29 تامىز بەن 11 قىركۇيەك ارالىعىندا نيۋ-يوركتە اقش-تىڭ اشىق بىرىنشىلىگى باستالادى. «ۇلكەن دۋلىعا» ساناتىنداعى بۇل تۋرنيرگە الەمنىڭ بارلىق مىقتى تەننيسشىسى قاتىسادى دەپ كۇتىلۋدە. سولاردىڭ اراسىندا اتر مەن WTA رەيتينگتەرىندە ۇزدىك بەستىكتىڭ قاتارىندا جۇرگەن دانيل مەدۆەدەۆ (رەسەي), الەكساندر زۆەرەۆ (گەرمانيا), رافاەل نادال مەن كارلوس الكاراس (يسپانيا), نوۆاك دجوكوۆيچ (سەربيا), يگا شۆەنتەك (پولشا), انەتت كونتاۆەيت (ەستونيا), ماريا ساككاري (گرەكيا), پاۋلا بادوسا (يسپانيا) جانە ونس جابەر (مىسىر) سىندى مىقتى ويىنشىلار دا بار.
US open ءتۋرنيرىنىڭ 141 جىلدىق تاريحى بار. العاشقى بىرىنشىلىك سوناۋ 1881 جىلى ۇيىمداستىرىلعان بولاتىن. ول كەزدەرى ەرلەر سايىسىندا ريچارد سيرسقا تەڭ كەلەر ەشكىم تابىلمادى. بوستون قالاسىنىڭ تۋماسى قاتارىنان جەتى جارىستا باس جۇلدەنى قانجىعاسىنا بايلادى. حح عاسىر تابالدىرىقتان اتتاعان تۇستا ۋيليام لارنەدتىڭ تاسى ورگە دومالادى. نيۋ-دجەرسيدە دۇنيەگە كەلگەن ساڭلاق جەتى دودادا دارا شىقتى. جيىرماسىنشى جىلدارى بيلل تيلدەننىڭ قارقىنى وتە كۇشتى بولدى. فيلادەلفيانىڭ ءتول تۋماسى لارنەدتىڭ جەتىستىگىن قايتالادى. 1926 جىلى اتالعان جارىستا العاش رەت شەتەلدىك ويىنشى جەڭىس تويىن تويلادى. ول فرانتسيانىڭ اتى اڭىزعا اينالعان ازاماتى رەنە لاكوست ەدى. كەلەسى ماۋسىمدا ول ءوزىنىڭ كورسەتكىشىن قايتالاسا, 1928 جىلى ءدال سول مەملەكەتتىڭ وكىلى انري كوشە قارسىلاس شاق كەلتىرمەدى.
وتكەن عاسىردىڭ سەكسەنىنشى جىلدارى اقش-تىڭ قوس ماقتانىشى – دجيممي كوننورس پەن دجون ماكينرويدىڭ مەرەيلەرى ۇستەم بولدى. العاشقىسى – بەس, ەكىنشىسى – ءتورت رەت تەڭدەسسىز دەپ تانىلدى. عاسىرلار توعىسىندا امەريكادا تۇرىپ جاتقان گرەكيالىق پيت سامپراس الدىنا جان سالمادى. ول بەس جارىستا توپ جاردى. 2004-2008 جىلدارى شۆەيتساريالىق رودجەر فەدەرەر قاتارىنان بەس تۋرنيردە قارسىلاس شىداتپادى. بىلتىرعى دودادا بۇل كۇندەرى الەمدىك رەيتينگتە كوش باستاپ تۇرعان رەسەيلىك دانيل مەدۆەدەۆ جەڭىسكە جەتتى. فينالدا ول سەربيانىڭ ساڭلاعى نوۆاك دجوكوۆيچتى سان سوقتىردى.
