الەمنىڭ بىرقاتار مەملەكەتىندە جاس جەتكىنشەكتەر اراسىندا وتكەن Tennis Europe جانە ITF Juniors تۋرنيرلەرىندە قازاقستاندىق تەننيسشىلەر تابىستى ونەر كورسەتتى.
چەرنوگوريادا ۇيىمداستىرىلعان جارىستا 12 جاستاعى ويىنشىلار باس قوستى. ءامينا نۇرماحان اقتىق سىنعا دەيىن القىنباي جەتكەنىمەن, دەنساۋلىعىنىڭ سىر بەرۋىنە بايلانىستى فينالدىق سايىسقا شىعۋدان باس تارتتى. ناتيجەسىندە, قازاق قىزى كۇمىس مەدال يەلەندى. رەسەيلىك ەۆا كاليادينامەن جۇپ قۇرعان مەدينا وتەپبەرگەن دە ءدال سول مەجەدەن كورىندى. ارمەنيانىڭ استاناسى – ەرەۆانداعى 14 جاستاعىلاردىڭ تۋرنيرىندە جەرلەستەرىمىز ياروسلاۆ پشەنيچنىي مەن ولجاس ەسەنالى جانە البينا كاكەنوۆا مەن ۆيكتوريا وستريۋح (رەسەي) جۇبى شەشۋشى تۇستا عانا قارسىلاستارىنا ەسە جىبەردى.
12 جاستاعى ورەندەر گەرمانيانىڭ رەگەنسبۋرگ قالاسىندا باق سىنادى. بارلىق قارسىلاستارىن سىپىرا ۇتقان روبەرت كامينسكي باس جۇلدەنى ولجالادى. فينالدا ول كورت قوجايىنى ليان بينارتتان 6:4, 6:3 ەسەبىمەن باسىم ءتۇستى. ءدال سول شاھاردا وتكەن 16 جاستاعى تەننيسشىلەردىڭ جۇپتىق باسەكەسىندە سوفيا ىسقاقوۆا مەن اناستاسيا كرىمكوۆانىڭ مەرەيى ۇستەم بولدى. اقتىق سىندا ولار ۋكراينالىق پولينا سەمەنيۋك پەن اناستاسيا سورسكانى سان سوقتىردى – 6:2, 6:3.
تاجىكستاننىڭ استاناسى – دۋشانبەدە 18 جاستاعىلار اراسىنداعى تۋرنيردە ۆيتالي زاتسەپين سينگاپۋرلىق ماكسيمۋس ۆونگپەن بىرگە جۇپتىق جارىستىڭ جەڭىمپازى اتانسا, جەكەلەگەن سايىستا ولەگ گۋساكوۆ فينالدا رەسەيلىك ماكسيم گونچاروۆتان ۇتىلدى.