كورەي تۇبەگىندە وڭتۇستىك كورەيا مەن امەريكا قۇراما شتاتتارىنىڭ بىرلەسكەن اسكەري جاتتىعۋلارى ءوتىپ جاتىر. شىڭدالعان اسكەري كۇشتەر سولتۇستىك كورەياعا قارسى سوعىسقا جۇمىلدىرىلادى.
وقۋ-جاتتىعۋ الاڭىندا قۇپيا قويما جاساقتالعان. وندا «سولتۇستىك كورەيا زىمىراندارىنىڭ جەردەن اسپانعا قاي ۋاقىتتا كوتەرىلەتىنىن انىقتاۋعا مۇمكىندىك بار», دەدى اقش جاعىنداعى وپەراتسيالىق ورتالىقتىڭ باسشىسى, پولكوۆنيك ەنتوني كۋچينسكي ۆۆس-گە بەرگەن سۇحباتىندا.
اقش اسكەري-اۋە كۇشتەرىنىڭ وسان بازاسىنداعى بۇل وپەراتسيالىق ورتالىق ەكى ارميا ۇيلەسىمدى جۇمىس ىستەيتىن الەمدەگى جالعىز ورىن ەكەنىن اتاپ وتكەن ءجون. وسى اپتادا ەكى مەملەكەت ارمياسى سوڭعى ءتورت جىلدا العاش رەت سولتۇستىك كورەيانىڭ شابۋىلىنا قارسى دالا جاتتىعۋلارىن وتكىزۋدى باستادى. جىلدار بويى وتكىزىلگەن ءداستۇرلى ءىس-شارا 2018 جىلى اقش پەن وڭتۇستىك كورەيا سولتۇستىكتى يادرولىق قارۋدان باس تارتۋعا كوندىرۋگە تىرىسقان ۋاقىتتا توقتاتىلعان ەدى. بىراق بارعان سايىن سولتۇستىك كورەيامەن جاۋلاسۋعا يتەرمەلەگەن قارىم-قاتىناستان سوڭ ەكى ەل بيلىگى جاتتىعۋلاردى قايتا باستاۋدىڭ ۋاقىتى كەلدى دەپ شەشتى. ويتكەنى سولتۇستىك كورەيا بيىل زىمىران سانىن ارتتىرىپ, قارۋ-جاراعىن جەتىلدىرىلىپ كەلەدى. اسكەري ساراپشىلار «زىمىراندار جولداعى كەدەرگىلەردىڭ بارلىعىن جايپاپ, نىساناعا ءدال تيۋ قابىلەتىنە يە», دەيدى.
سونىمەن بىرگە, بارلاۋ قىزمەتى سولتۇستىك كورەيا جەتىنشى يادرولىق سىناعىن وتكىزۋگە دايىن ەكەنىن ايتادى. بۇعان قوسا سولتۇستىك كورەيا باسشىسى كيم چەن ىن ءوزىنىڭ يادرولىق قارۋىن وڭتۇستىككە قارسى قولدانۋعا ءازىر ەكەندىگىن ايتىپ, ەسكەرتۋ جاساعانى ءمالىم. وسىنىڭ بارلىعىن ەسكەرە وتىرىپ, سەۋلگە قاۋىپ ءتونىپ تۇرعان شاقتا Ulchi Freedom Shield دەپ اتالاتىن توعىز كۇندىك جاتتىعۋعا ۇشاقتار, اسكەري كەمەلەر مەن تانكتەر جۇمىلدىرىلىپ جاتىر. رەسمي حابارلامالار جاريالاعانداي اسكەريلەر سولتۇستىك كورەيانىڭ شابۋىلىنا قالاي تويتارىس بەرۋ كەرەكتىگىن عانا ەمەس, سونىمەن بىرگە جەكەلەگەن «جاۋ» اسكەرلەرىنە قالاي قارسى سوققى بەرۋدى دە ۇيرەنۋدە.
