جاز باسىندا «استانا بالەت» تەاترى «جىبەك جولى» بالەتىنىڭ پرەمەراسىن ۇسىنعان ەدى. زور قوشەمەتپەن وتكەن قويىلىمنىڭ تەلەنۇسقاسى وسى ايدا وتاندىق تەلەارنالاردان كورسەتىلمەك. جوبا اۆتورلارى كورەرمەن قاۋىمدى ۇلى جىبەك جولىمەن ساياحاتتاۋعا شاقىرادى. مۇندا جىبەك ازيا مەن ەۋروپا وركەنيەتتەرىن بايلانىستىرۋشى سيمۆول رەتىندە الىنىپ وتىر.
شىلدە ايىندا «استانا بالەت» تەاترى ساحناسىندا ەكى اكتىلى «جىبەك جولى» بالەتىنىڭ ەكراندىق نۇسقاسىنىڭ ءتۇسىرىلىمى جاسالدى. قويۋشى-بالەتمەيستەر – قازاقستاننىڭ ەڭبەك سىڭىرگەن قايراتكەرى, تەاتردىڭ باس بالەتمەيستەرى مۋكارام اۆاحري, رەجيسسەرى – تاحير اليەۆ. تەلەسپەكتاكلدە كورەرمەن تەاتردىڭ تالانتتى ارتىستەرى – دارينا قايراشەۆا, اينۇر ابىلعازينا, انار دۇكيەۆا, قالامقاس ورىنباساروۆا, ناتاليا فەرناندەس-مەنەس, اڭساعان كوبەنتاي, اسەل جاڭعاسقاەۆا, سۇندەت سۇلتانوۆ, فارحاد بۋريەۆ, ۋەسلي كارۆالو, ارتۋر ەدسون جانە ت.ب. ونەرىن تاماشالاي الادى.
«بۇل العاشقى تاجىريبەمىز ەمەس. بۇعان دەيىن «بەيبارىس سۇلتان» بالەتىنىڭ تەلەنۇسقاسىن تۇسىرگەن ەدىك. بۇل كۇردەلى ءارى قىزىقتى جۇمىس, شىعارماشىلىق ۇجىمىمىز وراسان تاجىريبە جيناقتادى. رەپەرتۋارىمىزدى ەكرانعا كوشىرۋىمىزدىڭ بىردەن-ءبىر سەبەبى, الدەبىر سەبەپتەرمەن سپەكتاكلدەردى كورە الماعان كورەرمەنگە تەاتر ونەرىن پاش ەتۋ. ەلىمىزدىڭ تۇكپىر-تۇكپىرىندەگى حالىق قويىلىمداردى تاماشالاي السا ەكەن دەگەن نيەتتەمىز», دەيدى مۋكارام اۆاحري.
«جوبانىڭ رەجيسسەرى بولۋ – مەن ءۇشىن ۇلكەن مارتەبە. ونەر – بەيبىتشىلىك جارشىسى. تۇسىرىلىمگە ۇلكەن شىعارماشىلىق ءارى تەحنيكالىق توپ قاتىستى. بالەتتىڭ تەلەنۇسقاسىن دايىنداۋعا ءتۇسىرىلىم مەن مونتاجدى قوسا ەسەپتەگەندە ەكى ايداي ۋاقىت كەتتى. ەلىمىزدىڭ بالەت ونەرىنە ۇلەس قوسىپ جاتقانىمىز ەرەكشە ماقتانىش سەزىمىن وياتادى. رەجيسسەر رەتىندە سپەكتاكل اتموسفەراسىن جەتكىزۋگە كۇش سالدىم. كورەرمەن ءتۇرلى مادەنيەت پەن وركەنيەتتىڭ تىنىسىن سەزىنۋگە ءتيىس. ونىڭ ۇستىنە, وسىنىڭ ءبارىن تۇتاس ءبىر تۋىندىعا اينالدىرۋ كەرەك ەدى. جالپى, مۋكاراممەن شىعارماشىلىق جۇمىس قىزىقتى ءارى ەرەكشە كۇيدە ءوتتى», دەپ اتاپ ءوتتى رەجيسسەر تاحير اليەۆ.
قويۋشى-بالەتمەيستەر كلاسسيكالىق جانە حالىق ءبيىنىڭ ەلەمەنتتەرىن شىعىس مانەرىندەگى رەڭگە بولەۋ ارقىلى, زامان ىرعاعىمەن الماسىپ وتىراتىن ءتۇرلى بەينەلەر, ستيلدەر مەن كوركەمدەۋ ادىستەرى بار تۋىندىنى جارىققا شىعاردى. كەرۋەن, نەفريت, جىبەك پەن امفورالاردىڭ بەينەسى ءارى كوركەم, ءارى ساحناعا «لايىقتالعان». مۋزىكا مەن بي – ۋاقىتتان تىس قۇبىلىستار. سول ارقىلى ءبىر وركەنيەتتەن ەكىنشىسىنە ەركىن ساياحاتتاۋ مۇمكىندىگى تۋادى. سۋرەتتەر, وقيعالار ءبىرىنىڭ ءىزىن ءبىرى الماسىپ, كورەرمەندى مادەنيەتتەر توعىسىندا ۇزدىكسىز ساپارعا باستايدى.
دەكوراتسيا, كوستيۋمدەر, جارىق پەن بەينەكورىنىس ءوزارا ۇيلەسىپ, سپەكتاكلدىڭ حورەوگرافيالىق ورنەگىن اشا تۇسكەندىكتەن, وسىنىڭ ءوزى حورەوگرافيالىق تۋىندىنىڭ تۇتاستىعىنا سەپ بولدى. ساحنانىڭ ىقشام ءارى شاعىن بەزەندىرىلۋىنىڭ اسەرىنەن حورەوگراف ۇزدىكسىز جولدى, ونىڭ زامان ىرعاعىنا قاراي تۇراقسىز ءارى وزگەرمەلى بولاتىنىن سۋرەتتەي الدى. ال شىعىس سارىندارىنىڭ ەموتسيالىق ۇرمالى ىرعاقپەن ۇندەسۋىنەن كورەرمەن ءبىر پلاستيكالىق ساياحاتتان ەكىنشىسىنە ەركىن اۋىسىپ وتىرادى.
ايتا كەتەيىك, اتالعان جوبانى «سامۇرىق-قازىنا» اق دەمەۋشىلىگىمەن, بالەت پەن ۇلتتىق ءبيدى قولداۋ جانە دامىتۋ قورى جۇزەگە اسىرىپ وتىر.
بالەتتى شىعارۋعا دارىندى ونەر قايراتكەرلەرى اتسالىستى: ليبرەتتو اۆتورى – قازاقستاننىڭ ەڭبەك سىڭىرگەن قايراتكەرى باقىت قايىربەكوۆ, كومپوزيتورلار – رەنات عايسين, ارمان امار, ۆلاديمير يۆانوفف پەن ومار فارۋك تەكبيلەك, بالەتمەيستەردىڭ اسسيستەنتى – ايجان ءجۇنىسوۆا, كوستيۋم سۋرەتشىلەرى – اسەل شالاباەۆا مەن دينا بۋكسيكوۆا, ستسەنوگراف – اسقار ىسقاقوۆ, بەينەسۋرەتشى – نۇرلان كەرەي, جارىق سۋرەتشىسى – روبەرت داۋتوۆ.