سىبايلاس جەمقورلىققا قارسى ءىس-قيمىل اگەنتتىگى كاسىپكەرلىك سۋبەكتىلەرىن قورعاۋ جونىندەگى جۇمىس توبىنىڭ كەڭەيتىلگەن وتىرىسىن وتكىزدى, دەپ حابارلايدى Egemen.kz انتيكورعا سىلتەمە جاساپ.
وتىرىسقا سىبايلاس جەمقورلىققا قارسى قىزمەتتىڭ بارلىق جەدەل-تەرگەۋ قۇرامى, «اتامەكەن» ۇكپ باسقارما توراعاسىنىڭ ورىنباسارى ەربول ۇستەمىروۆ جانە وڭىرلىك پالاتالاردىڭ وكىلدەرى قاتىستى.
ادال كاسىپكەرلەردى قىلمىستىق قۋدالاۋ شەڭبەرىنە نەگىزسىز تارتۋعا جول بەرمەۋ, تەرگەۋ ارەكەتتەرىمەن شامادان تىس قىسىم كورسەتۋ بويىنشا وڭ جۇمىس ناتيجەلەرى تالقىلاندى.
اتاپ ايتقاندا, تەرگەۋگە نۇقسان كەلتىرمەي, قىلمىستىق پروتسەستى وڭتايلاندىرۋ ارقىلى كاسىپكەرلەردى سىبايلاس جەمقورلىققا قارسى قىزمەتتىڭ قىلمىستىق ىستەرى بويىنشا 900-گە جۋىق تەرگەۋ ارەكەتىنەن قورعادى.
«بيزنەسمەندەردى, كوممەرتسيالىق فيرمالاردىڭ قىزمەتكەرلەرىن شاقىرۋ ەكى ەسە قىسقاردى. بۇل جۇمىس اگەنتتىك توراعاسىنىڭ 13 شىلدەدەگى بۇيرىعىنا سايكەس سوتقا دەيىنگى تەرگەپ-تەكسەرۋدى ۇيىمداستىرۋ جونىندەگى نۇسقاۋلىق ارقىلى جۇرگىزىلەدى.
ۆەدومستۆولىق قۇجات سوتقا دەيىنگى تەرگەپ-تەكسەرۋ قاعيدالارىمەن قاتار كاسىپكەرلىك سۋبەكتىلەرىن قورعاۋعا ارنالعان ارنايى تاراۋدى قامتيدى», دەلىنگەن حابارلامادا. سونىمەن قاتار سىبايلاس جەمقورلىققا قارسى قىزمەت پەن ۇلتتىق پالاتانىڭ بيزنەسكە قۇقىقتىق كومەك كورسەتۋ بويىنشا بىرلەسكەن جۇمىسى تانىستىرىلدى. كەڭەستە كاسىپكەرلەردىڭ نەعۇرلىم پروبلەمالىق وتىنىشتەرى بويىنشا كەيستىك مىندەتتەر قارالدى. بىرقاتار اۋماقتىق دەپارتامەنتتىڭ باسشىلارىنا ولار بويىنشا ناقتى, جان-جاقتى شارالار قابىلداۋ تاپسىرىلدى.
«كاسىپكەرلەردىڭ وتىنىشتەرىن ۋاقىتىلى قاراۋ ءۇشىن مەملەكەتتىك ورگاندار تاراپىنان ولاردىڭ قىزمەتىنە زاڭسىز ارالاسۋعا بايلانىستى وتىنىشتەردى قاراۋ بويىنشا بيزنەسپەن ونلاين كەزدەسۋلەردى ۇلتتىق پالاتامەن بىرلەسىپ جۇيەلى نەگىزدە وتكىزۋ تۋرالى شەشىم قابىلداندى.
وتىرىس قورىتىندىسى بويىنشا كاسىپكەرلىك سۋبەكتىلەرىن قورعاۋ جونىندەگى جۇمىستى ودان ءارى جەتىلدىرۋ بويىنشا ۇسىنىستار ازىرلەندى», دەپ حابارلادى اگەنتتىكتەن.