قازاقستاندىق رەجيسسەر سامعار راقىمنىڭ «كوشە اقىنى» ءفيلمى وڭتۇستىك كورەياداعى حالىقارالىق كينوفەستيۆالگە ۇسىنىلدى. قىسقامەتراجدى كينوتۋىندى Music film’s Landscape سەكتسياسىندا كورسەتىلمەك.
بۇل اتالىمدا زاماناۋي مۋزىكالىق فيلمدەردەن باستاپ, ءارتۇرلى مۋزىكالىق جانرلار مەن مۋزىكانتتارعا ارنالعان فيلمدەر, سونىمەن قاتار مۋزىكا ارقىلى امبەباپ ءومىر مەن ءتۇرلى مادەنيەتتەردى كورسەتەتىن كارتينالار باق سىنايدى.
«كوشە اقىنى» ءفيلمىنىڭ جەلىسى ۇرپاقتار اراسىنداعى قاقتىعىس ماسەلەسىن قوزعايدى. وقيعا ايتىسكەر تاڭجارىق پەن ۇلى تۇراننىڭ اراسىندا ءوربيدى. ماسەلەن, رەپكە قىزىعىپ, ءتۇرلى ريفمالار مەن رەچيتاتيۆتەردى قۇراستىراتىن ۇلىنىڭ ونەرىن اكەسى قابىلدامايدى. فيلم كورەرمەنگە ۋاقىتتىڭ جاڭا تەندەنتسيالارىنا ونەردى دە بەيىمدەۋگە بولاتىنىن, سونىمەن قاتار اتا-بابالار مۇرا ەتكەن قۇندىلىقتاردى ساقتاۋ كەرەكتىگىن مەڭزەيدى.
ايتا كەتەيىك, بىلتىر «كوشە اقىنى» اقش-تا وتكەن Meihodo International Youth visual Media Festival 4-ءشى حالىقارالىق كينوفەستيۆالىندە «مۋزىكالىق بەينە» ساناتىندا ماراپاتقا يە بولدى جانە Annapolis Film Festival «كورەرمەن كوزايىمى» جۇلدەسىن جەڭىپ الدى. سونداي-اق 6-شى حالىقارالىق Baiqonyr International Short Film Festival قىسقامەتراجدى كينوفەستيۆالىندە كارتينا «ۇزدىك مونتاج» نوميناتسياسى بويىنشا ۇزدىك دەپ تانىلدى.
ەسكە سالساق, 18-ءشى حالىقارالىق مۋزىكا جانە كينوفەستيۆالى چەحچون قالاسىندا (وڭتۇستىك كورەيا) ءوتىپ جاتىر.