بىراق بۇل جاتتىعۋلار سولتۇستىك كورەيانىڭ اشۋىن تۋعىزۋى مۇمكىن دەگەن قاۋىپ بار. «پحەنيان كەزەكتى زىمىراندارىن سىناپ, كوپتەن كۇتكەن يادرولىق سىناعىن وتكىزىپ, ءتىپتى كىشىگىرىم قاقتىعىستى باستاۋ ارقىلى جاۋاپ قايتارۋى ىقتيمال», دەيدى ساراپشىلار. ال وڭتۇستىك كورەيا قورعانىس ءمينيسترىنىڭ ورىنباسارى شين بەومچۋل بي-بي-سيگە بەرگەن سۇحباتىندا: «ولار بۇل جاتتىعۋلاردىڭ قورعانىس ماقساتىندا وتەتىنىن بىلەدى, الايدا بىلمەگەندىك تانىتىپ «پايدالانۋى» مۇمكىن», دەدى. الايدا وسان اۋە كۇشتەرى بازاسىنداعى اۋە كۇشتەرىنىڭ قولباسشىسى, گەنەرال-لەيتەنانت سكوتت پلەۋس بۇل پىكىردى ءۇزىلدى-كەسىلدى جوققا شىعارادى. ول «سولتۇستىككورەيالىقتاردىڭ ارەكەتىنە ءبىز دە ءدال سولاي دەپ جاۋاپ بەرە الامىز, وعان تولىق مۇمكىندىگىمىز بار», دەپ جاۋاپ بەردى.
سەۋل دە ەگەر پحەنيان يادرولىق قارۋدى سىناسا, وعان ءسوزسىز جاۋاپ قايتارىلاتىنىن ەسكەرتتى. ۆيتسە-مينيستر شين وڭتۇستىك كورەياعا امەريكالىق بومبالاۋشى ۇشاقتار مەن باسقا دا قارۋ-جاراق جىبەرىلەتىنىن, ال سەۋلدىڭ ۆاشينگتونمەن بىرگە قوسىمشا سانكتسيالار سالاتىنىن راستادى. وڭتۇستىك كورەيانىڭ يادرولىق قارۋى جوق, الايدا امەريكا قۇراما شتاتتارى قاجەت بولعان جاعدايدا سەۋلدى قورعاۋ ءۇشىن ءوزىنىڭ يادرولىق قارۋىن پايدالانادى دەگەن كەلىسىم بارىن جەتكىزدى شين.
دەگەنمەن وڭتۇستىك كورەيا بيلىگى سولتۇستىك كورەيانىڭ شابۋىل جاساماسىنا ۇمىتپەن قارايدى, بىراق حالىق بۇعان بارعان سايىن نارازىلىق تانىتۋدا. بيىل جۇرگىزىلگەن ساۋالداما حالىقتىڭ 71 پايىزى ەلدىڭ ءوزىنىڭ يادرولىق قارۋىن جاساۋىن قولدايتىنىن كورسەتكەن, الايدا وڭتۇستىك كورەيا پرەزيدەنتى مۇنى جوسپارلامايتىنىن ايتادى. ول اقش-قا سەنەتىن سىڭايلى. گەنەرال-لەيتەنانت پلەيس تە ەلدى «جاۋعا» بەرمەيتىنىن ايتىپ, سەندىرىپ باعۋدا. «كورەي تۇبەگىن كۇن سايىن 28 500 اقش اسكەرى كۇزەتەدى, حالىق قورقىنىش سەزىمىن سەيىلتىپ, بىزگە سەنۋلەرى قاجەت», دەپ مالىمدەدى ول.
بىراق بارعان سايىن اقش پەن وڭتۇستىك كورەيا «كۇشتى» قارسىلاسقا تاپ بولعانىن, ولارعا قارسى اسكەري دايىندىق جۇرگىزۋدەن باسقا امالى جوق ەكەنىن مويىندايدى.