ايەلدەر اراسىنداعى باسەكەلەردە حح عاسىردىڭ باسىندا نورۆەگيالىق موللا بيۋرشتەدتىڭ باق جۇلدىزى جارقىراي جاندى. سكانديناۆيا تۇبەگىنىڭ تەننيسشىسى سەگىز جارىستا الدىنا جان سالمادى. كوپ ۇزاماي امەريكالىق حەلەن ۋيللز-مۋدي جەتى جەڭىسپەن توقتادى. ونىڭ وتانداسى كريس ەۆەرت 1975-1982 جىلدار ارالىعىندا التى دودادا دارا شىقتى. ءححى عاسىردا سەرەنا ۋيليامس شاشاسىنا شاڭ جۇقتىرمادى. نيۋ-يوركتەگى باسەكەدە اقش-تىڭ ايگىلى ويىنشىسىنىڭ التى مارتە مەرەيى ۇستەم بولدى. بىلتىر وتكەن جارىستا ەمما رادۋكانۋدىڭ تەگەۋرىنىنە ەشكىم شىداي المادى. 18 جاستاعى ۇلىبريتانيا وكىلى اقتىق سايىستا ءوزىنىڭ قۇربىسى, كانادالىق لەيلا فەرناندەستەن باسىم ءتۇستى.
قازاقستاننىڭ تەننيسشىلەرى اراسىنان اقش-تىڭ اشىق بىرىنشىلىگىندە ەڭ ءتاۋىر كورسەتكىشكە يۋليا پۋتينتسەۆا قول جەتكىزدى. وسىدان ەكى جىل بۇرىن ول شيرەك فينالعا دەيىن جەتتى. 2016 جىلى ياروسلاۆا شۆەدوۆا ءتورتىنشى كەزەڭدە ءسۇرىندى. ال 2013-2020 جىلدار ارالىعىندا ميحايل كۋكۋشكين بەس رەت ءۇشىنشى اينالىمنان اسا المادى. 2014 جىلى زارينا دياس, 2019 جىلى الەكساندر بۋبليك جانە 2021 جىلى ەلەنا رىباكينا ءدال سول مەجەگە كەلىپ توقتادى. ءيا, جەكەلەگەن سايىستا جولىمىز وڭعارىلماعانىمەن, جۇپتىق باسەكەدە باعىمىزدىڭ جانعانى جانكۇيەرلەردىڭ جادىندا. سوناۋ 2010 جىلى امەريكالىق ۆانيا كينگپەن جۇپ قۇراعان شۆەدوۆا US open دوداسىندا باس جۇلدەنى ولجالادى. بۇل قازاقستاندىق تەننيسشىلەردىڭ «ۇلكەن دۋلىعا» ساناتىنداعى تۋرنيرلەردەگى العاشقى جەڭىسى ەدى.
«ۇلكەن دۋلىعا» ساناتىنا ەنگەن جارىستاردىڭ جۇلدە قورى دا مول بولاتىنى ءمالىم. اقش-تىڭ اشىق بىرىنشىلىگىنە قاتىسقان ويىنشىلاردىڭ ماتەريالدىق جاعدايلارىن جاقسارتۋعا مۇمكىندىكتەرى زور. بيىل اتالعان دودانىڭ جۇلدە قورى 60 ميلليون دوللاردى قۇراپ وتىر. تارقاتىپ ايتساق, ەرلەر مەن ايەلدەر اراسىنداعى باسەكەدە باس جۇلدەنى ولجالاعان ويىنشى 2,6 ميلليون دوللاردى يەمدەنەدى. اقتىق سىندا جەڭىلگەندەرگە سول سومانىڭ تەڭ جارتىسى بەرىلەدى. جارتىلاي فينالعا دەيىن جەتكەندەردىڭ ەسەپشوتىنا
705 000 اۋدارىلسا, شيرەك فينالعا شىققاندار
445 000-دى ەنشىلەيدى. ءتورتىنشى كەزەڭدە ويناعاندار 278 000-دى يەلەنسە, ءۇشىنشى اينالىمدا سۇرىنگەندەر 188 000-عا يەلىك ەتەدى. ەكىنشى كەزەڭدە ۇتىلعاندار 121 000-دى قالتاعا باسادى. ءتىپتى, تۇساۋكەسەر كەزدەسۋىندە جەڭىلىستىڭ كەرمەك ءدامىن تاتقاندار دا قۇرقول قايتپايدى. وسى بىرىنشىلىككە قاتىسقانىڭىز ءۇشىن عانا 80 000 دوللاردى قالتاڭىزعا باساسىز. مىنە, سول سەبەپتى دە نيۋ-يوركتەگى تۋرنيردە باق سىناۋعا بارلىق تەننيسشى نيەت ەتىپ وتىر.