Amanat پارتياسىنىڭ ءموبيلدى قوعامدىق قابىلداۋ بولمەلەرىنىڭ ايماقتارعا ساپارى جالعاسۋدا. جاقىندا پارتيا مۇشەلەرى سولتۇستىك قازاقستان جانە اتىراۋ وبلىستارىنا باردى. قابىلداۋعا ءبىر كۇندە 60-قا جۋىق ازامات كەلىپ, ءىس-شارادا 4 شالعاي ەلدى مەكەن قامتىلدى.
ماسەلەن, سولتۇستىك قازاقستان وبلىسى ايىرتاۋ اۋدانىنىڭ تۇرعىندارى پارتيانىڭ رەسپۋبليكالىق ءموبيلدى قوعامدىق قابىلداۋ بولمەسىنىڭ وكىلدەرىنە سۋمەن قامتۋ, جولداردى جوندەۋ, كوشەلەردى جارىقتاندىرۋ, جۇمىسقا ورنالاستىرۋ جانە كاسىپكەرلىكتى قولداۋ سەكىلدى ماسەلەلەر بويىنشا جۇگىندى.
انتونوۆكا اۋىلىنىڭ تۇرعىنى يرينا ەكيمەنكو جاڭا سۋ قۇبىرىن سالۋ ماسەلەسىن كوتەردى. ونىڭ ايتۋىنشا, اۋىلداعى سۋ قۇبىرى 80-ءشى جىلدان بەرى بار بولسا, ونىڭ 90 پايىزىنىڭ توزىعى جەتتى. «مەن قوعامدىق قابىلداۋ بولمەسىنە حابارلاسقان سوڭ ەكى ايدان كەيىن جوبالاۋ-سمەتالىق قۇجاتتامانىڭ دايىن بولاتىنى, ال قاراشا ايىندا بيۋدجەتتەن اقشا سۇرالاتىنى تۋرالى جاۋاپ الدىم», دەپ اتاپ ءوتتى ي.ەكيمەنكو.
اتىراۋ وبلىسىنا قاراستى يساتاي اۋدانىندا قابىلداۋعا 30-دان استام ادام كەلدى. وزەكتى ماسەلەلەردىڭ قاتارىندا جول جوندەۋ, اۋىلداردى اباتتاندىرۋ جانە الەۋمەتتىك ماڭىزى بار نىسانداردىڭ قۇرىلىسىنا قاتىستى سۇراقتار بار.
تۇششىقۇدىق اۋىلدىق وكرۋگىنىڭ تۇرعىنى, زەينەتكەر باعيلا يبراگيموۆا اۆتوكولىك جولى ارقىلى مالعا ارنالعان وتكەل سالۋ ماسەلەسى بويىنشا ءوتىنىش ءبىلدىردى. «پارتياعا اۋىل تۇرعىندارىنىڭ اتىنان كەلدىم. ءبىزدىڭ اۋىل ارقىلى وتەتىن اتىراۋ-استراحان تاس جولىن قايتا جوندەۋدەن وتۋىنە بايلانىستى مالعا ارنالعان وتكەل قاجەت. وعان لايىقتى ورىن دا دايىن. الايدا ءبىزدى تولعاندىرعان ماسەلەنىڭ اياقسىز قالماي, باقىلاۋدا بولعانىن قالايمىز», دەدى اۋىل تۇرعىنى.
قابىلداۋعا كەلگەن جەرگىلىكتى تۇرعىن قاليدوللا قادىروۆ اماناتتىقتارعا جايىلىمدىق جەرلەردىڭ جەتىسپەۋشىلىگى ماسەلەسى بويىنشا شاعىمىن ايتتى. «جاقىن ماڭداعى وزەك اۋماعىندا سۋ جوق. سوندىقتان سۋ مەن ءشوپ ىزدەپ كورشى اۋىلدارعا مال ايداپ كەتۋگە تۋرا كەلەدى. ءبىز اۋىلدا مال جاياتىن جانە سۋاراتىن ورىن بولعانىن قالايمىز. كەيبىر جەرلەردى جەكە شارۋاشىلىقتار جەكەشەلەپ قورشاپ الدى. پارتيا بۇل ماسەلەنى رەسپۋبليكا دەڭگەيىندە كوتەرىپ وتىر. سوندىقتان ءبىز بۇل ماسەلەنىڭ وڭ شەشىمىن تاباتىنىنا سەنىمدىمىز», دەيدى ول.
Amanat پارتياسى رەسپۋبليكالىق قوعامدىق قابىلداۋ بولمەسىنىڭ باسشىسى ءاليا سادىرباەۆا 4 شىلدەدە شالعاي ەلدى مەكەندەرگە ساپاردىڭ ەكىنشى كەزەڭى باستالعانىن اتاپ ءوتتى. ء«بىرىنشى كەزەڭ 14 ناۋرىز بەن 14 ماۋسىم ارالىعىندا ءوتتى. ەكىنشى كەزەڭ كەزىندە 131 اۋىلدىق وكرۋگتە بولىپ, مىڭعا جۋىق ادام قابىلدادى. ماسەلەلەردىڭ 25 پايىزى دەر كەزىندە وڭ شەشىمىن تاپسا, قالعاندارى باقىلاۋعا الىنادى», دەدى ءاليا سادىرباەۆا.
ەسكە سالا كەتەيىك, پارتيانىڭ قوعامدىق قابىلداۋ بولمەلەرىنە جىل باسىنان بەرى 91 مىڭنان استام ادام جۇگىندى. مەملەكەتتىك ورگانداردىڭ باسشىلارى مەن ءتۇرلى دەڭگەيدەگى دەپۋتات 18 مىڭنان استام قابىلداۋ وتكىزىپ, ونىڭ بارىسىندا 46 مىڭنان استام ادام قابىلداندى.