كەلەسى جىلدىڭ 12-22 قاڭتارى ارالىعىندا اقش-تىڭ لەيك-پلەسيد قالاسىندا وتەتىن XXXI دۇنيەجۇزىلىك قىسقى ۋنيۆەرسيادادا شايبالى حوككەيدەن قازاقستاننىڭ ۇلتتىق قۇراماسى قاي كوماندالارمەن كۇش سىناساتىنى بەلگىلى بولدى.
ەرلەر اراسىنداعى جارىستا 12 كوماندا ونەر كورسەتەدى. ولار – اقش, كانادا, چەحيا, ۇلىبريتانيا, ماجارستان, جاپونيا, وڭتۇستىك كورەيا, لاتۆيا, سلوۆاكيا, شۆەتسيا, ۋكراينا جانە قازاقستان قۇرامالارى. ءبىرىنشى كەزەڭدە ولار التى-التىدان ەكى توپقا ءبولىنىپ, ءوزارا شەبەرلىك بايقاسادى. سونىڭ ناتيجەسى بويىنشا الدىڭعى ەكى ورىندى يەلەنگەن ءتورت ۇجىم پلەي-وففقا جولداما الىپ, جۇلدەلى ورىندار ءۇشىن تالاسادى.
شايبالى حوككەيدەن وتەتىن الەم چەمپيوناتتارىندا ۇنەمى كوش سوڭىندا قالىپ قويساق تا, جەر-جاھاننىڭ ستۋدەنتتەرى باس قوسقان جارىستاردا جەرلەستەرىمىز جاقسى ونەر كورسەتىپ ءجۇر. ماسەلەن, 1993 جىلدان بەرى دۇنيەجۇزىلىك ۋنيۆەرسيادانىڭ جالاۋى 14 مارتە جەلبىرەدى. سول باسەكەلەردىڭ بەسەۋىندە قازاقستاننىڭ حوككەيشىلەرى جەڭىس تۇعىرىنا كوتەرىلدى. 1993 جىلى زاكوپانەدە رەسەيگە عانا ەسە جىبەرىپ, كۇمىس مەدالدى يەلەندىك. 1995 جىلى حاكادا باس جۇلدەنى ولجالادىق. ول ءتۋرنيردىڭ فينالىندا چەحيانى سان سوقتىردىق. ال 2013, 2015 جانە 2017 جىلدارى كۇمىس مەدالدى ەنشىلەدىك. يسپانيا مەن سلوۆاكيا بىرلەسىپ وتكىزگەن ۋنيۆەرسيادادا كانادادان جەڭىلسەك, ترەنتو مەن الماتىدا رەسەيلىكتەرگە جول بەردىك. 2019 جىلى كراسنويارسكىدە شىمىلدىعى تۇرىلگەن بايراقتى باسەكەدە ايدىن يەلەرىنىڭ اسىعى الشىسىنان تۇسسە, كۇمىس پەن قولا مەدالدى سلوۆاكتار مەن كانادالىقتار يەلەندى. مىنە, وسى دەرەكتەردىڭ ءوزى-اق شايبالى حوككەيدى سەرىك ەتكەن وتاندىق ستۋدەنتتەرىمىزدىڭ الەۋەتى قانشالىقتى جوعارى ەكەنىن اڭعارتىپ تۇر. ولاي بولسا, جەرلەستەرىمىزدەن لەيك-پلەسيدتە دە جەڭىستەر كۇتەمىز.
ايەلدەر اراسىنداعى جارىس 2009 جىلدان بەرى ۇيىمداستىرىلىپ كەلەدى. سول ارالىقتا باس جۇلدەنىڭ ۇشەۋىن كانادا جەڭىپ السا, ۇشەۋىندە رەسەي حوككەيشىلەرىنىڭ باعى جاندى. كەلەسى جىلى وتەتىن جارىستا كانادا, چەحيا, ۇلىبريتانيا, جاپونيا, سلوۆاكيا جانە سشا قۇرامالارى اينالما جۇيە بويىنشا وينايدى. بۇل باسەكەدە دە ءتورت ۇزدىك كوماندا پلەي-وففتا كۇش سىناسۋ مۇمكىندىگىنە يە بولادى.