قۇقىق قورعاۋ ورگاندارى قاڭتار وقيعاسىنا قاتىستى كەزەكتى دەرەكتەردى ۇسىندى. تەرگەۋ جۇمىستارى جۇيەلى جۇرگىزىلىپ جاتقاندىقتان, شىن كىنالىلەرگە جازا كەسىلىپ, قولدى بولعان قارۋ-جاراقتار تابىلا باستادى. وسى جانە وزگە دە رەسمي اقپاراتتار ورتالىق كوممۋنيكاتسيالار قىزمەتى الاڭىندا وتكەن بريفينگتە ايتىلدى.
ىشكى ىستەر مينيسترلىگى تەرگەۋ دەپارتامەنتىنىڭ باسشىسى سانجار ءادىلوۆ اۋەلى قاڭتار وقيعاسىنا قاتىسى بار كۇدىكتىلەردى تابۋعا, سونداي-اق ۇرلانعان م ۇلىك پەن قارۋدىڭ ورنالاسقان جەرىن انىقتاۋعا كومەكتەسكەن ازاماتتارعا العىسىن ءبىلدىردى.
– قاڭتارداعى وقيعالاردىڭ اق-قاراسىن انىقتاۋعا ءبىر-بىرىمەن تىعىز قارىم-قاتىناستا جۇمىس ىستەيتىن بارلىق قۇقىق قورعاۋ ورگانى تارتىلعانى بەلگىلى. ماسەلەن, تەرروريستىك اكتىلەر مەن جاپپاي تارتىپسىزدىكتەردى ۇيىمداستىرۋشىلاردى انىقتاۋمەن ارنايى پروكۋرورلاردىڭ باسشىلىعى مەن ۆەدومستۆوارالىق جەدەل-تەرگەۋ توپتارى اينالىسۋدا. وكىلەتتىكتەردى اسىرا پايدالانۋ تۋرالى ازاماتتاردىڭ شاعىمدارى بويىنشا تەرگەۋدى سىبايلاس جەمقورلىققا قارسى ورگاننىڭ قىزمەتكەرلەرى, جەكەلەگەن جاعدايلاردا ارنايى پروكۋرورلار جۇرگىزۋدە. ىشكى ىستەر ورگاندارىنىڭ جەدەل تەرگەۋ توپتارى جاپپاي تارتىپسىزدىك كەزىندە جاسالعان ۇرلىق, توناۋ, كولىكتى زاڭسىز ايداپ اكەتۋ, بۇزاقىلىق جانە قارۋ ۇرلاۋ فاكتىلەرىن تەرگەۋدە. ءبىزدىڭ ورتاق مىندەتىمىز – تولىق, وبەكتيۆتى جانە جان-جاقتى تەرگەۋ جۇرگىزۋ, ازاماتتارعا بۇزىلعان قۇقىقتارىن قالپىنا كەلتىرۋگە كومەكتەسۋ, سونداي-اق الداعى ۋاقىتتا وسىنداي قايعىلى وقيعالارعا جول بەرمەۋ ءۇشىن قاجەتتى جانە كەشەندى شارالار قابىلداۋ.
قاڭتار وقيعالارى بارىسىندا قىلمىسكەرلەردىڭ جولىندا كەزدەيسوق كەزدەسكەن كوپتەگەن ازامات زارداپ شەكتى. ولاردىڭ كەيبىرەۋى ۇيىمداستىرۋشىلار مەن ارانداتۋشىلاردىڭ ايداۋىنا ەرىپ, وزدەرى قىلمىس جاساۋعا دەيىن بارعان. قازىر ءبىز باسقا قۇقىق قورعاۋ ورگاندارىمەن بىرلەسە وتىرىپ, ۇيىمداستىرۋشىلار مەن وسى وقيعالارعا تىكەلەي قاتىسى بار كۇدىكتىلەردى انىقتاۋ بويىنشا جۇيەلى جۇمىستى جالعاستىرىپ كەلەمىز. ءار دەرەككە قاتىستى مۇقيات تەرگەۋ جۇرگىزىلۋدە, ونىڭ ناتيجەسى بويىنشا انىقتالعان كۇدىكتىلەر جاسالعان ارەكەتىنە بايلانىستى ءتيىستى جازاسىن الۋدا, – دەدى سانجار ءادىلوۆ.
رەسمي مالىمەتتەرگە سۇيەنسەك, ىشكى ىستەر ورگاندارىنىڭ تەرگەۋشىلەرى قاڭتار وقيعالارى بويىنشا 4 642 قىلمىستىق ءىس قوزعاعان (ۇرلىق بويىنشا 2,5 مىڭ, قارۋدى ۇرلاۋ نەمەسە ساقتاۋ بويىنشا 710 فاكت, 418 بۇزاقىلىق, م ۇلىكتى جويۋدىڭ 199 فاكتىسى, 26 قاراقشىلىق جانە توناۋ). 971 ءىستىڭ ءوندىرىسى اياقتالىپ, ونىڭ ىشىندە 609 ايىپتالۋشىعا قاتىستى ءىس سوتتارعا جولدانعان.
سوت قاراۋلارىنىڭ ناتيجەلەرى بويىنشا 539 ايىپتالۋشىعا ۇكىم شىقتى. ولاردىڭ 425-ءنىڭ باس بوستاندىعى شەكتەلگەن, دەسە دە, تەك 104-ءى عانا اۋىر جانە اسا اۋىر قىلمىستار جاساعانى ءۇشىن باس بوستاندىعىنان ايىرىلعان. قازىر پوليتسيا تەرگەۋشىلەرىنىڭ وندىرىسىندە 276 ءىس بار (قارۋدى زاڭسىز ساقتاۋ – 50, كىسى ءولتىرۋ – 33, بيلىكتى اسىرا پايدالانۋ – 40, ۇرلىق – 16, بۇزاقىلىق – 4 جانە ت.ب.).
