تاراپتار سبەربانكتىڭ ەنشىلەس بانكتەگى بارلىق ۇلەسىن ساتۋ تۋرالى كەلىسىمگە قول قويدى, دەپ حابارلايدى Egemen.kz.
«بايتەرەك» ۇلتتىق حولدينگى مەن «سبەربانك» اق ەب ساتۋ-ساتىپ الۋ تۋرالى مامىلەگە قول قويعانى جايلى حولدينگتىڭ رەسمي سايتىندا جاريالاندى.
باياندامادا سبەربانكتىڭ قازىرگى گەوساياسي جاعدايدى باسشىلىققا الا وتىرىپ جانە ەنشىلەس بانك كليەنتتەرىنىڭ مۇددەلەرىنە ساي ارەكەت ەتە وتىرىپ, قازاقستاندىق نارىقتان شىعۋ تۋرالى شەشىم قابىلداعانى اتاپ كورسەتىلگەن.
«سبەربانك قازاقستان» جوعارى ساپاداعى نەسيە پورتفەلىنە يە جانە كوپ جىلدار بويى قازاقستاننىڭ قارجى نارىعىنىڭ نەگىزگى قاتىسۋشىلارىنىڭ ءبىرى بولىپ كەلدى. «سبەربانك قازاقستاندى» ساتىپ الۋ تۋرالى شەشىم قابىلداۋ كەزىندە «بايتەرەك» حولدينگى ونىڭ ەلدىڭ قارجى جۇيەسى ءۇشىن جوعارى ماڭىزدىلىعىن باعالادى», دەپ جازىلعان حابارلامادا.