2018, 2020 جانە 2021 جىلدارى ۇيىمداستىرىلعان «ابىلاي حاننىڭ قارا جولى» ەكسپەديتسياسى بيىل ەلىمىزدىڭ باتىس وڭىرلەرىن ارالاپ قايتتى.
ەكسپەديتسيا مۇشەلەرى بۇعان دەيىنگى ساپارلارىندا سەگىز جارىم مىڭ شاقىرىمدى ەڭسەرگەن ەدى. ەلگە ورالعان سوڭ ولار ەكسپەديتسيا بارىسىندا ارالاعان كيەلى جەرلەردەن العان اسەرلەرىمەن, ولكەمىزدىڭ تاريحىنا قاتىستى جيناقتاعان اقپاراتتارىمەن ءبولىستى.
«بۇل جولعى ەكسپەديتسيا باتىستىڭ ەرلىك, رۋحاني, مادەني بايلىعىن زەردەلەۋگە ارنالدى. ماقسات – ارنايى جيناق شىعارىپ, حالىقتىڭ يگىلىگىنە ۇسىنۋ جانە ونى جۇرتشىلىقتىڭ, اسىرەسە جاس ۇرپاقتىڭ پاتريوتتىق سەزىمىن قالىپتاستىرۋعا پايدالانۋ. ءبىزدىڭ جۇرگەن جولىمىز ىرعىز, اقتوبە, بەينەۋ, ماڭعىستاۋ, اتىراۋ, ورال, ودان كەيىن قوستاناي, كوكشەتاۋمەن اياقتالدى. بۇل جولدىڭ ۇزىندىعى 8 مىڭ 500 كيلومەتردى قۇرادى. وسى جولدىڭ ءبارىن 15 كۇننىڭ ىشىندە ەڭسەرىپ شىقتىق», دەيدى ەكسپەديتسيا جەتەكشىسى مۇرات قاجى ىدىرىس ۇلى.
ءىس-شارا «التىن وردانىڭ 750 جىلدىعىنا, احمەت بايتۇرسىن ۇلىنىڭ تۋعانىنا – 150, مانشۇك مامەتوۆا مەن حيۋاز دوسپانوۆانىڭ تۋعانىنا 100 جىل تولۋىنا ورايلاستىرىلدى. اقتوبە قالاسىنداعى تاريحي-ولكەتانۋ مۋزەيىندە ەكسپەديتسيا مۇشەلەرىنىڭ, اقتوبەلىك عالىمدار, تاريحشىلار, مۋزەي قىزمەتكەرلەرى جانە كىتاپحاناشىلاردىڭ قاتىسۋىمەن عىلىمي كونفەرەنتسيا ءوتتى. جالپى, ەكسپەديتسيانىڭ ماقساتى بابالار سالعان سارا جولمەن ءجۇرىپ ءوتىپ, تاريحي ورىنداردى ارالاۋ, كونە قورىمدارعا, ارۋاقتى, ءباھادۇر باتىرلار مەن حانداردىڭ, بيلەردىڭ باسىنا تاعزىم ەتۋ, كونە قالالاردىڭ ورىندارىن زەرتتەۋ, قازاقتىڭ ازاتتىعى ءۇشىن بولعان شايقاس ورىندارىنا بارۋ, بۇرىن-سوڭدى اشىلماعان تىڭ دۇنيەلەردى جارىققا شىعارۋ بولدى.
«اتالعان ەكسپەديتسيا ءارى قاراي دا ءوزىنىڭ تاريحي-تانىمدىق باعىتتاعى جۇمىستارىن جالعاستىرا بەرۋگە دايىن», دەيدى ەكسپەديتسيا جەتەكشىسى مۇرات قاجى ىدىرىس ۇلى.
گاككۋ اسىلبەكقىزى,
«كوكشەتاۋ» گازەتىنىڭ باس رەداكتورى
اقمولا وبلىسى