددەسىن بارىنەن بيىك قويۋ ەكەنىن قاداپ ايتتى. قولعا الىنعان مەملەكەتتىك باعدارلامالار مەن جوبالار مەملەكەت باسشىسىنىڭ ىسكەر دە باتىل باسشىلىعىمەن جۇيەلى نەگىزدە ىسكە اسىرىلۋ ۇستىندە.
وتكەن ءۇش جارىم جىل وتە كۇردەلى جىلدار بولدى, كوپتەگەن سىن ساعاتتى باستان وتكەرۋگە تۋرا كەلدى. ويتكەنى ەل پرەزيدەنتى وسى كەزەڭدە الەم جۇرتىن الاڭداتقان كەدەرگىلەرمەن بىرگە, ەل ىشىندەگى ءتۇرلى توسىن ساياسي وقيعالارمەن, اپاتتارمەن دە كۇرەسۋگە ءماجبۇر بولدى. ءارى كەز كەلگەن سىن-قاتەرلەرگە لايىقتى تويتارىس بەرىپ, شۇعىل, باتىل ءارى ماڭىزدى شەشىمدەر قابىلداي الىپ وتىر. سول سەبەپتى حالىقتىڭ پرەزيدەنتكە دەگەن سەنىمى ۋاقىت وتكەن سايىن ارتىپ, كۇشەيىپ كەلەدى. قوعامنىڭ ءاربىر مۇشەسى سول سەنىمىن بەلسەندى دە ادال ەڭبەگىمەن ەسەلەي تۇسسە, ەلىمىز دە ەڭسەسىن تىكتەپ, بولاشاعىمىزعا الاڭداماي تىرشىلىك ەتەتىن كۇنگە دە جەتەتىنىمىز كۇمانسىز.
ءبيلىباي ءمۇسىلىموۆ,
پروفەسسور
تاراز