جالپى, بۇگىندە تەرگەۋشىلەر 40 مىڭعا جۋىق تەرگەۋ ارەكەتتەرىن جۇرگىزىپ, 15 مىڭنان استام ازاماتتان جاۋاپ العان. ال تاعايىندالعان ساراپتاما سانى 2,5 مىڭنان اسادى. زارداپ شەككەن ازاماتتارعا 360 ملن تەڭگەگە جۋىق سوماعا باعالانعان زالال وتەلگەن. سوتقا دەيىنگى تەرگەۋ جانە ىستەردى سوتتا قاراۋ ساتىسىندا كۇدىكتىلەر ءوز ەرىكتەرىمەن جابىرلەنۋشىلەرگە 15 ملن تەڭگەدەن استام سوماعا زالالدى وتەدى.
مەملەكەت باسشىسى قاسىم-جومارت توقاەۆتىڭ جەڭىلدەتەتىن ءمان-جايلاردى ەسكەرۋدىڭ ماڭىزدىلىعى تۋرالى تاپسىرماسىن ورىنداۋ اياسىندا بۇرىن سوتتالماعان, مىنەزدەمەسى جاقسى جانە شىعىندى ءوز ەركىمەن وتەگەن 421 كۇدىكتىگە قاتىستى بۇلتارتپاۋ شارالارى قوعامنان وقشاۋلاۋمەن بايلانىستى ەمەس بولىپ وزگەرتىلگەن. ولارعا ەشقايدا كەتپەۋ قولحاتى, كەپىل, ۇيدە قاماۋدا ۇستاۋ جانە جەكە كەپىلگەرلىك سياقتى بۇلتارتپاۋ شارالارى قولدانىلعان.
ورتاشا جانە ونشا اۋىر ەمەس قىلمىس جاساعان, سونداي-اق جابىرلەنۋشىلەرگە كەلتىرىلگەن شىعىندى وتەگەن 35 كۇدىكتىگە قاتىستى قىلمىستىق ىستەر تاراپتاردىڭ تاتۋلاسۋىنا بايلانىستى قىسقارتىلدى. ءوز كەزەگىندە سوتتار دا جازا تاعايىنداعان كەزدە تەرگەۋ مالىمەتتەرىمەن قاتار, سوتتالۋشىلاردىڭ ءوز ۇستانىمىن, وكىنىش ءبىلدىرۋىن, شىعىندى وتەگەنىن جانە تەرگەۋگە جاردەم كورسەتكەنىن ەسكەرۋدە.
قاڭتار وقيعالارى كەزىندە كوپتەگەن قىزمەتتىك جانە ازاماتتىق قارۋ (2 900 بىرلىك) ۇرلانىپ, ازاماتتاردىڭ قاۋىپسىزدىگىنە قاۋىپ تونگەنى بەلگىلى. بۇگىندە ءتارتىپ ساقشىلارى 873 قارۋدى تاركىلەگەن. ونىڭ ىشىندە 480 تابەلدىك جانە 387 ازاماتتىق قارۋ تىركەلدى. قازىرگى ۋاقىتتا پوليتسيا ۇرلانعان قارۋدى عانا ەمەس, جالپى, زاڭسىز اينالىمداعى قارۋدى تابۋ جانە تاركىلەۋ بويىنشا ماقساتتى جۇمىس جۇرگىزۋدى جالعاستىرۋدا. مىسالى, الماتى وبلىسىنىڭ ىلە اۋدانىندا ۇلتتىق قاۋىپسىزدىك كوميتەتىمەن بىرلەسكەن جەدەل-ىزدەستىرۋ شارالارى بارىسىندا 53 اڭشىلىق وق-دارىلەر, 13 گازدى جانە 15 جارىق شۋلى گراناتا جاسىرىلعان قويما تابىلعان.
بۇگىندە قاڭتار وقيعاسى كەزىندە ۇرلانعان قارۋدىڭ 2 087 بىرلىگى انىقتالماعان كۇيىندە قالىپ وتىر (1 285 ازاماتتىق, 645 تابەلدىك, 157 تراۆماتيكالىق, گاز جانە سيگنالدىق تاپانشالار). ولاردى انىقتاۋ بويىنشا جۇمىستار جالعاسۋدا.
قاڭتار وقيعاسى كەزىندە الماتى, شىمكەنت قالالارىندا, اقتوبە, اتىراۋ, الماتى, جامبىل, قىزىلوردا جانە شىعىس قازاقستان وبلىستارىندا قارۋلى قىلمىسكەرلەر مەملەكەتتىك جانە ازاماتتىق وبەكتىلەردى باسىپ الىپ, قيراتقانى بەلگىلى. ونىڭ ىشىندە اكىمدىكتەر, اەروپورتتار, پوليتسيا عيماراتتارى, ۇلتتىق قاۋىپسىزدىك كوميتەتىنىڭ دەپارتامەنتى, باق عيماراتتارى, سونداي-اق ساۋدا ۇيلەرى, قارۋ دۇكەندەرى جانە ازاماتتاردىڭ جەكە م ۇلىكتەرى بار. جۇزدەگەن عيمارات پەن كولىك قۇرالى ورتەندى. سونىڭ سالدارىنان 100 ملرد تەڭگەدەن استام سوماعا زالال كەلتىرىلگەن. ونىڭ 92 ملرد تەڭگەسى بيزنەس سۋبەكتىلەرىنە تيەسىلى.